ຈະຫ້າມ ຫລື ຈະຈັດສັນເປັນເຂດຫລິ້ນນ້ຳສົງການໃຫ້ຊະໃຈຈະດີບໍ່ ?

     ສະບາຍດີ ເພື່ອນຜູ້ອ່ານ, ຫລາຍຄົນຄົງຈະຊະໃຈກັບການສະເຫລີມສະຫລອງປີໃໝ່ຂອງຕົນ, ພາຍຫລັງຜ່ານ ພົ້ນມາມາດໆ. ສະເພາະຢູ່ນະຄອນຫລວງວຽງຈັນແລ້ວ ບັນຍາກາດຫົດສົງນ້ຳແມ່ນໄດ້ເລີ່ມມາແຕ່ບ່າຍວັນທີ 14 ເມສາ ເຊິ່ງກົງກັບມື້ສັງຂານລ່ວງ ເກືອບວ່າທຸກເສັ້ນທາງຫລັກໆໃນຕົວເມືອງແມ່ນຈະເຕັມໄປດ້ວຍບັນຍາກາດຫົດ ສົງນ້ຳເຊິ່ງກັນ ແລະ ກັນ ຕ່າງຄົນຕ່າງກໍຕັ້ງຈຸດເປັນຂອງຕົນເອງ ໂດຍບໍ່ຄຳນຶງເຖິງການປະຢັດມັດທະຍັດແຕ່ຢ່າງ ໃດ, ມີທັງເຫລົ້າທັງເບຍ, ປະສານສຽງເພງໃນທຳນອງຕື່ນເຕັ້ນທີ່ບໍ່ແມ່ນຂອງຊາດ, ທັງດື່ມທັງເຕັ້ນສັກແງະສັກ ແງ້ນ, ນຸ່ງຖືໂປ້ເປືອຍ ໂດຍບໍ່ໄດ້ສົນໃຈກັບຮີດຄອງປະເພນີ ແລະ ຂໍ້ຫ້າມໃດໆຂອງເຈົ້າໜ້າທີ່ ແລະ ຕໍ່ມາມື້ວັນທີ 15-16 ກໍຍິ່ງຮ້າຍແຮງ ອັນເຮັດໃຫ້ການສັນຈອນໄປມາໃນເສັ້ນທາງຫລັກຫລາຍສາຍ ຄືຖະໜົນ 3 ແສນໄທ, ເສດ ຖາທິຣາດ, ຖະໜົນແຄມຂອງກາຍເປັນອຳມະພາດ, ເບິ່ງຄືວ່າຂໍ້ຫ້າມຕ່າງໆຂອງເຈົ້າໜ້າທີ່ແມ່ນມີຜົນໜ້ອຍ, ຫ້າມບໍ່ໃຫ້ເອົາໂຕໂຍຕໍ່ນ້ຳມາຫົດຢູ່ຕາມແຄມທາງ, ຫ້າມຫລິ້ນນ້ຳໃນເຂດເສັ້ນທາງ, ຫ້າມເອົານ້ຳໃສ່ຖົງຢາງດຶກ ແກວ່ງໃສ່ກັນຕ່າງໆນັ້ນເບິ່ງແລ້ວຍິ່ງຮ້າຍແຮງ ແລະ ຕາມທີ່ສັງເກດເຫັນກໍບໍ່ເຫັນມີເຈົ້າໜ້າທີ່ຜູ້ໃດເຂົ້າໄປສະກັດ ກັ້ນ ຫລື ເອົາໂທດຕໍ່ຜູ້ກະທຳຜິດ ແລະ ຖ້າເປັນແນວນີ້ມີຫລາຍຄົນໃຫ້ທັດສະນະວ່າ: ກໍອາດຈະບໍ່ໃຊ້ຂໍ້ຫ້າມເຮັດ ຫຍັງ, ເມື່ອຂໍ້ຫ້າມເຫລົ່ານັ້ນບໍ່ມີຜົນສັກສິດແລ້ວ, ເຮົາມາຈັດສັນເຂດຫລິ້ນນ້ຳສະເພາະຈະມີຜົນດີບໍ່ ? ດັ່ງເຂດ ແຄມຂອງ, ຖະໜົນເສດຖາທິຣາດ, ຖະໜົນສາມແສນໄທ ແລະ ບ່ອນອື່ນໆທີ່ເຫັນວ່າເໝາະສົມ ແລະ ຈຳກັດບໍ່ ໃຫ້ລົດລາພາຫະນະທີ່ບໍ່ຈຳເປັນແລ່ນຜ່ານເຂດເສັ້ນທາງດັ່ງກ່າວ ແລະ ອາດຈະຈັດເປັນໄລຍະເວລາໃດໜຶ່ງຂອງ ແຕ່ລະວັນສົງການດັ່ງກ່າວ ທັງຈະຊ່ວຍໃຫ້ມີຄວາມເປັນລະບຽບຮຽບຮ້ອຍ ແລະ ໄດ້ທັງຄວາມເບີກບານມ່ວນຊື່ນ ອີກດ້ວຍ. ຖ້າໃຜມັກເຕັ້ນເຢາະເຕັ້ນຢ່ອງ ແລະ ຫົດສົງກັນດ້ວຍຄວາມມືນເມົາກໍອາດເຂົ້າໄປຫລິ້ນຢູ່ເຂດນັ້ນໃຫ້ ຊະໃຈ.