ສະຫະພັນດຶງເຊືອກສະຫລຸບ ແລະ ຍ້ອງຍໍ ນັກກິລາທີ່ສ້າງຜົນງານດີເດັ່ນປີຜ່ານມາ

ສະຫະພັນດຶງເຊືອກແຫ່ງຊາດລາວ ຍ້ອງຍໍນັກກິລາຈໍານວນ 19 ຄົນທີ່ສ້າງຜົນງານດີເດັ່ນ​ໃນປີຜ່ານມາ ເຊິ່ງພິທີຈັດຂຶ້ນໃນວັນທີ 10 ມັງກອນ 2017 ທີ່ວິທະຍາໄລເຕັກນິກວິຊາຊີບວຽງຈັນ-ຮ່າໂນ້ຍ ໂດຍເຂົ້າຮ່ວມຂອງທ່ານ ໜູພັນ ອຸດສາ ປະທານສະຫະພັນດຶງເຊືອກແຫ່ງຊາດລາວ, ມີຄະນະບໍລິຫານສະຫະພັນດຶງເຊືອກ ພ້ອມດ້ວຍນັກກິລາເຂົ້າຮ່ວມຈໍານວນຫລາຍ.

ທ່ານ ບຸນພົມ ແກ້ວໄມພິດ ຮອງປະທານສະຫະພັນດຶງເຊືອກແຫ່ງຊາດລາວ ກ່າວວ່າ: ນັບແຕ່ປີ 2016 ເປັນຕົ້ນມາ ສະຫະພັນດຶງເຊືອກແຫ່ງຊາດລາວ ໄດ້ປ່ຽນຄະນະບໍລິຫານຊຸດໃໝ່ ແລະ ໄດ້ມີການເຄື່ອນໄຫວຢູ່ເລື້ອຍໆມາ ເຊິ່ງໄດ້ສ້າງຜົນງານດີເດັ່ນຫລາຍດ້ານ ເປັນຕົ້ນໄດ້ສົ່ງນັກກິລາເຂົ້າຮ່ວມແຂ່ງຂັນດຶງເຊືອກແຫ່ງຊາດໄທ ຄັ້ງທີ 5 ທີ່ປະເທດໄທ ຜ່ານເຂົ້າຮອບ 8 ທີມສຸດທ້າຍ ແຕ່ໄດ້ຮັບລາງວັນຊົມເຊີຍໃນຕົ້ນເດືອນກັນຍາ 2017 ແລະ ໄດ້ເຂົ້າຮ່ວມແຂ່ງຂັນດຶງເຊືອກນັກຮຽນອາຊຽນ ຄັ້ງທີ 1 ທີ່ປະເທດໄທ ເຊິ່ງສົ່ງເຂົ້າຮ່ວມ 2 ຮຸ່ນຄື: ອາຍຸ 13 ປີ ແລະ ອາຍຸ 15 ປີ ຜ່ານການແຂ່ງຂັນຮຸ່ນອາຍຸ 15 ປີສາມາດຍາດໄດ້ອັນດັບທີ 4 ພ້ອມໄດ້ຮັບຂັນລາງວັນ, ສ່ວນຮຸ່ນອາຍຸ 13 ປີ ບໍ່ສາມາດຜ່ານເຂົ້າຮອບແຕ່ໄດ້ຮັບລາງວັນຊົມເຊີຍ ແລະ ໄດ້ຮັບຂັນພັດທະນາກິລາດຶງເຊືອກດີເດັ່ນ 1 ໜ່ວຍ. ຂະນະທີ່ກາງເດືອນທັນວາ 2017 ທາງສະຫະພັນຂອງພວກເຮົາໄດ້ສົ່ງນັກກິລາເຂົ້າຮ່ວມການແຂ່ງຂັນດຶງເຊືອກລະດັບອາຊີ ແລະ ອາຊຽນທີ່ປະເທດໄທ ເຊິ່ງໄດ້ສົ່ງນັກກິລາເຂົ້າຮ່ວມ 2 ທີມຄື: ທີມຊາຍຮຸ່ນນໍ້າໜັກ 600 ກິໂລ ແລະ ຍິງ 500 ກິໂລ, ຜ່ານການແຂ່ງຂັນນັກກິລາທີມຊາຍ-ຍິງສາມາດຍາດໄດ້ອັນດັບທີ 4 ຂອງອາຊີ ແລະ ໄດ້ອັນດັບທີ 3 ຂອງອາຊີ. ດັ່ງນັ້ນ ເພື່ອໃຫ້ກໍາລັງໃຈນັກກິລາ ພ້ອມສົ່ງເສີມໃຫ້ນັກຮຽນນັກສຶກສາຫັນມາຫລິ້ນກິລາປະເພດນີ້ໃຫ້ນັບມື້ຫລາຍຂຶ້ນກວ່າເກົ່າ. ສໍາລັບການມອບໃບຍ້ອງຍໍຜົນງານຄັ້ງນີ້ມີນັກກິລາທີ່ສາມາດຍາດໄດ້ຜົນງານດີເດັ່ນມີຈໍານວນ 19 ຄົນ, ຍິງ 10 ຄົນ.

ນອກຈາກພິທິຍ້ອງຍໍແລ້ວ ທາງຄະນະສະຫະພັນດຶງເຊືອກແຫ່ງຊາດໄດ້ວາງທິດທາງ ສໍາລັບປີ 2018 ຄື: ທາງຄະນະສະຫະພັນຕ້ອງການຝຶກອົບຮົມບັນດາຄູຝຶກໃນຂອບເຂດທົ່ວປະເທດ ພ້ອມທັງຈັດການແຂ່ງຂັນລະດັບພາຍຊີງເພື່ອຊີງຂັນປະທານສະຫະພັນ ແລະ ຈັດການແຂ່ງຂັນທົ່ວປະເທດ ເພື່ອເຮັດໃຫ້ກິລາປະເພດນີ້ນັບມື້ນັບໃຫ້ໄດ້ຮັບຄວາມນິຍົມຫລາຍຂຶ້ນ.