ກຳປູເຈຍ-ຈີນ ລົງນາມຂໍ້ຕົກລົງ ການຮ່ວມມືຫລາຍສະບັບ
ກຳປູເຈຍ ແລະ ຈີນ ລົງນາມຮ່ວມກັນໃນຂໍ້ຕົກລົງ 19 ສະບັບ ເພື່ອພັດທະນາໂຄງລ່າງພື້ນຖານ, ກະສິກຳ ແລະ ທ່ອງທ່ຽວ.
ສຳນັກຂ່າວຕ່າງປະເທດລາຍງານຈາກນະຄອນຫລວງພະນົມເປັນ ປະເທດກຳປູເຈຍ ໃນວັນທີ 11 ມັງກອນວ່າ: ທ່ານ ຮຸນແຊນ ນາຍົກລັດຖະມົນຕີກຳປູເຈຍ ແລະ ທ່ານ ຫລີ ເຄີ້ສຽງ ນາຍົກລັດຖະມົນຕີຈີນ ຮ່ວມກັນເປັນສັກຂີພິຍານໃນການລົງນາມຂໍ້ຕົກລົງການຮ່ວມມື (MOU) ລະດັບທະວີພາຄີ ທັງດ້ານການລົງທຶນ ແລະ ການຊ່ວຍເຫລືອໃນອີກຫລາຍດ້ານທັງໝົດ 19 ສະບັບ, ເຖິງວ່າຍັງບໍ່ມີການເປີດເຜີຍມູນຄ່າຢ່າງເປັນທາງການ ແຕ່ມີລາຍງານວ່າຂອບການຮ່ວມມື ລວມທັງໂຄງການກໍ່ສ້າງສະໜາມບິນແຫ່ງໃໝ່ຢູ່ແຂວງສຽບລຽບ ແລະ ໂຄງການກໍ່ສ້າງທາງຫລວງເສັ້ນໃໝ່ເຊື່ອມລະຫວ່າງນະຄອນຫລວງພະນົມເປັນກັບເມືອງກຳປົງໂສມ.
ຂະນະທີ່ງົບປະມານຂອງໂຄງການທັງໝົດຈະມາຈາກກອງທຶນຂອງກຸ່ມບໍລິສັດລົງທຶນກຳປູເຈຍໃນຕ່າງປະເທດ (OCIC) ກັບທະນາຄານພັດທະນາຈີນ (CDB) ແລະ MOU ຊຸດດັ່ງກ່າວເປັນຄົນລະສ່ວນກັບຂໍ້ຕົກລົງການຮ່ວມມືລະຫວ່າງຈີນກັບກຳປູເຈຍທີ່ມີມູນຄ່າຫລາຍກວ່າ 184 ລ້ານໂດລາສະຫະລັດ ຄວບຄຸມອີກຫລາຍໂຄງການ.
ນາຍົກລັດຖະມົນຕີຂອງທັງສອງປະເທດຫາລືກັນຢ່າງເປັນທາງການ ພາຍຫລັງສຳເລັດກອງປະຊຸມສຸດຍອດຜູ້ນຳຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ (LMC) ຄັ້ງທີ 2 ທີ່ນະຄອນຫລວງພະນົມເປັນ ປະເທດກຳປູເຈຍ ກ່ຽວກັບການຂະຫຍາຍຂອບການຮ່ວມມືດ້ານການສົ່ງເສີມການທ່ອງທ່ຽວ ເພື່ອດຶງດູດໃຫ້ນັກທ່ອງທ່ຽວຊາວຈີນເດີນທາງທ່ອງທ່ຽວກຳປູເຈຍຫລາຍຂຶ້ນ ແລະ ການເພີ່ມອັດຕາສ່ວນຕະຫລາດໃນຈີນໃຫ້ແກ່ການນຳເຂົ້ານ້ຳຕານຈາກກຳປູເຈຍ.
