ກອງທັບ ພ້ອມເຂົ້າຮ່ວມແຂ່ງຂັນ ລາວພຣີເມຍລີກ 2018
ສະໂມສອນກອງທັບ ເອັຟຊີ ຝຶກຊ້ອມເພື່ອກຽມຄວາມພ້ອມເຂົ້າຮ່ວມແຂ່ງຂັນບານເຕະລາວພຣີເມຍລີກ 2018 ທີ່ສະຫະພັນບານເຕະແຫ່ງຊາດ ຈະຈັດຂຶ້ນໃນຕົ້ນເດືອນກຸມພານີ້. ຂະນະທີ່ປີນີ້ໃຊ້ນັກກິລາທີ່ເຄີຍເຂົ້າຮ່ວມແຂ່ງຂັນເຕະບານສາຍ ກ ຫລື ດີວີຊັນ 1 ເຂົ້າຮ່ວມເສີມສະໂມສອນ ຫວັງສ້າງຜົນງານໂດດເດັ່ນໃນການແຂ່ງຂັນປີນີ້.
ທ່ານ ຖາວອນ ຫລວງຈັນດາວົງ ຜູ້ຈັດການທີມສະໂມສອນກອງທັບ ໃຫ້ສໍາພາດວ່າ: ພາຍຫລັງສໍາເລັດການແຂ່ງຂັນເຕະບານດີວີຊັນ 1 ທີ່ສະຫະພັນບານເຕະຈັດຂຶ້ນໃນປີ 2017 ແລະ ສາມາດຍາດໄດ້ອັນດັບທີ 1 ຂອງການແຂ່ງຂັນລາຍການດັ່ງກ່າວແລ້ວ ທາງຄະນະບໍລິຫານສະໂມສອນຂອງພວກເຮົາກໍໄດ້ປຶກສາ ແລະ ຕົກລົງກັນ ເພື່ອຄັດເລືອກເອົານັກກິລາທີ່ເປັນເປົ້າໝາຍບັນຈຸເຂົ້າສະໂມສອນ ແລະ ເລີ່ມຝຶກຊ້ອມເພື່ອກຽມຄວາມພ້ອມເຂົ້າຮ່ວມການແຂ່ງຂັນເຕະບານລາວພຣີເມຍລີກ 2018 ທີ່ຈະຈັດຂຶ້ນໃນຕົ້ນເດືອນກຸມພານີ້. ມາຮອດປັດຈຸບັນພວກເຮົາມີຄວາມພ້ອມ 70% ແລ້ວ ເພາະວ່າ ສະໂມສອນຂອງພວກເຮົາຍັງມີນັກກິລາທີ່ເປັນຕົວຫລັກທີ່ມີປະສົບການຫລາຍພໍສົມຄວນ. ນອກຈາກນັ້ນ, ຍັງມີນັກກິລາທີ່ເຄີຍເຂົ້າຮ່ວມແຂ່ງຂັນລາວພຣີເມຍລີກ 2016 ຜ່ານມາ ໂດຍສະເພາະທ້າວ ພິທັກ ກອງມະທີ, ທ້າວ ພູທອນ ອິນນາໄລ ແລະ ທ້າວ ແກ້ວວິຊຽນ ແກ້ວວິໄຊ ເຊິ່ງທັງ 3 ຄົນ ເປັນຜູ້ຫລິ້ນທີ່ມີຄວາມສໍາຄັນສໍາລັບສະໂມສອນຂອງພວກເຮົາ. ສໍາລັບການແຂ່ງຂັນບານເຕະລາວພຣີເມຍລີກປີນີ້ ພວກເຮົາຈະເນັ້ນສະເພາະນັກກິລາຮຸ່ນເຍົາວະຊົນສ່ວນຫລາຍ ແລະ ຈະເນັ້ນສະເພາະນັກເຕະລາວ ໂດຍຈະບໍ່ໃຊ້ນັກເຕະຕ່າງປະເທດເຂົ້າຮ່ວມສະໂມສອນ ທັງນີ້ເພື່ອເປີດໂອກາດໃຫ້ນັກເຕະຮຸ່ນສືບທອດໄດ້ມີໂອກາດສະແດງຄວາມສາມາດໃນການແຂ່ງຂັນລາຍການດັ່ງກ່າວ.
ປັດຈຸບັນສະໂມສອນກອງທັບ ເອັຟຊີ ໄດ້ຝຶກຊ້ອມຢູ່ສະໜາມກິລາກອງທັບ ຫລັກ 5 ເວລາ 16:00 ໂມງ ຂອງທຸກໆມື້.
