ບໍລິສັດລ້ານຊ້າງມິເນໂຣນສືບຕໍ່ສະໜັບສະໜູນວຽກງານຄຸ້ມຄອງສິ່ງແວດລ້ອມ
ເມື່ອບໍ່ດົນມານີ້, ບໍລິສັດ MMG ລ້ານຊ້າງມີເນໂຣນສ ລິມິເຕັດ (LXML) ໄດ້ລົງນາມບົດບັນທຶກຄວາມເຂົ້າໃຈ (MoU) ກັບກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃນການສະໜັບສະໜູນເພື່ອສ້າງຄວາມເຂັ້ມແຂງໃຫ້ແກ່ໜ່ວຍງານຄຸ້ມຄອງສິ່ງແວດລ້ອມ ແລະ ການສ້າງຕັ້ງຫ້ອງການຂອງໜ່ວຍງານດັ່ງກ່າວປະຈຳໂຄງການຂຸດຄົ້ນຄຳ-ທອງເຊໂປນທີ່ເມືອງວິລະບູລີແຂວງສະຫວັນນະເຂດ.
ການລົງນາມບົດບັນທຶກດັ່ງກ່າວລະຫວ່າງທ່ານ ລັດສະໝີ ວໍລະລາດ ຮອງຫົວໜ້າກອງຕິດຕາມກວດກາຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດ LXML.
ນັບຕັ້ງແຕ່ໂຄງການບໍ່ຄຳ-ທອງເຊໂປນ ເລີ່ມດຳເນີນງານໃນປີ 2003, ບໍລິສັດໄດ້ເປັນເຈົ້າການ ແລະ ເປັນແບບຢ່າງທີ່ດີໃນວຽກງານຄຸ້ມຄອງສິ່ງແວດລ້ອມ ແລະ ການປະຕິບັດຕາມມາດຕະຖານສາກົນໃນລາວ.
ທ່ານ ລັດສະໝີ ວໍລະລາດ ກ່າວວ່າ: ການສ້າງຄວາມອາດສາມາດໃນການຄຸ້ມຄອງສິ່ງແວດລ້ອມທີ່ຕິດພັນກັບການພັດທະນາຂະແໜງການບໍ່ແຮ່ແມ່ນມີຄວາມສຳຄັນຫລາຍ ແລະ ການຮ່ວມມືຄັ້ງນີ້ຈະຮັບປະກັນໃຫ້ພວກເຮົາມີປະສົບການໃນການຄຸ້ມຄອງ ແລະ ຕິດຕາມສິ່ງແວດລ້ອມຕະຫລອດໄລຍະການສຳຫລວດ, ຂຸດຄົ້ນ, ຜະລິດ ແລະ ພາຍຫລັງການປິດບໍ່.
ທ່ານ ສະໝານ ອະເນກາ ກ່າວວ່າ: ການຂຸດຄົ້ນແຮ່ຂອງບໍລິສັດແມ່ນສອດຄ່ອງກັບມາດຕະຖານສາກົນ ແລະ ປະກອບສ່ວນຕໍ່ການເສີມສ້າງຄວາມອາດສາມາດຂອງບຸກຄະລາກອນທີ່ເປັນຄົນລາວ ກໍຄືຊຸມຊົນທີ່ບໍລິສັດດຳເນີນງານຢູ່, ຜ່ານການຮ່ວມມືຄັ້ງນີ້, ບໍລິສັດຫວັງວ່າປະຊາຊົນຊາວເມືອງວິລະບູລີເກືອບ 40 ພັນຄົນຈະໄດ້ຮັບການປົກປ້ອງ, ຮັບຮູ້ກ່ຽວກັບວິທີການຮັບມືກັບບັນຫາດ້ານສິ່ງແວດລ້ອມ ແລະ ມີຊີວິດການເປັນຢູ່ທີ່ດີຂຶ້ນເທື່ອລະກ້າວ.
