ຄ່າໂດຍສາຍໃຕ້ຍັງຮັກສາລາຄາເດີມ, ພ້ອມເນັ້ນຄວາມປອດໄພ 

ປັດຈຸບັນຄ່າໂດຍສານຂອງສະຖານີຂົນສົ່ງສາຍໃຕ້ຍັງຮັກສາລາຄາເດີມ ດັ່ງທີ່ເຄີຍປະຕິບັດມາ, ໂດຍສະເພາະ ສາຍທາງ ວຽງຈັນ-ຫລັກ 20 ລາຄາ 85 ພັນກີບ, ວຽງຈັນ-ທ່າແຂກ ມີ 3 ປະເພດລົດຄື: ທຳມະດາ 60 ພັນກີບ, ລົດດ່ວນ 70 ພັນກີບ ແລະ ລົດສາຍພິເສດ 80 ພັນກີບ, ວຽງຈັນ-ສະຫວັນ ປະກອບມີ 3 ປະເພດຄື: 75 ພັນກີບ, 90 ພັນກີບ ແລະ 120.000 ກີບ, ສ່ວນສາຍທາງວຽງຈັນ-ປາກເຊ ປະ ກອບມີ: 110.000 ກີບ, 140.000 ກີບ ແລະ 170.000 ກີບ ແລະ ວຽງຈັນ-ຊຽງຂວາງ ປະກອບ ມີ: 110.000 ກີບ, 130.000 ກີບ ແລະ 150.000 ກີບ. ສຳລັບສາຍທາງ ອື່ນໆແມ່ນຈະມີປ້າຍບອກລາຄາ ຕິດໄວ້ປ່ອງຊື້ປີ້ຂອງສະຖານີ ຢ່າງລະອຽດຄົບຖ້ວນ, ເພື່ອຄວາມໂປ່ງໃສ ແລະ ສະດວກໃຫ້ຜູ້ເຂົ້າໃຊ້ບໍລິການ.

ທ່ານ ວັນເພັນ ສີສຸກ ຜູ້ອຳນວຍການສະຖານີຂົນສົ່ງໂດຍສານສາຍໃຕ້ ແລະ ຕ່າງປະເທດ ໃຫ້ສຳພາດຕໍ່ສື່ມວນຊົນໃນວັນທີ 7 ເມສານີ້ວ່າ: ປັດຈຸບັນ ກໍຢູ່ໃນໄລຍະກະກຽມໃຫ້ແກ່ການສະເຫລີມສະຫລອງບຸນປີໃໝ່ລາວ, ຊຶ່ງຈະມີຜູ້ເດີນທາງຜ່ານລົດໂດຍສານເພື່ອຢ້ຽມຢາມຄອບຄົວພໍແມ່ ແລະ ສະຫລອງບຸນປີໃໝ່ຢູ່ທ້ອງຖິ່ນຕ່າງໆ, ດັ່ງນັ້ນ ທາງສະຖານີຂົນສົ່ງໂດຍສານສາຍໃຕ້ ໃນຖານະຜູ້ໃຫ້ບໍລິການລົດຂົນສົ່ງໂດຍສານພາກ ກາງ ແລະ ພາກໃຕ້ ໄດ້ມີຄວາມພ້ອມເຕັມ 100% ແລະ ໄດ້ເພີ່ມຈຳນວນຂຶ້ນຕື່ມຈາກ 30 ຄັນ ໃນໄລຍະປົກກະຕິມາເປັນທົບເທົ່າ, ເພື່ອສາມາດຮອງຮັບຈຳນວນຜູ້ໂດຍສານທີ່ຈະເພີ່ມຂຶ້ນ, ຊຶ່ງໃນໄລຍະສົງການປີຜ່ານມາ, ມີຜູ້ມາໃຊ້ບໍລິການຫລາຍແຕ່ 3-4 ພັນຄົນ ແລະ ຄາດວ່າໃນປີນີ້ຈະມີຈຳນວນເພີ່ມຂຶ້ນ ຈະຫລາຍກວ່າປີຜ່ານມາຢ່າງແນ່ນອນ, ດັ່ງນັ້ນ ຂໍຮຽກຮ້ອງມາຍັງຜູ້ໂດຍສານທຸກຄົນ ຄວນມາຂຶ້ນລົດຢູ່ທີ່ສະຖານີໂດຍກົງ, ເພື່ອຫລີກລ້ຽງການຂຶ້ນລາຄາໂດຍສານແບບບໍ່ ເປັນທາງການຂອງຜູ້ປະກອບການ ແລະ ອາດຈະໄດ້ນັ່ງຕັ່ງເສີມທີ່ບໍ່ຮັບປະກັນ.

ທ່ານຜູ້ອຳນວຍການ ໃຫ້ຮູ້ອີກວ່າ: ຕາມລະບຽບການແລ້ວ ການນຳເອົາວັດຖຸສິ່ງ ຂອງຂຶ້ນໄປໄວ້ຫລັງຄາລົດຂົນສົ່ງໂດຍສານນັ້ນແມ່ນບໍ່ໃຫ້ສູງເກີນ 60 ຊັງຕາແມັດ, ດັ່ງນັ້ນ ໃນປີນີ້ຈະໄດ້ເຂັ້ມງວດໃນການກວດກາ, ຖ້າຫາກຄັນໃດຝ່າຝືນຈະບໍ່ໃຫ້ເດີນທາງອອກຈາກສະຖານີຢ່າງເດັດຂາດ ແລະ ລົດແຕ່ລະຄັນທີ່ຈະມາຮັບໃຊ້ຂົນສົ່ງຜູ້ໂດຍສານນັ້ນ ແມ່ນໄດ້ມີການກວດກາສະພາບເຕັກນິກ, ປ່ຽນຖ່າຍອາໄຫລເປັນປົກກະຕິຢູ່ແລ້ວ, ພ້ອມມີການສຶກສາອົບຮົມພະນັກງານຂັບລົດແຕ່ລະສາຍທາງໃຫ້ມີຄວາມພ້ອມໃນທຸກດ້ານ ເພື່ອຄວາມປອດໄພຂອງຜູ້ໂດຍສານ.