ປິດການແຂ່ງຂັນກິລາກຸ່ມການສຶກສາແສງສະຫວັນ
ທ້າຍອາທິດຜ່ານມາ ທີ່ສະໜາມກິລາໂຮງຮຽນສາມັນສຶກສາແສງສະຫວັນ 3 ບ້ານຊໍາເກດ ເມືອງສີໂຄດຕະບອງ ນະຄອນຫລວງວຽງຈັນ ໄດ້ມີພິທີປິດການແຂ່ງຂັນກິລາລະດັບສາຍສາມັນສຶກສາ ທົ່ວກຸ່ມການສຶກສາແສງສະຫວັນ ປະຈຳສົກຮຽນ 2017-2018 ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ຫົງແກ້ວ ທຳມະວົງ ຫົວໜ້າຂະແໜງພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ, ທ່ານ ເກດສະໜາ ທອງມະນີວົງ ຮັກສາການຫົວໜ້າຫ້ອງການສຶກສາທິການ ແລະ ກິລາ ເມືອງສີໂຄດຕະບອງ ພ້ອມດ້ວຍຄະນະອຳນວຍການແຕ່ລະສາຂາ ຕະຫລອດຮອດພະນັກງານ, ຄູ-ອາຈານ ແລະ ນ້ອງນັກຮຽນເຂົ້າຮ່ວມຢ່າງຫລວງຫລາຍ.
ໂອກາດນີ້, ທ່ານ ຊາຍສົມພົນ ພອນຄຳປານ ຜູ້ອຳນວຍການແສງສະຫວັນ 1 ກ່າວວ່າ: ອີງໃສ່ແຜນການແຂ່ງຂັນກິລາປະຈຳປີຂອງທຸກໆປີພາຍໃນກຸ່ມການສຶກສາແສງສະຫວັນໄດ້ເຕົ້າໂຮມເອົາບັນດາພະນັກງານ, ຄູ-ອາຈານ ແລະ ນັກກິລານັກຮຽນພາຍໃນກຸ່ມເຂົ້າຮ່ວມແຂ່ງຂັນແຕ່ລະດັບ ປະຖົມ-ມັດທະຍົມປາຍ ເພື່ອຈັດຕັ້ງປະຕິບັດຜັນຂະຫຍາຍ 5 ຫລັກມູນການສຶກສາ ແລະ 3 ເນື້ອໃນຂໍ້ແຂ່ງຂັນ ຕາມແນວທາງນະໂຍບາຍຂອງກະຊວງສຶກສາທິການ ແລະ ກິລາ ວາງອອກໃຫ້ປາກົດຜົນເປັນຈິງ ພ້ອມທັງສົ່ງເສີມໃຫ້ນັກຮຽນພາຍໃນກຸ່ມການສຶກສາແສງສະຫວັນໄດ້ມີກິດຈະກຳເຄື່ອນໄຫວແຂ່ງຂັນກິລາເພື່ອພັດທະນາຕົນເອງໃຫ້ກາຍເປັນນັກກິລາທີ່ມີຄວາມສາມາດ ແລະ ແລກປ່ຽນບົດຮຽນໃຫ້ເຊິ່ງກັນ ແລະ ກັນ. ການແຂ່ງຂັນໄດ້ຈັດຂຶ້ນ 3 ປະເພດຄື: ບານເຕະ, ບານສົ່ງ ແລະ ກະຕໍ້.
ຜ່ານການແຂ່ງຂັນຜົນປາກົດວ່າ: ແສງສະຫວັນ 2 ສາມາດຍາດໄດ້ອັນດັບທີ 1 ຂອງການແຂ່ງຂັນກິລາບານເຕະໄດ້ 3 ປີ. ຂະນະທີ່ຜົນກິລາບານເຕະລະດັບມັດທະຍົມຕອນຕົ້ນ ທີ 1 ແສງສະຫວັນ 3, ອັນດັບທີ 2 ແສງສະຫວັນ 4; ລະດັບປະຖົມ ທີ 1 ແສງສະຫວັນ 3 ແລະ ທີ 2 ແສງສະຫວັນ 4. ສ່ວນກິລາບານສົ່ງ ມ.ປາຍ ທີມຊາຍ ທີ 1 ແສງສະຫວັນ 3, ທີ 2 ແສງສະຫວັນ 1; ທີມຍິງ ທີ 1 ແສງສະຫວັນ 3, ທີ 2 ແສງສະຫວັນ 2 ແລະ ມ.ຕົ້ນ ທີມຊາຍ ທີ 1 ແສງສະຫວັນ 3 ແລະ ທີ 2 ແສງສະຫວັນ 2.
