ພຸດທະໄຊ ໂຄຈະເລີນ ກອງກາງທີມຊາດລາວຊຸດໃຫຍ່ ຍ້າຍຮ່ວມສະໂມສອນ ນະຄອນປະຖົມ ຢູໄນເຕັດ ທີມຈາກໄທລີກ 4
ໃນຕວັນທີ 17 ມັງກອນ 2018 ເພສເຟສບຸກທາງການສະໂມສອນ ນະຄອນປະຖົມ ຢູໄນເຕັດ ທີມຈາກໄທລີກ 4 ໂຊນພາກຕາເວັນຕົກ ປະເທດໄທ ໄດ້ເປີດໂຕນັກກິລາສະໂມສອນ ນະຄອນປະຖົມ ຢູໄນເຕັດ ເຊິ່ງມີນັກເຕະລາວເຂົ້າຮ່ວມທີມ ຜົນປະກົດວ່າມີຊື່ ພຸດທະໄຊ ໂຄຈະເລີນ (ນາກະຕະ) ກອງກາງທີມຊາດລາວຊຸດໃຫຍ່ເຂົ້າຮ່ວມທີມ ດ້ວຍສັນຍາ 1 ປີ ພ້ອມສູ້ສຶກການແຂ່ງຂັນໄທລີກ 4 ໂຊນ ພາກຕາເວັນຕົກ ໃນລະດູການ 2018 , ເປັນນັກເຕະຄົນລາວ ຄົນທຳອິດທີ່ໄດ້ລົງຫລິ້ນໃຫ້ກັບສະໂມສອນ ນະຄອນປະຖົມ ຢູໄນເຕັດ ແລະ ເປັນໂກຕ້າອາຊຽນຂອງສະໂມສອນທີ່ຈະສົ່ງຊື່ເຂົ້າຮ່ວມໄທລີກ 4 ລະດູການ 2018. ປັດຈຸບັນ ພຸດທະໄຊ ໂຄຈະເລີນ ມີອາຍຸ 22 ປີ ເກີດໃນວັນທີ 29 ທັນວາ 1995 ທີ່ບ້ານສຸນັນທາ ເມືອງໄກສອນ ພົມວິຫານ ແຂວງສະຫວັນນະເຂດ ເຄີຍຫລິ້ນໃຫ້ທີມຊາດລາວມາຫລາຍຊຸດ ນັບແຕ່ຊຸດເຍົາວະຊົນຈົນເຖິງຊຸດໃຫຍ່. ພຸດທະໄຊ ກ່ອນຈະກ້າວເປັນນັກເຕະອາຊີບ ເຊິ່ງເປັນນັກເຕະເຍົາວະຊົນ ທີ່ມາຈາກສະໂມສອນ ເອສະຣາ ຫລິ້ນໃຫ້ກັບສະໂມສອນ ນັບຕັ້ງແຕ່ປີ 2007 ຈົນເຖິງປີ 2014, ປີ 2015 ຫລິ້ນໃຫ້ກັບສະໂມສອນ ຮວາງແອ໋ງອັດຕະປື ເອັຟຊີ, ປີ 2016 ຫລິ້ນໃຫ້ກັບສະໂມສອນ ລ້ານຊ້າງ ຢູໄນເຕັດ ພ້ອມພາທີມຄວ້າແຊ້ມ ລາວພຣີເມຍລີກ ແລະ ຮອງແຊ້ມ TOYOTA MEKONG CLUB CHAMPIONSHIP 2017, ປີ 2017 ຫລິ້ນໃຫ້ກັບ ສະໂມສອນ ທິບ ສະຫວັນ ເອັຟຊີ. ພຸດທະໄຊ ເປັນນັກເຕະລາວຄົນທີ 13 ທີ່ຫລິ້ນໃນລີກອາຊີບທີ່ປະເທດໄທ ເຊິ່ງມີນັກເຕະລາວທີ່ເຄີຍຫລິ້ນໃນລີກອາຊີບກ່ອນຫນ້ານັ້ນມີ: ລຳເນົາ ສິງໂຕ, ກັນລະຍາ ສີສົມຫວັງ, ຄຳແພງ ໄຊຍະວຸດທິ, ສຸກອາພອນ ວົງຈຽງຄຳ, ເກດສະດາ ສຸກສະຫວັນ, ແລມໂບ້ ໄຊຊະນະ, ໂສພາ ໄຊຊະນະ, ມະໂນລົມ ພົມສຸວັນ, ທານິນ ພັນທະວົງ, ພັດທະນາ ພົມມະເທບ, ທົດນີລາດ ສີບຸນເຮືອງ ແລະ ຈັນທະພອນ ແຫວນວົງສົດ. ມາຮອດປັດຈຸບັນ ໃນປີ 2018 ມີນັກເຕະລາວທີ່ໄດ້ເຊັນສັນຍາເປັນທາງການຮ່ວມສະໂມສອນຈາກໄທ ມີ 4 ຄົນ ປະກອບມີ ພັດທະນາ ພົມມະເທບ ສະໂມສອນ ຊົນບູຣິ ເອັຟຊີ ໄທລີກ 1, ທົດນີລາດ ສີບຸນເຮືອງ ສະໂມສອນ ສະຫມຸດການ ເອັຟຊີ ໄທລີກ 4 ຈັນທະພອນ ແຫວນວົງສົດ ສະໂມສອນ ນ່ານ ເອັຟຊີ ໄທລີກ 4 ແລະ ພຸດທະໄຊ ໂຄຈະເລີນ ສະໂມສອນ ນະຄອນປະຖົມ ຢູໄນເຕັດ ໄທລີກ 4 .
