ສໍາເລັດການແຂ່ງຂັນປິ່ງປ໋ອງ ຊີງຂັນລັດຖະມົນຕີ ສສກ

ໃນວັນທີ 28 ມັງກອນນີ້ ທີ່ສະໂມສອນກິລາໃນຮົ່ມລ້ານຊ້າງ ນະຄອນຫລວງວຽງຈັນ ໄດ້ສໍາເລັດການແຂ່ງຂັນປິ່ງປ໋ອງຊີງຂັນທ່ານລັດຖະມົນຕີກະຊວງສຶກສາທິການ ແລະ ກິລາ (ສສກ) ໂດຍໃຫ້ກຽດມອບລາງວັນຂອງທ່ານ ບົວລານ ສີລິປັນຍາ ຮອງ​ລັດຖະມົນຕີ​ກະຊວງ ສສກ, ທ່ານ ພັນທະຈິດ ອິນທະມິດ ປະທານສະໂມສອນກິລາໃນຮົ່ມລ້ານຊ້າງ, ພ້ອມດ້ວຍຄະນະບໍລິຫານສະຫະພັນປິ່ງປ໋ອງແຫ່ງຊາດລາວ ແລະ ນັກກິລາເຂົ້າຮ່ວມເປັນຈໍານວນຫລວງຫລາຍ.

ທ່ານນາງ ສາຍໃຈ ວົງສາ ເລຂາສະຫະພັນປິ່ງປ໋ອງແຫ່ງຊາດລາວ ກ່າວວ່າ: ການແຂ່ງຂັນຄັ້ງນີ້ໄດ້ດໍາເນີນແຕ່ວັນທີ 26 ມັງກອນ ເຊິ່ງມີນັກກິລາເຂົ້າຮ່ວມ 200 ກວ່າຄົນ ເຊິ່ງມາຈາກ 5 ແຂວງຄື: ຈໍາປາສັກ, ຊຽງຂວາງ, ຫລວງພະບາງ, ຄໍາມ່ວນ ແລະ ແຂວງສະຫວັນນະເຂດ. ນອກຈາກນັ້ນ, ຍັງມີນັກກິລາມາຈາກປະເທດໄທ. ຂະນະທີ່ສະໂມສອນທີ່ເຂົ້າຮ່ວມມີ 7 ສະໂມສອນຄື: ສະໂມສອນໜອງບົວທອງ, ເອັສວີ ທີທີຊີ, ມີໂດ, ອາເລັກເຄື່ອງດາວ, ຊັ່ງຈ່ຽງ, ປກສ ຄໍາມ່ວນ ແລະ ສະໂມສອນ ທິບສະຫວັນ ໂອໂຕ, ໃນນັ້ນ ຍັງມີ 4 ໂຮງຮຽນເຂົ້າຮ່ວມຄື: ມສ ວຽງຈັນ, ມປ ວຽງຈັນ-ໂຮ່ຈິມິງ, ມສ ໂພນທັນ ແລະ ມສ ສາລາຄໍາ. ການແຂ່ງຂັນແບ່ງອອກເປັນ 7 ຮຸ່ນຄື: ຮຸ່ນອາຍຸບໍ່ເກີນ 14 ປີ ຍິງ-ຊາຍ, ຮຸ່ນອາຍຸບໍ່ເກີນ 18 ປີ ຍິງ-ຊາຍ, ຮຸ່ນທົ່ວໄປຊາຍ-ຍິງ ແລະ ຮຸ່ນອາວຸໂສ. ການແຂ່ງຂັນໄດ້ດໍາເນີນມາຮອດວັນທີ 28 ມັງກອນຜ່ານມາ ຈຶ່ງໄດ້ປິດລົງ ຜົນປາກົດວ່າ: ຮຸ່ນອາຍຸບໍ່ເກີນ 14 ປີຊາຍ ອັນດັບທີ 1 ໄທ; ອັນດັບທີ 2 ເອັສວີ ທີທີຊີ 4; ອັນດັບທີ 3 ເອັສວີ ທີທີຊີ 5 ແລະ ຫລວງພະບາງ; ສ່ວນຍິງ ອັນດັບທີ 1 ໄດ້ແກ່ ໄທ; ອັນດັບທີ 2 ເອັສວີ ທີທີຊີ 3; ອັນດັບທີ 3 ເອັສວີ ທີທີຊີ 5; ຮຸ່ນອາຍຸບໍ່ເກີນ 18 ປີຊາຍ ອັນດັບທີ 1 ໄດ້ແກ່ໄທ; ອັນດັບທີ 2 ເອັສວີ ທີທີຊີ 1; ອັນດັບທີ 3 ແຂວງຈໍາປາສັກ ແລະ ແຂວງຫລວງພະບາງ. ສ່ວນຍິງ ອັນດັບທີ 1 ໄດ້ແກ່ໄທ; ອັນດັບທີ 2 ເອັສວີ ທີທີຊີ 2; ອັນດັບທີ 3 ຫລວງພະບາງ; ສ່ວນຮຸ່ນທົ່ວໄປຊາຍ ອັນດັບທີ 1 ແຂວງຊຽງຂວາງ; ອັນດັບທີ 2 ໄທ 1; ອັນດັບທີ 3 ເອັສວີ ທີທີຊີ 1 ແລະ ຈໍາປາສັກ; ຍິງ ອັນດັບທີ 1 ເອັສວີ ທີທີຊີ 1; ອັນດັບທີ 2 ຫລວງພະບາງ; ອັນດັບທີ 3 ສະຫວັນນະເຂດ. ຂະນະທີ່ຮຸ່ນອາວຸໂສ ອັນດັບທີ 1 ອາເລັກເຄື່ອງດາວ; ອັນດັບທີ 2 ແຂວງຈໍາປາສັກ; ອັນດັບທີ 3 ຊັ່ງຈ່ຽງ ແລະ ທີມໜອງບົວທອງ.