ອາຫານແຕ່ລະຢ່າງຄວນເກັບມ້ຽນໄວ້ໃນຕູ້ເຢັນດົນປານໃດ

ທ່ານຮູ້ຫລືບໍ່ວ່າອາຫານແຕ່ລະຊະນິດທີ່ເກັບມ້ຽນໃນຕູ້ເຢັນກໍມີມື້ໝົດອາຍຸໄດ້ຄືກັນ.

– ອາຫານທີ່ປຸງແຕ່ງສຳເລັດແລ້ວ : ຫາກຢາກເກັບມ້ຽນໃນຕູ້ເຢັນ ຄວນແພັກໃສ່ກ່ອງ ຫລື ພາຊະນະທີ່ມີຝາອັດແໜ້ນໃຫ້ຮຽບ ຮ້ອຍ, ແຕ່ຖ້າອາຫານນັ້ນຍັງຮ້ອນຢູ່ກໍຄວນປ່ອຍໃຫ້ເຢັນລົງກ່ອນ. ແນວໃດກໍຕາມ, ຖ້າຫາກຢາກໃຫ້ເຢັນໄວຂຶ້ນກໍຍົກອາຫານໃນພາຊະນະໄປແຊ່ໃນນຳ້ເຢັນ.

– ອາຫານສົດ : ຫາກເປັນຊີ້ນສັດທີ່ຍັງສົດຢູ່ຈະມ້ຽນໄວ້ໃນຕູ້ເຢັນໄດ້ດົນ 2 – 5 ມື້, ແຕ່ຖ້າຫາກເປັນຊີ້ນສັດທີ່ສຸກແລ້ວຈະມ້ຽນໄວ້ໄດ້ດົນ 2 – 6 ມື້. ສ່ວນຊີ້ນສັດທີ່ສັບ ຫລື ບົດແລ້ວຈະມ້ຽນໄວ້ໄດ້ບໍ່ເກີນ 1 ມື້, ແຕ່ຖ້າເອົາໄປເຮັດໃຫ້ສຸກຈະຢູ່ໄດ້ 2 – 4 ມື້.

– ໄຂ່ : ຈະກົງກັນຂ້າມກັບຊີ້ນສັດ ເພາະໄຂ່ຈະມ້ຽນໄວ້ໄດ້ດົນ 3 – 4 ອາທິດ ເຊິ່ງຈະດົນກ່ວາໄຂ່ຕົ້ມສຸກທີ່ຢູ່ໄດ້ບໍ່ເກີນ 1 ອາທິດກໍຈະເລີ່ມມີກິ່ນແລ້ວ.

– ຜັກໃບ : ຈະມີໄລຍະໃນການມ້ຽນໄວ້ໃນຕູ້ເຢັນປະມານ 1 – 3 ມື້, ແຕ່ຖ້າເປັນຜັກປະເພດກະລໍ່າຈະຢູ່ໄດ້ດົນ 5 – 7 ມື້.

ສຳລັບໃນໄລຍະທີ່ອາກາດພາຍນອກຮ້ອນ ຄວນຟ້າວມ້ຽນອາຫານເຂົ້າຕູ້ເຢັນໃຫ້ໄວຂຶ້ນ ຫລື ທັນທີ ບໍ່ຄວນປະອາຫານໄວ້ຂ້າງ ນອກຕູ້ເຢັນດົນເກີນໄປ ເພາະເຊື້ອພະຍາດໃນອາກາດອາດຈະລອຍມາປະສົມກັບອາຫານໄດ້ ແລະ ປະຕູຂອງຕູ້ເຢັນກໍບໍ່ຄວນເປີດໆ – ປິດໆເລື້ອຍໆ ຍິ່ງໄປກ່ວານັ້ນຄວນປັບອຸນຫະພູມພາຍໃນຕູ້ເຢັນໃຫ້ມີຄວາມເຢັນຍິ່ງຂຶ້ນນຳ.

ຮູ້ແນວນີ້ແລ້ວ ກໍຢ່າມ້ຽນອາຫານໄວ້ໃນຕູ້ເຢັນດົນຈົນເກີນໄປ ເພາະອາດຈະເຮັດໃຫ້ອາຫານໝົດອາຍຸ ແລະ ກິນເຂົ້າໄປແລ້ວບໍ່ໄດ້ຄຸນຄ່າຂອງອາຫານນຳອີກ. ຖ້າຈະໃຫ້ດີແທ້ ເມື່ອທ່ານຈະໄປຕະຫລາດໄປຊື້ອາຫານແຕ່ລະຊະນິດ ກໍຄວນຊື້ສະເພາະແຕ່ຈະເກັບໄວ້ກິນປະມານ 1 – 2 ມື້ເທົ່ານັ້ນ ເມື່ອໝົດແລ້ວຈຶ່ງໄປຊື້ມາໃໝ່ ບໍ່ຄວນຊື້ມາມ້ຽນໃນຕູ້ເຢັນຫລາຍໆ ເພາະຍິ່ງແຊ່ໄວ້ດົນ ຄຸນຄ່າສານອາຫານ ແລະ ຄວາມສົດໃໝ່ກໍຍິ່ງຫລຸດລົງ.