ຮອງນາຍົກລັດຖະມົນຕີ ບຸນທອງ ຈິດມະນີ ເຄື່ອນໄຫວຢ້ຽມຢາມເມືອງກະລຶມ
ເມື່ອອາທິດຜ່ານມານີ້, ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງກະລຶມ ໂດຍການຕ້ອນຮັບຈາກຄະນະນຳເມືອງກະລຶມດ້ວຍຄວາມອົບອຸ່ນ.
ທ່ານ ບຸນໄຫລ ບຸດຕະວົງ ເຈົ້າເມືອງກະລຶມ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງໃຫ້ທ່ານຮອງນາຍົກຊາບວ່າ: ຕະຫລອດໄລຍະຜ່ານມາ ເມືອງຂອງຕົນສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂະຫຍາຍຕົວຢ່າງຕໍ່ເນື່ອງ, ການຂຸດຄົ້ນລາຍຮັບເຂົ້າງົບປະມານຂອງລັດບັນລຸໄດ້ລື່ນແຜນການທີ່ວາງໄວ້, ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 14% ສະເລ່ຍຕໍ່ຫົວຄົນບັນລຸໄດ້ 5,77 ລ້ານກີບ ຫລື ເທົ່າກັບ 722 ໂດລາສະຫະລັດຕໍ່ຄົນຕໍ່ປີ, ຮັບປະກັນການເບີກຈ່າຍເງິນເດືອນໃຫ້ພະນັກງານ-ລັດຖະກອນ, ກຳລັງ ປກສ-ປກຊ, ພະນັກງານບຳນານໄດ້ເປັນປົກກະຕິທຸກໆເດືອນ ຕິດພັນກັບການສົ່ງເສີມການປະຢັດ ແລະ ຕ້ານການຟຸມເຟືອຍ ສາມາດຫລຸດຜ່ອນການຊິ້ນເປືອງງົບປະມານຂອງລັດໃນພາກລາຍຈ່າຍລົງຢ່າງຈະແຈ້ງ, ຂະບວນການຜະລິດ, ການປູກ-ການລ້ຽງຂອງປະຊາຊົນບັນດາເຜົ່າໄດ້ຮັບການຂະຫຍາຍຕົວດີຂຶ້ນເລື້ອຍໆ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ເນັ້ນໃຫ້ຄະນະນຳທຸກຂັ້ນຂອງເມືອງ ແລະ ແຂວງສືບຕໍ່ເອົາໃຈໃສ່ບາງບັນຫາສຳຄັນຄື: ໃຫ້ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບຢູ່ລຽບຕາມຂອບເຂດຊາຍແດນຢ່າງເຂັ້ມງວດ, ປຸກລະດົມປະຊາຊົນເອົາໃຈໃສ່ໃນການປູກ-ການລ້ຽງ ເພື່ອສ້າງລາຍຮັບອັນຕົ້ນຕໍໃຫ້ແກ່ຄອບຄົວ, ປັບປຸງຊີວິດການເປັນຢູ່ຂອງຄອບຄົວຫລຸດພົ້ນອອກຈາກຄວາມທຸກຍາກ, ເອກະພາບກັນແບ່ງຄວາມຮັບຜິດຊອບລະຫວ່າງແຂວງກັບເມືອງໃຫ້ມີຄວາມເໝາະສົມກັບວຽກງານຕົວຈິງ, ເອົາໃຈໃສ່ປະຕິບັດຄຳສັ່ງເລກທີ 15/ນຍ ໃຫ້ເຂັ້ມງວດ, ສືບຕໍ່ສຶກສາອົບຮົມການເມືອງແນວຄິດໃຫ້ບັນດາຖັນແຖວພະນັກງານ ພ້ອມທັງສືບຕໍ່ກໍ່ສ້າງ ແລະ ຂະຫຍາຍພັກໃຫ້ເຂັ້ມແຂງປອດໃສຂາວສະອາດ, ກໍ່ສ້າງພະນັກງານສືບທອດປ່ຽນແທນແຕ່ລະຂັ້ນຢ່າງເປັນປົກກະຕິ, ເອົາໃຈໃສ່ຕິດຕາມກວດກາການປະຕິບັດພາກລາຍຮັບ-ລາຍຈ່າຍງົບປະມານ ແລະ ການຕ້ານການສໍ້ລາດບັງຫລວງໃຫ້ມີຄວາມເຂັ້ມແຂງກວ່າເກົ່າ.
ພ້ອມດຽວກັນນີ້, ທ່ານຮອງນາຍົກລັດຖະມົນຕີ ຍັງໄດ້ມອບອຸປະກອນຮັບໃຊ້ໃນຫ້ອງການຈຳນວນໜຶ່ງໃຫ້ເມືອງດັ່ງກ່າວ ເພື່ອອຳນວຍຄວາມສະດວກໃນການເຄື່ອນໄຫວຈັດຕັ້ງປະຕິບັດວຽກງານຂອງຕົນດີຂຶ້ນ.
