ເປີດປີທ່ອງທ່ຽວລາວພ້ອມໆກັບງານບຸນນະມັດສະການຜາສາດຫີນວັດພູຈໍາປາສັກ
ພິທີເປີດປີທ່ອງທ່ຽວລາວໄດ້ຈັດຂຶ້ນພ້ອມໆກັນກັບງານບຸນນະມັດສະການຜາສາດຫີນວັດພູຈຳປາສັກໃນວັນທີ 29 ມັງກອນນີ້ທີ່ເມືອງ ແລະ ແຂວງດັ່ງກ່າວ, ໂດຍການໃຫ້ກຽດລັ່ນຄ້ອງເປີດງານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຊີ້ນໍາຈັດງານປີທ່ອງທ່ຽວລາວ 2018, ເຊິ່ງມີທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ຄະນະພັກ-ຄະນະນຳແຂວງ, ພຣະເຖຣະ-ນຸເຖຣະ ແລະ ຜູ້ຕາງໜ້າຈາກແຂວງຕ່າງໆ, ພ້ອມດ້ວຍມວນຊົນຊາວແຂວງຈຳປາສັກເຂົ້າຮ່ວມຢ່າງເປັນຂະບວນຟົດຟື້ນ.
ໃນໂອກາດນີ້, ທ່ານຮອງເຈົ້າແຂວງໆຈຳປາສັກ ໄດ້ລາຍງານໃຫ້ຊາບວ່າ: ຜາສາດຫີນວັດພູຈຳປາສັກ, ເຊິ່ງໄດ້ຮັບຮອງເອົາເປັນມໍລະດົກໂລກແຫ່ງທີ 2 ຂອງລາວຕໍ່ຈາກເມືອງຫລວງພະບາງ ແລະ ການຈັດງານບຸນປີນີ້ຍິ່ງມີຄວາມໝາຍສໍາຄັນນອກຈາກໄດ້ສົ່ງຜົນຕໍ່ການພັດທະນາເສດຖະກິດ-ສັງຄົມຂອງແຂວງແລ້ວ, ຍັງເປັນການສົ່ງເສີມການທ່ອງທ່ຽວ, ດຶງດູດເອົານັກທ່ອງທ່ຽວເຂົ້າມາທ່ຽວຊົມ ແລະ ສຶກສາຄົ້ນຄວ້າເພີ່ມຂຶ້ນໃນແຕ່ລະປີ ແລະ ຄຽງຄູ່ກັນນັ້ນ ເພື່ອຮອງຮັບນັກທ່ອງທ່ຽວ, ໂຮງແຮມ, ເຮືອນພັກ, ຮ້ານອາຫານ ແລະ ການບໍລິການນໍາທ່ຽວຕ່າງໆ ໄດ້ຮັບການປັບປຸງຍົກລະດັບໃຫ້ໃກຄຽງກັບພາກພື້ນ ແລະ ສາກົນ, ຂະບວນການຜະລິດເປັນສີນຄ້າໄດ້ມີບັນຍາກາດຟົດຟື້ນ, ເວົ້າລວມແລ້ວຂະແໜງການທ່ອງທ່ຽວຂອງແຂວງຈໍາປາສັກນັບມື້ໄດ້ຮັບການປັບປຸງ ແລະ ຂະຫຍາຍຕົວເປັນກ້າວໆມາ ແລະ ໄດ້ກາຍເປັນຂະແໜງເສດຖະກິດໜຶ່ງທີ່ສ້າງລາຍຮັບໃຫ້ແຂວງເປັນຈໍານວນບໍ່ໜ້ອຍໃນແຕ່ລະປີຄື: ປີ 2011 ມີນັກທ່ອງທ່ຽວເຂົ້າມາກວ່າ 333 ພັນຄົນ, ສ້າງລາຍຮັບໄດ້ປະມານ 30 ກວ່າລ້ານໂດລາສະຫະລັດ, ມາຮອດປີ 2015 ຈໍານວນນັກທ່ອງທ່ຽວດັ່ງກ່າວໄດ້ເພີ່ມຂຶ້ນເປັນ 611 ກວ່າຄົນ, ສ້າງລາຍຮັບໄດ້ກວ່າ 67 ລ້ານໂດລາສະຫະລັດ, ໃນປີ 2017 ເພີ່ມເປັນ 799 ພັນກວ່າຄົນສ້າງລາຍຮັບ 123 ກວ່າລ້ານໂດລາສະຫະລັດ ແລະ ຄາດຄະເນຮອດປີ 2020 ຈະມີນັກທ່ອງທ່ຽວເຂົ້າມາເຖິງ 1,2 ລ້ານກວ່າຄົນ, ຈະມີລາຍຮັບກວ່າ 228 ລ້ານໂດລາສະຫະລັດ, ສະເພາະປີທ່ອງທ່ຽວລາວນີ້, ຄາດວ່າຈະມີນັກທ່ອງທ່ຽວເຂົ້າມາບໍ່ຫລຸດ 917 ພັນຄົນ ແລະ ຈະສ້າງລາຍຮັບໄດ້ປະມານ 140 