ສປຊ ກ່າວຫາ ສປປ ເກົາຫລີ ລະເມີດມະຕິຂວ້ຳບາດ
ສະຫະປະຊາຊາດກ່າວຫາ ສປປ ເກົາຫລີ ລັກລອບສົ່ງອອກສິນຄ້າທາງເຮືອ ຈົນສ້າງລາຍໄດ້ຫລາຍກວ່າ 200 ລ້ານໂດລາສະຫະລັດ ໃນຮອບ 9 ເດືອນທຳອິດຂອງປີຜ່ານມາ ແລະ ຍັງມີການຮ່ວມມືດ້ານອາວຸດກັບຊີຣີ ແລະ ມຽນມາ.
U.N. experts say North Korea brought in $200M in 9 months despite sanctions https://t.co/otU38kzhRG pic.twitter.com/UxmLMPuK5V
— CBS News (@CBSNews) February 3, 2018
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 3 ກຸມພາວ່າ: ຄະນະກຳມາທິການດ້ານການຂວ້ຳບາດຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ອອກລາຍງານໃນວັນທີ 2 ກຸມພາວ່າ: ສປປ ເກົາຫລີ ຍັງສ້າງລາຍໄດ້ຈາກການສົ່ງອອກສິນຄ້າຕ້ອງຫ້າມຕາມມະຕິຂອງ UNSC ເຊິ່ງຕ້ອງການລົງໂທດລັດຖະບານພຽງຢາງຈາກການທົດລອງລູກສອນໄຟ ແລະ ອາວຸດນິວເຄຼຍຫລາຍເທື່ອ ໃນປີຜ່ານມາ ໂດຍ ສປປ ເກົາຫລີ ລັກລອບລຳລຽງສິນຄ້າທີ່ລວມທັງຖ່ານຫີນ, ແຮ່ເຫລັກ, ກົ່ວ, ເສື້ອຜ້າສຳເລັດຮູບ ແລະ ອາຫານທະເລ ເຂົ້າສູ່ທ່າເຮືອຂອງຫລາຍປະເທດ ບໍ່ວ່າຈະເປັນຣັດເຊຍ, ຈີນ, ສ.ເກົາຫລີ, ມາເລເຊຍ ແລະ ຫວຽດນາມ.
ລາຍງານດັ່ງກ່າວຂອງ UNSC ລະບຸວ່າ: ລັດຖະບານພຽງຢາງໃຊ້ສາລະພັດກົນລະຍຸດເຊັ່ນ: ການປອມແປງເອກະສານວ່າເຮືອບັນທຸກສິນຄ້າຂອງຕົນເອງມີຕົ້ນທາງຈາກຈີນ ຫລື ຣັດເຊຍ ເພື່ອຫລີກເວັ້ນ ຫລື ຊ່ວຍຫລຸດຄວາມເຂັ້ມງວດຂອງມາດຕະການກວດສອບລະຫວ່າງທາງ ແລະ ການຈັດຕັ້ງບໍລິສັດນອກອານາເຂດໃນຫລາຍປະເທດ ສົ່ງຜົນໃຫ້ ສປປ ເກົາຫລີ ຍັງມີລາຍໄດ້ຈາກການສົ່ງອອກສິນຄ້າຕ້ອງຫ້າມໃນໄລຍະ 9 ເດືອນທຳອິດຂອງປີຜ່ານມາ ສູງເຖິງ 200 ລ້ານໂດລາສະຫະລັດ.
ຂະນະດຽວກັນ ລາຍງານລະບຸອີກວ່າ: UNSC ກຳລັງກວດສອບໂຄງການຄວາມຮ່ວມມືດ້ານລູກສອນໄຟລະຫວ່າງ ສປປ ເກົາຫລີ ກັບ ຊີຣີ ແລະ ມຽນມາ ລວມທັງການສົ່ງອອກສິນຄ້າທີ່ບໍ່ມີການແຈ້ງຕໍ່ UNSC ຫລາຍກວ່າ 40 ຄັ້ງ ລະຫວ່າງປີ 2012-2017 ເຊິ່ງມີປາຍທາງຄືສູນສຶກສາ ແລະ ວິໄຈວິທະຍາສາດແຫ່ງຊີຣີ ເຊິ່ງເປັນໜ່ວຍງານດ້ານວິຊາການຂອງລັດຖະບານດາມັດກັດ ທີ່ຮັບຜິດຊອບໂດຍກົງໃນການພັດທະນາອາວຸດເຄມີ ແລະ ການທີ່ກອງທັບມຽນມານຳເຂົ້າລະບົບລູກສອນໄຟຈາກ ສປປ ເກົາຫລີ ນຳອີກ.
