ກອງປະຊຸມສະຫລຸບວຽກງານຍຸຕິທຳທົ່ວປະເທດປະຈຳປີ 2017

ກອງປະຊຸມສະຫລຸບວຽກງານຍຸຕິທຳທົ່ວປະເທດປີ 2017 ໄດ້ຈັດຂຶ້ນໃນວັນທີ 18 ມັງກອນນີ້ຢູ່ສູນຝຶກອົບຮົມລາວ-ຍີ່ປຸ່ນ (ITCT), ໂດຍການເປັນປະທານຂອງທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ, ເພື່ອຮັບຟັງລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເວດຖະກິດ-ສັງຄົມແຫ່ງຊາດ 5 ປີ (2016-2020) ຄັ້ງທີ VIII, ກໍຄືການຜັນຂະຫຍາຍມະຕິກອງປະຊຸມໃຫຍ່ຄັ້ງທີ IV ຂອງອົງຄະນະບໍລິຫານງານພັກກະຊວງຍຸຕິທຳ, ແຜນພັດທະນາວຽກງານຍຸຕິທຳ 5 ປີ (2016-2020) ແລະ ການເຄື່ອນໄຫວວຽກງານໃນປີຜ່ານມາ.

ທ່ານລັດຖະມົນຕີກະຊວງຍຸຕິທໍາ ກ່າວວ່າ: ປີຜ່ານມາ, ພະນັກງານ-ລັດຖະກອນ ແລະ ນັກກົດໝາຍໃນຂະແໜງການຍຸຕິທຳທົ່ວປະເທດຜ່ານຜ່າຄວາມຫຍຸ້ງຍາກຕ່າງໆ ເພື່ອເຮັດສຳເລັດໜ້າທີ່ການເມືອງຂອງຕົນທີ່ພັກ-ລັດຖະບານ ແລະ ປະຊາຊົນມອບໝາຍໃຫ້, ໂດຍສະເພາະໄດ້ເອົາໃຈໃສ່ຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍທິດທາງ, ແຜນການວຽກງານທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງຍຸຕິທຳ ແລະ ໄດ້ຖືສຳຄັນຕໍ່ວຽກງານສຶກສາອົບຮົມການ ເມືອງແນວຄິດ ເພື່ອໃຫ້ພະນັກງານ-ລັດຖະກອນມີຄວາມໜັກແໜ້ນເຂັ້ມແຂງ ແລະ ປອດໃສ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບຕໍ່ໜ້າທີ່ວຽກງານ, ບໍລິການຮັບໃຊ້ປະຊາຊົນດ້ວຍຄວາມວ່ອງໄວ, ໂປ່ງໃສ ແລະ ຍຸຕິທຳ.

ສຳລັບທິດທາງແຜນການຕໍ່ໜ້ານີ້,  ແມ່ນສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງ VIII), ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງຍຸຕິທຳ ແລະ ແຜນພັດທະນາວຽກງານຍຸຕິທຳ 5 ປີ ດ້ວຍການປະຕິບັດ 6 ແຜນງານ, 23 ໂຄງການໃຫ້ສຳເລັດຕາມຄາດໝາຍວາງໄວ້.