ເສດຖະກິດອິນເດຍອາດເຕີບໃຫຍ່ 7-7,5% ໃນປີໜ້າ
ລັດຖະບານອິນເດຍຕີລາຄາເສດຖະກິດປະເທດຈະຂະຫຍາຍຕົວລະຫວ່າງ 7-7,5% ໃນປີງົບປະມານໜ້າ ທີ່ຈະເລີ່ມຕົ້ນແຕ່ວັນທີ 1 ເມສາ, ສ່ວນປີນີ້ຕົວເລກອາດຈະຢູ່ປະມານ 6,75%.
ສຳນັກຂ່າວ AP ລາຍງານຈາກນະຄອນຫລວງນິວເດນລີ ປະເທດອິນເດຍ ໃນວັນທີ 29 ມັງກອນວ່າ: ການຄາດຄະເນເສດຖະກິດທີ່ທ່ານ ອາຣຸນ ແຈດລີ ລັດຖະມົນຕີກະຊວງການເງິນ ຍື່ນສະເໜີຕໍ່ສະພາ ກ່ອນການປະກາດງົບປະມານລາຍຈ່າຍປະຈຳປີ ຈະມີຂຶ້ນໃນວັນທີ 1 ກຸມພາ.
ລາຍງານລະບຸວ່າ: ການປະຕິຮູບສຳຄັນຫລາຍລາຍການທີ່ດຳເນີນການໄປໃນປີຜ່ານມາ ຈະຊ່ວຍຮັບປະກັນເສດຖະກິດປະເທດເຕີບໃຫຍ່ປະມານ 6,75% ໃນປີງົບປະມານປັດຈຸບັນ ແລະ ການປະຕິຮູບຈະເຂັ້ມຂຸ້ນຂຶ້ນອີກໃນປີງົບປະມານທີ່ຈະມາເຖິງ.
ລັດຖະບານອິນເດຍ ກ່າວວ່າ: ການເຕີບໃຫຍ່ໃນຂະແໜງສົ່ງອອກ ລວມທັງເສດຖະກິດໂລກດີຂຶ້ນ ແລະ ການເປີດເສລີກົດເກນການລົງທຶນຂອງຕ່າງປະເທດໃນອິນເດຍ ເປັນປັດໄຈສຳຄັນທີ່ເລັ່ງການເຕີບໃຫຍ່ ໄປສູ່ການສິ້ນສຸດຂອງປີງົບປະມານປັດຈຸບັນ ຫລັງຈາກຫລຸດລົງຢ່າງວ່ອງໄວໃນເຄິ່ງທຳອິດຂອງປີ.
ສະພາບເສດຖະກິດຂະຫຍາຍຕົວຊ້າເກີດຈາກການປະກາດຍົກເລີກສະກຸນເງິນຂອງອິນເດຍຢ່າງກະທັນຫັນເຖິງ 86% ໃນປີ 2015 ແລະ ຄວາມວຸ້ນວາຍໃນການຈັດເກັບພາສີສິນຄ້າ ແລະ ບໍລິການໃນປີຜ່ານມາ.
ກະຊວງການເງິນ ກ່າວເນັ້ນໃນຖະແຫລງການວ່າ: ຍັງມີຄວາມກັງວົນໃນປີງົບປະມານທີ່ຈະມາເຖິງ ໂດຍສະເພາະຄວາມເປັນໄປໄດ້ທີ່ລາຄານ້ຳມັນດິບໃນຕະຫລາດໂລກຈະແພງຂຶ້ນ ເນື່ອງຈາກອິນເດຍຕ້ອງອາໄສການນຳເຂົ້ານ້ຳມັນເປັນສ່ວນໃຫຍ່ ຂອງການໃຊ້ນ້ຳມັນໃນປະເທດ.
