ເບິ່ງແຍງອະໄວຍະວະສຳຄັນໃຫ້ເຮັດວຽກດີຢູ່ສະເໝີ

ສະໝອງ ບໍ່ໄດ້ມີຄວາມສຳຄັນພຽງແຕ່ແຍກຫູທັງສອງເບື້ອງຂອງເຮົາອອກຈາກກັນເທົ່ານັ້ນ, ແຕ່ຄວາມຈິງແລ້ວສະໝອງເປັນ ອະໄວຍະວະໜຶ່ງທີ່ມີຄວາມສຳຄັນທີ່ສຸດ ເຊິ່ງສະໝອງມີໜ້າທີ່ຄອຍຄວບຄຸມ ແລະ ສັ່ງການການເຄື່ອນໄຫວ, ພຶດຕິກຳ ແລະ ການ ຮັກສາຄວາມດຸ່ນດ່ຽງພາຍໃນຮ່າງກາຍໃຫ້ເປັນໄປໂດຍປົກກະຕິ ແລະ ຕໍ່ໄປນີ້ແມ່ນ 10 ເຄັດລັບໃນການເບິ່ງແຍງສະໝອງໃຫ້ເຮັດວຽກດີຢູ່ສະເໝີຈາກຜູ້ຊ່ຽວຊານທາງດ້ານສະໝອງ :

1. ດື່ມນຳ້ຕະຫລອດ ເພາະສະໝອງປະກອບດ້ວຍນຳ້ 85%, ແຊນສະໝອງກໍຄືກັບຕົ້ນໄມ້ທີ່ຕ້ອງການນຳ້ຫລໍ່ລ້ຽງ ຖ້າບໍ່ມີນຳ້ຕົ້ນໄມ້ກໍຫ່ຽວ.
2. ກິນໄຂມັນດີ : ຄົນບໍ່ຄ່ອຍຮູ້ວ່າສະໝອງແມ່ນກ້ອນໄຂມັນ ເຊິ່ງຈຳເປັນຕ້ອງມີໄຂມັນດີໄປທົດແທນພາກສ່ວນທີ່ເສື່ອມສະພາບ ແນະນຳໃຫ້ກິນໄຂມັນດີ ຈຳພວກນຳ້ມັນປາ, ສານສະກັດຈາກໃບແປະກ໊ວຍ, ປາທີ່ມີໄຂມັນດີ ເຊັ່ນ: ປາແຊວມັອນ, ນົມຖົ່ວເຫລືອງ, ວິຕາມິນລວມ, ນຳ້ມັນພຣີມໂຣດ ເປັນນຳ້ມັນດີເຮັດໃຫ້ແຊນຊຸ່ມນຳ້, ສ່ວນວິຕາມິນເຊ ກິນແລ້ວສົດຊື່ນ.
3. ນັ່ງສະມາທິມື້ລະ 12 ນາທີ ຫລັງຈາກຕື່ນນອນແລ້ວ ໃຫ້ຕັ້ງສະຕິ ແລະ ນັ່ງສະມາທິທຸກເຊົ້າ ມື້ລະ 12 ນາທີ ເພື່ອໃຫ້ສະໝອງເຂົ້າສູ່ໄລຍະທີ່ມີຄື້ນ Theta ເຊິ່ງເປັນຄື້ນທີ່ຜ່ອນຄາຍສຸດໆ ເຮັດໃຫ້ສະໝອງມີ Mental Imagery ສາມາດຈິນຕະນາການເຫັນພາບ ແລະ ມີຄວາມຄິດສ້າງສັນ.
4. ໃສ່ຄວາມຕັ້ງໃຈ : ການຕັ້ງໃຈໃນສິ່ງໃດກໍໍຕາມປຽບດັ່ງການໂປຣແກຣມສະໝອງ ວ່ານີ້ແມ່ນສິ່ງທີ່ຕ້ອງເກີດລະວ່າງມື້ ສະໝອງຈະປັບພຶດຕິກຳເຮົາໃຫ້ໄປສູ່ເປົ້າໝາຍນັ້ນ.
5. ຍິ້ມ ແລະ ຫົວເລື້ອຍໆ : ທຸກເທື່ອທີ່ຍີ້ມ ຫລື ຫົວຈະມີສານເອັນດໍຟິນ ເຊິ່ງເປັນສານແຫ່ງຄວາມສຸກຫລັ່ງອອກມາ.
6. ຮຽນຮູ້ສິ່ງໃໝ່ທຸກມື້ : ສິ່ງໃໝ່ໃນບ່ອນນີ້ໝາຍເຖິງສິ່ງຕ່າງໆທີ່ເກີດຂຶ້ນໃນຊີວິດປະຈຳວັນ ເຊັ່ນ : ໄປກິນອາຫານຮ້ານໃໝ່ໆ, ຮູ້ຈັກໝູ່ໃໝ່, ອ່ານໜັງສືເຫລັ້ມໃໝ່ ກະຕຸ້ນໃຫ້ຢາກຮຽນຮູ້ ແລະ ສ້າງສັນໄປເລື້ອຍໆ ເມື່ອມີຄວາມສຸກກໍເຮັດໃຫ້ມີຄວາມຄິດສ້າງສັນ.
7. ໃຫ້ອະໄພໂຕເອງທຸກມື້ : ຂະນະທີ່ການບໍ່ໃຫ້ອະໄພໂຕເອງ, ຄຽດແຄ້ນຄົນອື່ນ, ຄຽດໃຫ້ໂຕເອງ ເຮັດໃຫ້ເປືອງພະລັງງານສະໝອງ.
8. ຂຽນບັນທຶກ : ຝຶກຂຽນ ປອບໃຈສິ່ງດີໆທີ່ເກີດຂຶ້ນແຕ່ລະມື້ລົງໃນປຶ້ມບັນທຶກ ເພາະການຂຽນເລື່ອງດີໆເຮັດໃຫ້ສະໝອງຄິດໃນດ້ານບວກ ພ້ອມກັບຫລັ່ງສານເຄມີທີ່ດີອອກມາ ຊ່ວຍໃຫ້ຫລັບຝັນດີ.
9. ຝຶກຫາຍໃຈເລິກໆ : ສະໝອງໃຊ້ອົກຊີແຊນ 20 – 25% ທີ່ເຂົ້າສູ່ຮ່າງກາຍ ການຝຶກຫາຍໃຈເຂົ້າເລິກໆຈຶ່ງເປັນການສົ່ງພະ ລັງງານທີ່ດີໄປຍັງສະໝອງ.
10. ຢ່າລືມແບ່ງປັນຂໍ້ມູນດີໆໃຫ້ຄົນອື່ນ : ເພາະສະໝອງຂອງເຮົາຈະຈື່ຈຳຂໍ້ມູນທີ່ເຮົາໄດ້ແບ່ງປັນໃຫ້ຄົນອື່ນ.