Google ປັບໃຫ້ຄວາມໄວໃນການສະແດງຜົນໜ້າເວັບໄຊສົ່ງຜົນຕໍ່ອັນດັບການຄົ້ນຫາໃນໂທລະສັບ

ເວລາຄົ້ນຫາຂໍ້ມູນໃນ Google ທາງ Google ຈະມີການຮຽງລໍາດັບຜົນການຄົ້ນຫາຕາມຄຸນຄ່າຂອງເວັບໄຊໃຫ້ກົງກັບຄໍາຄົ້ນຫາຂອງເຮົາຫຼາຍທີ່ສຸດ ເຖິງວ່າ Google ຈະບໍ່ເຄີຍປະກາດກົດເກນຢ່າງຊັດເຈນວ່າໃຊ້ຫຍັງໃນການວັດຄຸນຄ່າ ແຕ່ນັກການຕະຫຼາດອອນລາຍສ່ວນໃຫຍ່ກໍເຂົ້າໃຈມັນເປັນຢ່າງດີ ເພາະການທີ່ໜ້າເວັບມີອັນດັບ Search ranking ເປັນອັນດັບຕົ້ນໆ ໂອກາດທີ່ຜູ້ຄົ້ນຫາຈະຄິກເພື່ອເຂົ້າຊົມກໍສູງຂຶ້ນຕາມໄປດ້ວຍ ຊຶ່ງຄົນໃນວົງການຈະເອີ້ນເຕັກນິກການເຮັດເວັບ​ໄຊໃຫ້ມີອັນດັບການຄົ້ນຫາດີໆນີ້ວ່າ ການເຮັດ SEO.

            ຫລ້າສຸດໃນ Blog ຂອງ Google ໄດ້ມີການປະກາດວ່ານັບແຕ່ເດືອນມັງກອນ 2018 ເປັນຕົ້ນໄປ “Speed Update”(ຄວາມໄວການສະແດງ) ຈະຖືກນໍາມາຄິດໃນການວັດຄຸນຄ່າຂອງຕົວເວັບໄຊນຳ. ແນວໃດກໍຕາມ ຈະສົ່ງຜົນສະເພາະຕໍ່ການຄົ້ນຫາຜ່ານອຸປະກອນພົກພາເທົ່ານັ້ນ.

Google ໄດ້ລະບຸວ່າ Speed Update ພັດທະນາຂຶ້ນມາ ເພື່ອສ້າງແຮງກະຕຸ້ນໃຫ້ເຈົ້າຂອງເວັບໄຊພະຍາຍາມປັບປຸງຕົວເວັບໄຊໃຫ້ມີປະສິດທິພາບທີ່ດີຂຶ້ນ ເພື່ອໃຫ້ຜູ້ຢ້ຽມຊົມໄດ້ຮັບປະສົບການໃນການເຂົ້າໃຊ້ງານເວັບໄຊທີ່ດີທີ່ສຸດ. ສໍາລັບຜູ້ພັດທະນາເວັບໄຊ ສາມາດໃຊ້ເຄື່ອງມືຂອງ Google ຢ່າງ PageSpeed Insights, Lighthouse ແລະ Chrome User Experience Report ຊ່ວຍໃນການເພີ່ມປະສິດທິພາບຂອງເວັບໄຊ.