ທ່ານຮູ້ບໍ່ ? ທ່ານໃດນໍາເອົາກິລາໝາກເສິກມາລາວ ແລະ ຄຸນປະໂຫຍດມີຫຍັງແດ່ ?

ພາຍຫຼັງການແຂ່ງຂັນກິລາໝາກເສິກລາຍການລະດັບສາກົນຢ່າງ ລາວໂອເພັນ 2018 ທີ່ຫາກໍປິດສາກລົງ​ໃນຕົ້ນເດືອນມັງກອນຜ່ານມາ. ດັ່ງນັ້ນ, ທີມງານໜັງສືພິມ ລາວ​ພັດທະນາ ຈຶ່ງໄດ້ນໍາເອົາທີ່ມາຂອງກິລາຊະນິດນີ້ມີ​ຄວາມເປັນມາແນວໃດ, ທ່ານໃດນໍາເອົາກິລາຊະນິດນີ້ມາໃນລາວ ແລະ 13 ຄຸນປະໂຫຍດຈາກກິລາຊະນິດນີ້ມີຫຍັງແດ່ ໃຫ້ຜູ້ອ່ານໄດ້ຮູ້ນໍາກັນ.

ກິລາໝາກເສິກຄ້າຍກັບໝາກດ້າມໃນບ້ານເຮົາ ຄືເປັນກະດານຂະໜາດ 8X8 ຕາກະໂລ ທີ່ສີຕ່າງກັນສະລັບກັນ ໃນແນວນອນມີອັນສອນ A-H ຢູ່ໃນລະຊ້ອງ ແລະ ມີເລກ 1-8 ກໍາກັບແຕ່ລະຊ່ອງໃນແນວຕັ້ງ ເຊິ່ງມີລັກສະນະຈໍາລອງຈາກສົງຄາມ ໃນການຫຼິ້ນລະຫວ່າງ 2 ຄົນ, ແຕ່ລະຝ່າຍຕ້ອງພະຍາຍາມບຸກຈົນຊາລາ ຫຼື ຕົວແມ່ຂອງອີກຝ່າຍບໍ່ສາມາດເດີນຕໍ່ໄປໄດ້ ໂດຍກະຕິກາ ແລະ ຕົວໝາກອື່ນຈະມີຄວາມສາມາດແຕກຕ່າງກັນແລ້ວແຕ່ລັກສະນະຂອງໝາກເສິກ.

ກິລາໝາກເສິກເຂົ້າມາມີບົດບາດ ແລະ ຖືກຫຼິ້ນໃນ ສປປ ລາວ ດົນພໍສົມຄວນ ກ່ອນທີ່ຈະນໍາເອົາກິລາຊະນິດນີ້ມາສອນ ແລະ ຖ່າຍທອດໃຫ້ກັບນ້ອງໆນັກຮຽນນັກສຶກສາ​ໃນ​ປີ 2010 ແລະ ສ້າງຕັ້ງເປັນສະຫະພັນກິລາໝາກເສິກຢ່າງເປັນທາງການ ໂດຍແມ່ນທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ທັງເປັນປະທານສະຫະພັນໝາກເສິກແຫ່ງຊາດລາວ ໄດ້ນໍາເອົາກິລາຊະນິດນີ້ເຂົ້າມາໃຫ້ກັບຄົນລາວໄດ້ຫຼິ້ນຢ່າງແຜ່ຫຼາຍ ແລະ ເປັນຂະບວນການຟົດຟື້ນ ພ້ອມທັງໄດ້ແຂ່ງຂັນລະດັບຊາດ, ລະດັບພາກພື້ນ ແລະ ສາກົນ ໂດຍສະເພາະໄດ້ບັນຈຸເຂົ້າກິລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ​ໃນປີ 2016 ຜ່ານມາ.

