ແຮງງານລາວຢູ່ໄທແສນກວ່າຄົນອາດຖືກສົ່ງກັບປະເທດຍ້ອນບໍ່ໄປຂຶ້ນທະບຽນແຮງງານ
ປັດຈຸບັນ, ໜ່ວຍງານກ່ຽວຂ້ອງຂອງປະເທດໄທພວມເລັ່ງກວດກາສັນຊາດແຮງງານໃນປະເທດ ແລະ ພົບວ່າຄົນລາວທີ່ໄປອອກແຮງງານຢູ່ໄທໂດຍບໍ່ຜ່ານທາງການ ຫລື ບໍລິສັດຈັດຫາງານຍັງມີຫລາຍກວ່າ 138 ພັນຄົນໃນຈຳນວນ1,6 ແສນຄົນທີ່ຍັງບໍ່ທັນໄດ້ຮັບການກວດກາສັນຊາດແຮງງານ ແລະ ໃນນີ້ມີແຮງງານຈຳນວນໜຶ່ງບໍ່ໄດ້ຂື້ນທະບຽນແຮງງານ, ເຊິ່ງເຫັນວ່າມີຄວາມສ່ຽງຕໍ່ການທີ່ຈະຖືກປັບໄໝຍ້ອນບໍ່ມີບັດ, ທັງໆທີ່ທາງການໄທໄດ້ໃຫ້ໂອກາດຕໍ່ແຮງງານຕ່າງດ້າວໄປຂື້ນທະບຽນແຮງງານຖືກຕ້ອງກ່ອນປີ 2017.
ເວບໄຊສໍານັກຂ່າວເດລີນິວຂອງໄທ ໄດ້ເຜີຍແຜ່ຂ່າວເມື່ອ 12 ມັງກອນນີ້ວ່າ: ທາງການໄທພວມເລັ່ງພິສູດສັນຊາດແຮງງານຕ່າງດ້າວ ແລະ ຕ້ອງໄປພິສູດສັນຊາດໃຫ້ແລ້ວທັນກຳນົດທີ່ສູນການຄ້າໄອທີສະແຄ, ຖະໜົນແຈ້ງວັດທະນະ ເຂດຫລັກ 4 ກຸງເທບມະຫານະຄອນ, ຫາກພິສູດສັນຊາດບໍ່ທັນຕາມກຳນົດ ກໍຈະບໍ່ສາມາດເຮັດວຽກຢູ່ໃນປະເທດໄທຕໍ່ໄປໄດ້ ແລະ ມາຮອດວັນທີ 12 ມັງກອນນີ້, ໄດ້ມີແຮງງານລາວມາພິສູດສັນຊາດພຽງແຕ່ 21.160 ຄົນ ແລະ ຍັງບໍ່ທັນມາພິສູດອີກຈໍານວນ 138.153 ຄົນ, ເຊິ່ງຈຳນວນແຮງງານເລົ່ານີ້ກຳລັງພົບບັນຫາຄວາມສ່ຽງທີ່ຈະບໍ່ໄດ້ເຮັດວຽກໃນໄທ ແລະ ອາດຖືກປັບໄໝຍ້ອນບໍ່ມີທະບຽນແຮງງານ, ເວບໄຊດັ່ງກ່າວລະບຸອີກວ່າ: ມີແຮງງານລາວຈໍານວນໜຶ່ງປອມແປງໜັງສືເດີນທາງເພື່ອກັບມາລາວ ແຕ່ບໍ່ພົ້ນສາຍຕາເຈົ້າໜ້າທີ່ໄທ ແລະ ປັດຈຸບັນ, ເຈົ້າໜ້າທີ່ໄທພວມເລັ່ງກວດກາແຮງງານຕ່າງດ້າວຕາມຈຸດຕ່າງໆໃນທົ່ວປະເທດເພື່ອແກ້ບັນຫາແຮງງານຕ່າງດ້າວທີ່ຜິດລະບຽບກົດໝາຍໃນປະເທດ.
ກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ປີ 2017 ຜ່ານມາ, ການປັບສະຖານະພາບແຮງງານລາວທີ່ອອກແຮງງານບໍ່ຖືກຕ້ອງຕາມກົດໝາຍຢູ່ປະເທດໃກ້ຄຽງເຮັດໄດ້ພຽງ 8.700 ກວ່າຄົນ, ໃນນີ້ໃນຂະແໜງກະສິກຳ 1.639 ຄົນ, ອຸດສາຫະກໍາ 2.666 ຄົນ ແລະ ບໍລິການ 4.399 ຄົນ.ສ່ວນແຮງງານທີ່ໄປຖືກຕ້ອງຜ່ານສູນ ແລະ ບໍລິສັດຈັດຫາງານໄປໄທ ແລະ ຍີ່ປຸ່ນມີ 40.862 ຄົນ.
