ລັດຖະບານອອກດຳລັດວ່າດ້ວຍເບ້ຍລ້ຽງໃຫ້ນັກຮຽນຜູ້ທຸກຍາກ ແລະ ດ້ອຍໂອກາດ

ລັດຖະບານໄດ້ອອກດຳລັດເລກທີ 385/ລບ, ລົງວັນທີ 15 ທັນວາ 2017 ວ່າດ້ວຍເບ້ຍລ້ຽງນັກຮຽນຜູ້ທຸກຍາກ ແລະ ດ້ອຍໂອກາດໃນສາຍສາມັນສຶກສາ, ໂດຍມີຈຸດປະສົງເພື່ອພັດທະນາຊັບພະຍາກອນມະນຸດໃຫ້ທົ່ວເຖິງ, ດຳລັດດັ່ງກ່າວໄດ້ກຳນົດຫລັກການ ແລະ ລະບຽບການກ່ຽວກັບການສະໜອງເບ້ຍລ້ຽງໃຫ້ແກ່ນັກຮຽນຜູ້ທຸກຍາກ ແລະ ດ້ອຍໂອກາດໃນສາຍສາມັນສຶກສາ ເພື່ອໃຫ້ນັກຮຽນໄດ້ເຂົ້າເຖິງການສຶກສາຢ່າງເທົ່າທຽມກັນ, ແນ່ໃສ່ປະຕິບັດນະໂຍບາຍການສຶກສາພາກບັງຄັບຂອງລັດຖະບານ, ໂດຍສະເພາະແມ່ນນັກຮຽນທີ່ມາຈາກຄອບຄົວທຸກຍາກຂາດເຂີນ, ເດັກກຳພ້າ-ກຳພອຍ ຂາດທີ່ເພີ່ງພາອາໄສ, ນັກຮຽນຢູ່ເຂດຫ່າງໄກສອກຫລີກ, ຜູ້ພິການ, ນັກຮຽນຊົນເຜົ່າເພດຍິງ, ຜູ້ມີພອນສະຫວັນ ແລະ ຜູ້ຮຽນເກັ່ງ, ໂດຍໃຫ້ປະຕິບັດຕາມຫລັກການໃຫ້ສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງຢ່າງເຂັ້ມງວດ, ສອດຄ່ອງກັບແຜນພັດທະນາເສດຖະກິດ-ສັງຄົມ ແລະ ແຜນພັດທະນາການສຶກສາ, ໃຫ້ປະຕິບັດຕາມຂັ້ນຕອນ ແລະ ລະບຽບການກ່ຽວກັບການຄັດເລືອກນັກຮຽນທີ່ຈະຮັບເບ້ຍລ້ຽງ ເພື່ອໃຫ້ຖືກຕ້ອງຕາມເງື່ອນໄຂຕົວຈິງ ແລະ ມີຄວາມໂປ່ງໃສສາມາດກວດສອບໄດ້. ສຳລັບການສະໜອງເບ້ຍລ້ຽງໃຫ້ນັກຮຽນຊັ້ນປະຖົມແມ່ນ 100.000 ກີບຕໍ່ຄົນຕໍ່ເດືອນ ແລະ ນັກຮຽນຊັ້ນມັດທະຍົມຕອນຕົ້ນແມ່ນ 150.000 ກີບຕໍ່ຄົນຕໍ່ເດືອນ ແລະ ໃຫ້ປະຕິບັດຈົນກວ່ານັກຮຽນໄດ້ຮຽນຈົບຊັ້ນປະຖົມ ແລະ ມັດທະຍົມຕອນຕົ້ນ.