ທ່ານ ຄໍາມະນີ ອິນທິລາດ ໃນນາມປະທານກິລາໝາກເສິກ ໄດ້ໃຫ້ຄໍາເຫັນວ່າ: ສະຫະພັນກິລາໝາກເສິກແຫ່ງຊາດລາວ ໄດ້ຮັບການສ້າງຕັ້ງຂຶ້ນຢ່າງເປັນທາງການ​ໃນປີ 2010 ມາຮອດປັດຈຸບັນໄດ້ຮັບການຊີ້ນໍາຈາກຂັ້ນເທິງ ກໍຄືກະຊວງສຶກສາທິການ ແລະ ກິລາ ໂດຍສະເພາະແມ່ນ ກົມພາລະ ແລະ ສິລະປະສຶກສາ ແລະ ກົມກິລາລະດັບສູງ, ດ້ວຍຄວາມຕັ້ງໃຈ ແລະ ມີຄວາມຮັບຜິດຊອບສູງ ເຮັດໃຫ້ມີນັກກິລາແຕ່ລະພາກສ່ວນ, ແຕ່ລະຄົນ ໂດຍສະເພາະແມ່ນຢູ່ບັນດາໂຮງຮຽນ ແລະ ສະຖາບັນການສຶກສາຕ່າງໆ ໃນຂອບເຂດທົ່ວປະເທດ ອັນໄດ້ກາຍເປັນເງື່ອນໄຂໃຫ້ການພັດທະນາ ແລະ ການເຄື່ອນໄຫວຂອງນັກກິລາໝາກເສິກຢູ່ປະເທດເຮົາດໍາເນີນໄປນັບມື້ມີຄວາມກ້າວໜ້າ ແລະ ມີຄຸນນະພາບສູງຂຶ້ນ.

ປະທານສະຫະພັນໝາກເສິກແຫ່ງຊາດລາວ ກ່າວອີກວ່າ: ອັນທີ່ເປັນພື້ນຖານ ແລະ ພົນເດັ່ນກວ່າໝູ່ ແມ່ນພວກເຮົາໄດ້ເຮັດໃຫ້ທົ່ວສັງຄົມຮັບຮູ້ໄດ້ບົດບາດ, ຄວາມສໍາຄັນ, ກະຕິກາ ແລະ ບັນຍາກາດທີ່ໄດ້ຈາກການແຂ່ງຂັນກິລາໝາກເສິກ ແລະ ເຮັດໃຫ້ເກີດມີການຫຼິ້ນຢູ່ໃນແຕ່ລະບ່ອນນັບມື້ກວ້າງຂວາງ, ສະຫະພັນໄດ້ເອົາໃຈໃສ່ສ້າງຕັ້ງ ແລະ ຂະຫຍາຍຕາໜ່າງກິລາໝາກເສິກ ຢູ16 ເປັນຂັ້ນພື້ນຖານ ພ້ອມທັງສ້າງສະໂມສອນຢູ່ຂັ້ນແຂວງໄປພ້ອມໆກັນ ເພາະກິລາໝາກເສິກຈະເຮັດໃຫ້ຜູ້ຫຼິ້ນໄດ້ຄຸນປະໂຫຍດ ດັ່ງນີ້: 1. ມີຄວາມສໍານຶກ ແລະ ຄວາມຮັບຜິດຊອບ. 2. ມີການວາງແຜນ ແລະ ຮູ້ຄໍານວນທີ່ແນ່ນອນ. 3. ພັດທະນາຂະບວນການຄິດ. 4. ມີຄວາມສາມາດໃນການຄິດ. 5. ຄວາມສາມາດໃນການຫຼິ້ນເກມອື່ນໆ. 6. ທັກສະທາງສັງຄົມ, ການປະສົມຄວາມຮູ້, ມິດຕະພາບ ແລະ ຈິດໃຈ. 7. ມີຄວາມສຸກໃນການຮຽນຮູ້. 8. ເກີດຄວາມສໍາເລັດທາງການສຶກສາ. 9. ມິສະມາທິຫຼາຍຂຶ້ນ. 10. ການບໍລິຫານເວລາ.11. ທັກສະໃນຂອບ ແລະ ການຕັດສິນໃຈ. 12. ຄົ້ນພົບຈຸດອ່ອນ ແລະ ຈຸດແຂງ ​ແລະ 13. ສາມາດນໍາໄປໃຊ້ໃນຊີວິດຈິງໃນການຕັດສິນໃຈທີ່ເດັດຂາດ ແລະ ຖືກຕ້ອງ.