ມະຫາວິທະຍາໄລຂອນແກ່ນມອບປະລິນຍາດຸສະດີບັນດິດກິດຕິມະສັກສາຂາການພົວພັນຕ່າງປະເທດໃຫ້ທ່ານນາຍົກລັດຖະມົນຕີ ທອງລຸນ ສີສຸລິດ

ວັນທີ 11 ເມສານີ້, ມະຫາວິທະຍາໄລຂອນແກ່ນ ລາຊະອານາຈັກໄທໄດ້ມອບປະລິນຍາດຸສະດີບັນດິດກິດຕິມະສັກສາຂາການພົວພັນຕ່າງປະເທດໃຫ້ແກ່ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ຊຶ່ງພິທີມອບປະລິຍານດັ່ງກ່າວໄດ້ມີຂຶ້ນທີ່ສຳນັກງານນາຍົກລັດຖະມົນຕີ, ໂດຍທ່ານ ກິດຕິໄຊ ໄຕຣຣັດສິຣິໄຊ ອະທິການບໍດີມະຫາວິທະຍາໄລຂອນແກ່ນເປັນຜູ້ມອບ, ມີຮອງນາຍົກລັດຖະມົນຕີ ແລະ ຄະນະອາຈານຈາກມະຫາວິທະຍາໄລດັ່ງກ່າວເຂົ້າຮ່ວມເປັນຈຳນວນຫຼາຍ.

ໂອກາດນີ້, ທ່ານ ນາຍົກໄດ້ສະແດງຄວາມຂອບໃຈຕໍ່ຄະນະອະທິການບໍດີ ແລະ ຄູອາຈານມະຫາວິທະຍາໄລຂອນແກ່ນ, ທີ່ໄດ້ມອບປະລິນຍາດັ່ງກ່າວໃຫ້, ຊຶ່ງຖືເປັນກຽດຢ່າງສູງ, ທັງເປັນການໃຫ້ກຳລັງໃຈສືບຕໍ່ປະຕິບັດໜ້າທີ່ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງຊາດ ລາວ-ໄທ ແລະ ອວຍ ພອນໃຫ້ຄະນະບໍດີ ແລະ ຄູອາຈານຈາກມະຫາວິທະຍາໄລຂອນແກ່ນຈົ່ງມີແຕ່ຄວາມສຸກຄວາມຈະເສີນ, ສຳເລັດໃນໜ້າທີວຽກງານ.

ອະທິການບໍດີ ມະຫາວິທະຍາໄລຂອນແກ່ນກ່າວໃນພິທີວ່າ: ຖືເປັນປະຫວັດສາດສຳຄັນໜຶ່ງຂອງມະຫາວິທະຍາໄລຂອນແກ່ນມີມະຕິຕົກລົງມອບປະລິນຍາດຸສະດີບັນດິດກິດຕິມະສັກສາຂາການພົວພັນຕ່າງປະເທດໃຫ້ແກ່ ທ່ານ ນາຍົກລັດຖະມົນຕີ ທອງລຸນ ສີສຸລິດ ເປັນປະລິນຍາທີ່ມະຫາວິທະຍາໄລຂອນແກ່ນມອບໃຫ້ແກ່ບຸກຄົນທີ່ມີຄວາມຮູ້, ຄວາມສາມາດ, ປະສົບຜົນສຳເລັດຢ່າງດີເລີດໃນວິຊາຊີບ ແລະ ເປັນກຽດຕິຄຸນດີເດັ່ນ ແລະ ເປັນແບບຢ່າງຂອງການອຸດທິດຕົນເພື່ອຜົນປະໂຫຍດສັງຄົມ ແລະ ເປັນຜູ້ທີ່ມີສ່ວນສຳຄັນໃນການສົ່ງເສີມການພົວພັນຮ່ວມມືໃນຫຼາຍລະດັບລະຫວ່າງ ສປປ ລາວ ກັບ ລາຊະອານາຈັກໄທ ແລະ ປະເທດອື່ນໆ, ນອກຈາກນີ້ທ່ານ ນາຍົກລັດຖະມົນຕີແຫ່ງ ສປປລາວ ຍັງໄດ້ສົ່ງເສີມການສ້າງເຄື່ອຂາຍຕາໜ່າງຄົມມະນາຄົມເຊື່ອມໂຍງລະຫວ່າງ ສປປລາວ ແລະ ລາ ຊະອານາຈັກໄທ, ເປັນຕົ້ນແມ່ນ: ການສ້າງຂົວມິດຕະພາບແຫ່ງທີ່ 3 ລະຫວ່າງແຂວງຄຳມ່ວນ ແລະ ຈັງຫວັດນະຄອນພະນົມ, ເສັ້ນທາງລົດໄຟລາວ-ໄທເຊື່ອມໂຍງຫວຽດນາມ, ລວມທັງສະໜັບສະໜູນການຮ່ວມມືໃນກອບອາຊຽນ, ຈົນໄດ້ຮັບສົມຍານາມວ່າ: ເປັນຜູ້ນຳຍຸກໃໝ່ທີ່ມີຄວາມຮູ້, ຄວາມສາມາດໃນລະດັບສາກົນ, ນອກຈາກຈະມີວິໄສທັດໃນການບໍລິຫານຢ່າງສຸກຂຸມແລ້ວ, ຍັງມີຄວາມຊ່ຽວຊານທາງດ້ານພາສາບໍ່ວ່າຈະເປັນພາສາໄທ, ອັງກິດ, ຝຣັ່ງ, ລັດເຊຍ ແລະ ຫວຽດນາມ, ສາມາດສົນທະນາກັບຜູ້ນຳຕ່າງຊາດໄດ້ຢ່າງຄ່ອງແຄ່ວ, ຊຶ່ງຄວາມຮູ້ ແລະ ຄວາມສາມາດດັ່ງກ່າວໄດ້ສົ່ງເສີມທັກສະການບໍລິຫານປະເທດໄດ້ຢ່າງໂດດເດັ່ນ, ມັນສະແດງອອກໃນນະໂຍບາຍຕ່າງໆທີ່ສົ່ງເສີມຄວາມສຳພັນກັບຫຼາຍປະເທດໃນໂລກ, ລວມທັງການຮ່ວມມືລະຫວ່າງປະຊາຄົມອາຊຽນ,ດັ່ງນັ້ນສະພາບໍລະຫານມະຫາວິທະຍາໄລຂອນແກ່ນຈຶ່ງມີມະຕິຕົກລົງເຫັນດີຍົກຍ້ອງໃຫ້ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປລາວ ໄດ້ຮັບປະລິນຍາດຸສະດີບັນດິດກິດຕິມະສັກສາຂາການພົວພັນຕ່າງປະເທດ ປະຈຳປີການສຶກສາ 2558 ເພື່ອເປັນກຽດແກ່ວົງຕະກຸນ.