ກວ່າລ້ານໂດລາສະຫະລັດ, ປັດຈຸບັນແຂວງຈໍາປາສັກມີແຫລ່ງທ່ອງທ່ຽວທັງໝົດ 216 ແຫ່ງ. ໃນນັ້ນ, ເປັນແຫລ່ງທ່ອງທ່ຽວທໍາມະຊາດ 116 ແຫ່ງ, ປະຫວັດສາດ 40 ແຫ່ງ ແລະ ວັດທະນະທໍາ 60 ແຫ່ງ. ສໍາລັບງານບຸນນະມັດສະການຜາສາດຫີນວັດພູປີນີ້ຈັດຂຶ້ນໃນລະຫວ່າງວັນທີ 29-31 ມັງກອນນີ້, ເພື່ອແນໃສ່ໂຄສະນາ-ສົ່ງເສີມ ແລະ ດຶງດູດນັກທ່ອງທ່ຽວຈາກທຸກສາລະທິດເຂົ້າມາສໍາພັດ ແລະ ຮັບຮູ້ແຂວງຈໍາປາສັກໃຫ້ຫລາຍຂຶ້ນ, ເຊິ່ງໃນພິທີເປີດງານດັ່ງກ່າວໄດ້ມີກ້ອນກໍາລັງມວນຊົນ ແລະ ເມືອງຕ່າງໆເຂົ້າຮ່ວມຢ່າງຫລວງຫລາຍ, ພ້ອມການສະແດງຟ້ອນອັບສະລາຂອງນັກຮຽນເມືອງຈໍາປາສັກ, ສະແດງສີລະປະຕ້ອນຮັບປີທ່ອງທ່ຽວ ແລະ ງານນະມັດສະການຜາສາດຫີນວັດພູ. ນອກຈາກນີ້, ຍັງມີຫລາຍກິດຈະກໍາສະແດງສີລະປະ ແລະ ໝໍລໍາເລື່ອງ, ງານວາງສະແດງ ແລະ ຈໍາໜ່າຍສິນຄ້າ, ຊົມຄອນເສີດຂອງສີລິປິນທີ່ມີຊື່ສຽງຂອງລາວ ແລະ ຈາກປະເທດໄທ, ຊົມການແຂ່ງຂັນກີລາພື້ນບ້ານ ແລະ ມືສຸດທ້າຍ ມີພິທີຕັກບາດ, ຖວາຍສັງຂະທານ, ສ່ວນຕອນຄໍ່າ ມີພິທີວຽນທຽນ, ປ່ອຍໂຄມໄຟຂຶ້ນສູ່ທ້ອງຟ້າເພື່ອບູຊາສິ່ງສັກສິດ.
ໃນພິທີເປີດງານ, ທ່ານເຈົ້າແຂວງໄດ້ກ່າວວ່າ: ເພື່ອເປັນການອະນຸລັກ ແລະ ສົ່ງເສີມຄຸນຄ່າວັດທະນະທໍາອັນຍອດຍິ່ງຂອງໂລກ ກໍຄືຮີດຄອງປະເພນີອັນດີງາມ ທີ່ເຄີຍປະຕິບັດສືບທອດກັນມາແຕ່ບູຮານ ນະການ, ການຈັດງານບຸນນະມັດສະການຜາສາດຫີນວັດພູປີນີ້ ພໍດີກັບປີທ່ອງທ່ຽວ ເພື່ອແນໃສ່ດຶງດູດການທ່ອງທ່ຽວ ແລະ ສົ່ງເສີມຮີດຄອງປະເພນີ ແລະ ວັດທະນະທໍາອັນດີງາມຂອງທ້ອງຖິ່ນໃຫ້ບັນດາແຂກທັງພາຍໃນ ແລະ ຕ່າງປະເທດໄດ້ຮັບຮູ້ຢ່າງກວ້າງຂວາງ. ໃນນາມອໍານາດການປົກຄອງແຂວງ, ຂ້າພະເຈົ້າມີຄວາມເຊື່ອໝັ້ນວ່າ: ດ້ວຍຄວາມຮ່ວມແຮງ-ຮ່ວມໃຈກັນຂອງປະຊາຊົນບັນດາເຜົ່າໃນທົ່ວແຂວງຈໍາປາສັກ ຈະພ້ອມກັນເປັນເຈົ້າພາບທີ່ດີ, ມີບັນຍາກາດຈັບໃຈແກ່ບັນດາແຂກທີ່ເຂົ້າມາທ່ຽວມີຄວາມຈັບອົກຈັບໃຈ ແລະ ເຮັດໃຫ້ປີທ່ອງທ່ຽວລາວທີ່ແຂວງຈໍາປາສັກມີບັນຍາກາດຟົດຟື້ນ, ໃນນາມປະທານຈັດງານ, ຂ້າພະເຈົ້າ ຂໍຖືໂອກາດອັນມີຄວາມໝາຍນີ້ ສະແດງຄວາມຊົມເຊີຍ ແລະ ຍິນດີຕ້ອນຮັບບັນດາທ່ານ, ທຸກພາກສ່ວນ ສູ່ດິນແດນປູລິຍະສະຖານແຫ່ງອາຣິຍະທໍາ ຂອງສັດຕະວັດທີ VII “ ເອກະລັກວັດພູ, ກຸຫຼາບປາກເຊ, ກາເຟປາກຊ່ອງ, ນໍ້າຂອງໂຕນຄອນ, ສີພັນດອນລືນາມ ” ແຫ່ງນີ້.
