ເທດສະການອາຫານລາວ 2018 ຈັດຂຶ້ນຢ່າງຟົດຟື້ນຕ້ອນຮັບປີທ່ອງທ່ຽວລາວ

ເທດສະການອາຫານລາວ 2018 (ຄັ້ງທີ 13), ພາຍໃຕ້ຄໍາຂວັນ “ສຸດຍອດອາຫານລາວ ຕ້ອນຮັບປີທ່ອງທ່ຽວລາວ 2018” ໄດ້ຈັດຂຶ້ນທີ່ສວນເຈົ້າອານຸວົງ ນະຄອນຫຼວງວຽງຈັນ, ຕັ້ງແຕ່ວັນທີ 24-27 ມັງກອນນີ້, ໂດຍສູນກາງສະຫະພັນແມ່ຍິງລາວ ຮ່ວມກັບສະມາຄົມນັກທຸລະກິດແມ່ຍິງລາວ ແລະ ໄດ້ຮັບທຶນສະໜັບສະໜູນຫຼາຍກວ່າ 50 ພາກສ່ວນ, ເພື່ອອະນຸລັກຮີດຄອງປະເພນີ ແລະ ອາຫານລາວໃຫ້ຢູ່ຄູ່ຊາດລາວຕະຫຼອດໄປ ແລະ ເປັນການສົ່ງເສີມການທ່ອງທ່ຽວລາວໃຫ້ບັນດາປະເທດອາຊຽນ ແລະ ຊາວໂລກໄດ້ຮັບຮູ້ຢ່າງກວ້າງຂວາງ, ສ້າງໂອກາດໃຫ້ແມ່ຍິງຜູ້ປະກອບການໃນຂະແໜງການປຸ່ງແຕ່ງອາຫານຢູ່ທ້ອງຖິ່ນ, ເຂດແຂວງຕ່າງໆ ໄດ້ເຂົ້າຮ່ວມຂາຍຜະລິດຕະພັນຂອງຕົນ ແລະ ໄດ້ແລກປ່ຽນບົດຮຽນ ແລະ ປະສົບການຕ່າງໆໃນການປຸງແຕ່ງອາຫານລາວທີ່ມີລົດຊາດດີເປັນທໍາມະຊາດ, ສ້າງຜະລິດຕະພັນຂອງຕົນໃຫ້ເປັນສິນຄ້າ ແລະ ສາມາດຕອບສະໜອງຕາມຄວາມຕ້ອງການຂອງຕະຫຼາດໄດ້ຢ່າງກວ້າງຂວາງ.

ໃນງານເທດສະການອາຫານລາວຄັ້ງນີ້, ມີຮ້ານວາງສະແດງ ແລະ ຂາຍອາຫານ, ເຄື່ອງດື່ມ, ຢ່າສະໝູນໄພ, ເຄື່ອງຫັດຖະກໍາຈາກພາຍໃນ ແລະ ຕ່າງປະເທດທັງໝົດ 180 ຮ້ານ, ໃນນັ້ນມີຮ້ານອາຫານ 134 ຮ້ານ, ຮ້ານຫັດຖະກໍາ ແລະ ກະສິກໍາ 22 ຮ້ານ ແລະ ຈາກສະຖານທູດຕ່າງໆອີກດ້ວຍ. ນອກນີ້ ເວລາ 16:00 ໂມງຂອງວັນທີ 27 ຈະມີການແຂ່ງຂັນປຸງແຕ່ງອາຫານ ພາຍໃຕ້ຫົວຂໍ້ “ການຄົ້ນຫາສຸດຍອດ “ແຊບ” ອາຫານລາວ ໂດຍຜ່ານຄະນໍ”.