ລັດຖະບານອັງກິດປະຊຸມສຸກເສີນ ເລື່ອງບໍລິສັດກໍ່ສ້າງໃຫຍ່ລົ້ມລະລາຍ
ລັດຖະບານອັງກິດຈັດກອງປະຊຸມສຸກເສີນ ໃນວັນທີ 15 ມັງກອນ ເລື່ອງຄາຣິລລຽນ ບໍລິສັດກໍ່ສ້າງ ແລະ ບໍລິຫານອາຄານລາຍໃຫຍ່ຂອງປະເທດປະກາດລົ້ມລະລາຍກະທັນຫັນ ເນື່ອງຈາກບໍ່ສາມາດຂໍເງິນຊ່ວຍເຫລືອງວດສຸດທ້າຍຈາກລັດຖະບານ ແລະ ທະນາຄານ.
ຄາຣິລລຽນຮັບງານທັງພາກລັດ ແລະ ເອກະຊົນມູນຄ່າລວມ 1.700 ລ້ານປອນເຊັ່ນ: ທຳຄວາມສະອາດ ແລະ ຈັດກຽມອາຄານໃຫ້ໂຮງໝໍລັດ, ກໍ່ສ້າງ ແລະ ສ້ອມແປງເຮືອນພັກທະຫານ, ມີພະນັກງານທົ່ວໂລກ 43.000 ຄົນ. ມີລາຍງານວ່າ: ຄະນະກຳມະການຮັບມືເຫດສຸກເສີນຂອງອັງກິດ ເປັນເວລາ 1 ຊົ່ວໂມງໃນວັນທີ 15 ມັງກອນ ມີລັດຖະມົນຕີຈາກທຸກກະຊວງທີ່ກ່ຽວຂ້ອງເຂົ້າຮ່ວມ, ພະນັກງານຄາຣິລລຽນທີ່ເປັນຄົນອັງກິດ ແລະ ເຮັດວຽກໃນພາກເອກະຊົນຈະໄດ້ຮັບເງິນເດືອນຈົນເຖິງວັນ 24 ມັງກອນນີ້, ສ່ວນພະນັກງານທີ່ເຮັດວຽກໃນພາກລັດຈະໄດ້ຮັບເງິນເດືອນຕາມປົກກະຕິ ເປັນເງິນທີ່ລັດຖະບານຈັດສັນມາຈາກພາສີປະຊາຊົນ.
ຄາຣິລລຽນເລີ່ມສົ່ງສັນຍານນັບແຕ່ເດືອນກໍລະກົດປີກ່ອນວ່າ: ມີບັນຫາທາງການເງິນ, ແຕ່ລັດຖະບານອັງກິດຍັງໃຫ້ສຳປະທານໂຄງການໃຫຍ່ເຊັ່ນ: ໂຄງການລົດໄຟຄວາມໄວສູງ. ທ່ານ ເຈເຣມີ ຄໍບີນ ຫົວໜ້າພັກແຮງງານ ເຊິ່ງເປັນຝ່າຍຄ້ານ ກ່າວວ່າ: ການລົ້ມລະລາຍຂອງຄາຣິລລຽນຖືເປັນຈຸດປ່ຽນສຳຄັນ ເຖິງເວລາແລ້ວທີ່ຈະຕ້ອງຢຸດນະໂຍບາຍແປຮູບກິດຈະການໃຫ້ເປັນຂອງເອກະຊົນທີ່ເຮັດໃຫ້ບໍລິການສາທາລະນະເສຍຫາຍຮ້າຍແຮງ ແລະ ຂູດຮີດເງິນພາສີປະຊາຊົນໄປເປັນຈຳນວນມະຫາສານ.
ມີລາຍງານວ່າ: ຄາຣິລລຽນຕິດໜີ້ບໍລິສັດນ້ອຍໆ 30.000 ແຫ່ງ ສູງເຖິງ 1.000 ລ້ານປອນ, ແຕ່ຜູ້ບໍລິຫານພັດໄດ້ຄ່າຕອບແທນສູງແບບບໍ່ເໝາະສົມ. ທ່ານ ເດວິດ ລິດິງຕັນ ລັດຖະມົນຕີປະຈຳສຳນັກງານນາຍົກລັດຖະມົນຕີ ແຈ້ງຕໍ່ລັດຖະສະພາວ່າ: ທາງການຈະສອບສວນຜູ້ບໍລິຫານທັງອະດີດ ແລະ ປັດຈຸບັນ ຖ້າພົບວ່າມີຄວາມຜິດຈະຖືກລົງໂທດສະຖານໜັກ.
