ຕຳຫລວດເມືອງສີໂຄດຕະບອງຈັບຜູ້ຄ້າຢາເສບຕິດຢູ່ບ້ານໜອງແຕ່ງໃຕ້ພ້ອມຂອງກາງຢາບ້າ 400 ກວ່າເມັດ
ເຈົ້າໜ້າທີ່ ປກສ ເມືອງສີໂຄດຕະບອງນະຄອນຫລວງວຽງຈັນ ໃຫ້ຮູ້ວ່າ: ເມື່ອທ້າຍອາທິດຜ່ານມານີ້, ເຈົ້າໜ້າທີ່ປາບປາມຢາເສບຕິດເມືອງໄດ້ສົມທົບກັບ ກຸ່ມໜອງໜ້ຽວ ລົງແກ້ໄຂເປົ້າໝາຍຄ້າຂາຍຢາເສບຕິດລາຍໜຶ່ງຢູ່ບ້ານໜອງແຕ່ງໃຕ້ເມືອງສີໂຄດຕະບອງນະຄອນຫລວງວຽງຈັນ, ຊຶ່ງສາມາດຈັບຕົວຜູ້ຕ້ອງຫາໄດ້ຄື: ທ້າວ ທອງສັກ ອາຍຸ 42 ປີຢູ່ບ້ານສອນພັນໄຊເມືອງປາກກະດິງ ແຂວງບໍລິຄໍາໄຊ, ພ້ອມຂອງກາງຢາບ້າ 400 ກວ່າເມັດ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີວ່າມີຄົນບໍ່ດີໄດ້ເຄື່ອນໄຫວຄ້າຂາຍຢາເສບຕິດຢູ່ສະຖານທີ່ກໍ່ສ້າງແຫ່ງໜຶ່ງເຂດບ້ານໜອງແຕ່ງໃຕ້, ຈຶ່ງໄດ້ຈັດກໍາລັງລົງຕິດຕາມກວດກາ ແລະ ຮູ້ວ່າ: ມີກຳມະກອນຊື່ທ້າວ ທອງສັກ ເປັນຫົວໂປ່ຄ້າຂາຍຢາເສບຕິດ, ຈຶ່ງນຳກຳລັງເຂົ້າຈັບຕົວໃນບ່ອນທີ່ຜູ້ກ່ຽວເຮັດວຽກ ແລະ ໄດ້ກວດຄົ້ນຫ້ອງພັກ ແລະ ພົບຢາບ້າຫລາຍກວ່າ 400 ເມັດ ຈຶ່ງໄດ້ຢຶດໄວ້ເປັນຫລັກຖານເພື່ອດຳເນີນຄະດີຕາມລະບຽບກົດໝາຍ ແລະ ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ໄດ້ເລີ່ມເສບຢາເສບຕິດມາແຕ່ປີ 2007 ໂດຍຊື້ຢານຳຫມູ່ຢູ່ເມືອງປາກກະດິງ, ຈາກນັ້ນໄດ້ຂຶ້ນມາເຮັດວຽກເປັນກໍາມະກອນຢູ່ນະຄອນຫລວງວຽງຈັນ, ຈຶ່ງໄດ້ເອົາຢາມາຂາຍໃຫ້ກຳມະກອນທີ່ເຮັດວຽກນຳກັນ ແລະ ຊາວໜຸ່ມໃນເຂດໃກ້ຄຽງ ແລະ ຖືກເຈົ້າໜ້າທີ່ຈັບຕົວດຳເນີນຄະດີ, ປັດຈຸບັນ, ເຈົ້າໜ້າທີ່ພວມຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດຳເນີນຄະດີຕາມລະບຽບກົດໝາຍ.
