ເມສຊີ ຫວຽດນາມ ຄົນໃໝ່ ກາຍເປັນ ນັກເຕະປາຍແຫລມຂອງອາຊຽນ
ນາທີນີ້ຕ້ອງຍົກໃຫ້ ຫງວຽນ ກວາງ ໄຮ (Nguyen Quang Hai) ກອງກາງອະນາຄົດໄກຂອງ ທີມຊາດຫວຽດນາມ ຮຸ່ນອາຍຸບໍ່ເກີນ 23 ປີ ເມື່ອຍິງໄປແລ້ວ 4 ປະຕູ ໃນການແຂ່ງຂັນບານເຕະຊາຍຊີງແຊ້ມອາຊີ 2018 U-23 ຈົນຊ່ວຍໃຫ້ ຫວຽດນາມ ສ້າງປະຫວັດສາດໜ້າໃໝ່ໃຫ້ກັບວົງການບານເຕະອາຊຽນ ດ້ວຍການຜ່ານເຂົ້າຮອບຊີງຊະນະເລີດໄດ້ເປັນຄັ້ງທຳອິດ ແລະ ເປັນຄວາມຫວັງຂອງອາຊຽນໃນການລຸ້ນແຊ້ມຕໍ່ໄປ.
ຫງວຽນ ກວາງ ໄຮ ເກີດເມື່ອວັນທີ 12 ເມສາ 1997 ປັດຈຸບັນອາຍຸພຽງ 20 ປີ, ຄວາມສູງ 168 ຊັງຕີແມັດ ແລະ ເກີດທີ່ດົງອັນ ນະຄອນຫລວງຮ່າໂນ້ຍ ປະເທດຫວຽດນາມ, ຫລິ້ນຕຳແໜ່ງກອງກາງເປັນຫລັກ ແລະ ເປັນນັກເຕະທີ່ລຶ້ງຊ້າຍ ເຮັດໃຫ້ປັດຈຸບັນໄດ້ສາຍາວ່າ ເມສຊີ ຫວຽດນາມ ເຊິ່ງເລີ່ມຫລິ້ນກັບສະໂມສອນເຍົາວະຊົນຮ່າໂນ້ຍມາແຕ່ປີ 2006 ຈົນມາເຖິງປີ 2015 ລົງຫລິ້ນໃຫ້ກັບ ໄຊງ່ອນ ເອັຟຊີ ໃນຊຸດໃຫຍ່ ລົງແຂ່ງຂັນ 13 ນັດ ຍິງໄດ້ 4 ປະຕູ ແລະ ປີ 2016 ກັບມາຫລິ້ນໃຫ້ກັບ ຮ່າໂນ້ຍ ເອັຟຊີ ລົງ 38 ນັດ ຍິງໄດ້ 8 ປະຕູ.
ສ່ວນຜົນງານໃນທີມຊາດຕິດ U-16 ໃນປີ 2011, 2014 ແລະ 2017, ຕິດທີມຊາດຫວຽດນາມ U-20 ລົງແຂ່ງ 15 ນັດ ຍິງ 1 ປະຕູ ແລະ 2017 ຕິດທີມຊາດ U-23 ລົງສະໜາມ 18 ນັດ ຍິງໄດ້ 7 ປະຕູ. ສ່ວນຜົນງານໃນປີ 2018 ຂອງທີມຊາດຫວຽດນາມ U-23 ໃນເສື້ອໝາຍເລກ 19 ລົງສະໜາມ 5 ນັດ ຍິງໄດ້ 4 ປະຕູ ຄືຍິງໄດ້ 1 ປະຕູ ນັດທີ່ ຫວຽດນາມ ເສຍໃຫ້ ສ.ເກົາຫລີ 1-2, ຍິງໄດ້ 1 ປະຕູ ໃນນັດທີ່ຊະນະ ອົດສະຕຣາລີ 1-0 ແລະ ຍິງໄດ້ອີກ 2 ປະຕູ ໃນນັດທີ່ຊະນະ ກາຕາ 6-5 ເຮັດໃຫ້ ຫງວຽນ ກວາງ ໄຮ ຍຶດອັນດັບທີ 2 ຂອງດາວຍິງສູງສຸດໃນລາຍການນີ້ ຕາມຫລັງ Almoez Ali ກອງໜ້າທີມຊາດກາຕາ ທີ່ຍິງໄດ້ 6 ປະຕູໃນລາຍການນີ້ ເຊິ່ງ ຫງວຽນ ກວາງ ໄຮ ຍັງມີສິດຍິງໄດ້ອີກໃນນັດຊີງຊະນະເລີດທີ່ຈະພົບກັບ ອຸດສະເບກິດສະຖານ ໃນວັນທີ 27 ມັງກອນນີ້ ເວລາ 16:00 ໂມງ.
