ນະຄອນຫຼວງເລັ່ງແກ້ປັນຫາຄວາມແອອັດ ສ້າງເປັນເມືອງໜ້າຢູ່
ໃນກອງປະຊຸມສະໄໝສາມັນ, ເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I. ເຈົ້າຄອງນະຄອນຫຼວງວຽງຈັນກ່າວວ່າ: ວຽກງານຈຸດສຸມຂອງນະຄອນຫຼວງວຽງຈັນທີ່ຈະເຮັດໃນປີ2018ແມ່ນຈະເພີ່ມທະວີການປົກປັກຮັກສາຄວາມສະຫງົບແລະຄວາມເປັນລະບຽບຮຽບຮ້ອຍໃນສັງຄົມ, ໂດຍປະຕິບັດໂຄງການ ສ ສະຫງົບສຸກ ທັງຮັບປະກັນການຈະລາຈອນສະດວກສະບາຍ, ແກ້ໄຂສະພາບລົດຕິດໃຫ້ຫຼຸດລົງ,ຮັກສາຄວາມປອດໄພສາທາລະນະ; ສ້າງນະຄອນຜາສຸກ, ປ້ອງກັນ ແລະ ແກ້ໄຂອັກຄິໄພ, ຫຼຸດໄພຢາເສບຕິດ ແລະ ແກ້ໄຂປະກົດການຫຍໍ້ທໍ້ຂີ້ລັກງັດແງະ, ປຸ້ນຈີ້ຊີງຊັບແລະບັນຫາອື່ນໆໃຫ້ໝົດໄປ.
ໄປຄຽງຄູ່ກັນນັ້ນກໍ່ສືບຕໍ່ຜັນຂະຫຍາຍວີໄສທັດ ສ້າງເມືອງວຽງຈັນໃຫ້ເປັນເມືອງໜ້າຢູ່ແລະຍືນຍົງ ເຊິ່ງແຜນວຽກຕົ້ນຕໍແມ່ນການຈັດສັນຄວາມເປັນລະບຽບຮຽບຮ້ອຍໃນຕົວເມືອງໃຫ້ເປັນຮູບປະທຳ, ຊຸກຍູ້ໂຄງການວຽງຈັນສະອາດແລະສີຂຽວເຮັດໃຫ້ຂະບວນການນີ້ຖືກຈັດຕັ້ງປະຕິບັດຢ່າງຕໍ່ເນື່ອງແລະປະຕິບັດໃນທຸກຄອບຄົວ, ທຸກບ້ານແລະທຸກເມືອງ, ທຸກພະແນກ, ລວມທັງສຳນັກງານອົງການຕ່າງໆ ປະຕິບັດຂໍ້ຕົກລົງວ່າດ້ວຍການຈັດສັນຄວາມເປັນລະບຽບຮຽບຮ້ອຍໃນຕົວເມືອງແລະຊານເມືອງໃຫ້ມີຄວາມຈົບງາມແລະປອດໄພດີ; ນອກຈາກນີ້ ແມ່ນການສ້ອມແປງເສັ້ນທາງຕ່າງໆ, ໂຄງການຕະຝັ່ງເຈື່ອນແຄມຂອງໄລຍະ 2, ການປັບປຸງບູລະນະອົງພະທາດຫຼວງ, ຮ່ອງລະບາຍນ້ຳແລະຈັດສັນຕ່າງໆໃຫ້ຈົບງາມລວມທັງ ແຜນການຍົກຍ້າຍສຳນັກງານຢູ່ເມືອງໃນໄປຢູ່ເມືອງນອກເທື່ອລະກ້າວ ແລະ ມີອີກຫຼາຍນ້າວຽກທີ່ຈະຕ້ອງສືບຕໍ່ເຮັດເພື່ອແກ້ໄຂສະພາບແອອັດໃຫ້ເປັນຈິງ.
