ອາເມລິກາຕັດເງິນຊ່ວຍເຫລືອ ປາແລັສຕິນ 65 ລ້ານໂດລາ
ລັດຖະບານວໍຊິງຕັນຈະບໍລິຈາກເງິນໃຫ້ການຊ່ວຍເຫລືອຊາວປາແລັສຕິນຜ່ານໜ່ວຍງານຂອງ UN ພຽງ 60 ລ້ານໂດລາສະຫະລັດ ໃນປີນີ້ ຈາກທີ່ເຄີຍຕັ້ງເປົ້າໄວ້ 125 ລ້ານໂດລາສະຫະລັດ.
BREAKING: Official: US withholds $65M from Palestinian refugee programs, saying UN agency requires 'fundamental re-examination'
— The Associated Press (@AP) January 16, 2018
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 16 ມັງກອນວ່າ: ກະຊວງການຕ່າງປະເທດອາເມລິກາອອກຖະແຫລງການໃນວັນທີ 16 ມັງກອນວ່າ: ການຈັດສັນງົບປະມານເພື່ອສະໜັບສະໜູນການດຳເນີນງານຂອງສຳນັກງານບັນເທົາທຸກ ແລະ ຈັດຫາງານຂອງສະຫະປະຊາຊາດສຳລັບຜູ້ລີ້ໄພປາແລັສຕິນໃນຕາເວັນອອກໃກ້ (UNRWA) ຈະຢູ່ທີ່ 60 ລ້ານໂດລາສະຫະລັດ ໃນປີນີ້, ແຕ່ອີກປະມານເຄິ່ງໜຶ່ງ ຫລື 65 ລ້ານໂດລາສະຫະລັດ ຈາກທີ່ເຄີຍຕັ້ງເປົ້າໄວ້ທັງໝົດ 125 ລ້ານໂດລາສະຫະລັດ ຈະຂໍຢຸດໄວ້ກ່ອນ.
ທັງນີ້, ທ່ານນາງ ຮີດເທີ ເນົາເອີ ໂຄສົກກະຊວງການຕ່າງປະເທດອາເມລິກາ ກ່າວເຖິງມາດຕະການດັ່ງກ່າວວ່າ: ບໍ່ແມ່ນເພື່ອເພີ່ມແຮງກົດດັນແກ່ປາແລັສຕິນຈາກກໍລະນີພິພາດເລື່ອງສະຖານະນະຄອນຫລວງເຢລູຊາເລມ, ແຕ່ລັດຖະບານວໍຊິງຕັນພຽງຕ້ອງການໃຫ້ສະມາຊິກສະຫະປະຊາຊາດ (UN) ປະເທດອື່ນ “ເພີ່ມການມີສ່ວນຮ່ວມ” ໃນການສະໜັບສະໜູນ ແລະ ປະຕິຮູບການເຮັດວຽກຂອງ UNRWA.
ຂະນະທີ່ທ່ານ ປິແອຣ ຄຣາເຮນບູລ ຜູ້ອຳນວຍການ UNRWA ກ່າວວ່າ: ເຖິງວ່າງົບປະມານ 60 ລ້ານໂດລາສະຫະລັດ ຈາກລັດຖະບານວໍຊິງຕັນຍັງຖືວ່າພຽງພໍຈະຊ່ວຍໃຫ້ໂຮງຮຽນ ແລະ ໂຮງໝໍໃນດິນແດນຂອງປາແລັສຕິນສາມາດດຳເນີນການຕໍ່ໄປໄດ້ “ອີກໄລຍະໜຶ່ງ”, ແຕ່ການສະໜັບສະໜູນທີ່ໄດ້ຮັບຈາກອາເມລິກາໃນປີນີ້ຖືວ່າໜ້ອຍລົງຫລາຍ ເມື່ອທຽບໃສ່ 350 ລ້ານໂດລາສະຫະລັດ ທີ່ລັດຖະບານວໍຊິງຕັນມອບໃຫ້ໃນປີຜ່ານມາ. ທ່ານ ຄຣາເຮນບູລ ຈຶ່ງຮຽກຮ້ອງໃຫ້ລັດຖະສະມາຊິກ UN ທີ່ເຫລືອມອບການສະໜັບສະໜູນໃຫ້ແກ່ໜ່ວຍງານແຫ່ງນີ້ ທີ່ຊ່ວຍເຫລືອປາແລັສຕິນມາແຕ່ປີ 1950.
