Vivo ໂຊນະວັດຕະກໍາສະແກນລາຍນິ້ວມືຜ່ານໜ້າຈໍໂທລະສັບມືຖືໃນງານ CES 2018
ໂທລະສັບມືຖືຮຸ່ນໃຫມ່ ຖືກອອກແບບໃຫ້ບາງລົງເລື້ອຍໆ (ທັງຄວາມໜາ ແລະ ຂອບຈໍ) ແລະ ຕັດສ່ວນທີ່ບໍ່ຈໍາເປັນອອກ(ເຊັ່ນຊ່ອງຫ້ອງຟັງເປັນຕົ້ນ) ເພື່ອໃຫ້ເບິ່ງລຽບງ່າຍທີ່ສຸດ ແລະ ພາຍໃນງານ CES 2018 ກໍຈະກ້າວໄປອີກຂັ້ນດ້ວຍການເຊື່ອງເຊັນເຊີສະແກນລາຍນິ້ວມືເອົາໄວ້ໃນໜ້າຈໍ.
ໂດຍທາງ Vivo ໄດ້ນໍາຕົ້ນແບບໂທລະສັບຕົວໃຫມ່ທີ່ໄດ້ນໍາເຕັກໂນໂລຊີສະແກນລາຍນິ້ວມືຜ່ານໜ້າຈໍມືຖືມາໂຊພາຍໃນງານ ຊຶ່ງຕໍາແໜ່ງຂອງການສະແກນລາຍນິ້ວມືຈະຢູ່ບໍລິເວນດ້ານລຸ່ມເຄິ່ງກາງໜ້າຈໍ ມີຮູບໄອຄອນລາຍນິ້ວມືສະແດງຕໍາແໜ່ງທີ່ເຮົາຕ້ອງການສະແກນ ຊຶ່ງໃນດ້ານຂອງລັກສະນະການໃຊ້ງານນັ້ນ ຈະບໍ່ຕ່າງຈາກເຊັນເຊີສະແກນລາຍນິ້ວມືທົ່ວໆໄປໃນທ້ອງຕະຫຼາດ ໃຊ້ການວາງນິ້ວມືລົງໄປໃນພື້ນຜິວເຊັ່ນດຽວກັນ.
ສໍາລັບເຕັກໂນໂລຊີນີ້ຜະລິດໂດຍບໍລິສັດ Synaptics ຜູ້ພັດທະນາເຕັກໂນໂລຊີຕ່າງໆ ສໍາລັບອຸປະກອນໃນທ້ອງຕະຫຼາດ ບໍ່ວ່າຈະເປັນທັຊແພດສໍາລັບເລັດທ໊ອບ, ທັຊສກຣັນ ເຄື່ອງຫຼິ້ນ MP3 ຕ່າງໆ ລວມໄປເຖິງເຊັນເຊີສະແກນລາຍນິ້ວມືຕ່າງໆ ໂດຍຕົວຊິປທີ່ເຮົາເຫັນໃນພາບ ຈະຖືກນໍາໄປໄວ້ພາຍໃນໜ້າຈໍ OLED ຂອງຕົວໂທລະສັບ, ສ່ວນດ້ານຄວາມໄວໃນການສະແກນລາຍນິ້ວມືນັ້ນ ທາງ Synaptics ກ່າວວ່າ: ເຕັກໂນໂລຊີນີ້ສາມາດ ເຮັດຄວາມໄວໄດ້ 0.7 ວິນາທີ ຊຶ່ງໃນປັດຈຸບັນເຊັນເຊີສະແກນລາຍນິ້ວມື ສາມາດເຮັດຄວາມໄວໄດ້ສູງສຸດ 0.2 ວິນາທີ.
ອີກຄວາມໜ້າສົນໃຈຄື ໂທລະສັບມືຖື Vivo ທີ່ນໍາມາໂຊເຕັກໂນໂລຊີສະແກນລາຍນິ້ວມືໃນໜ້າຈໍນີ້ ເປັນໂທລະສັບມືຖືຕົວຈິງທີ່ຈະນໍາມາວາງຈໍາໜ່າຍພາຍໃນປີນີ້ ແຕ່ໃນຂະນະນີ້ຍັງບໍ່ມີຊື່ຮຸ່ນເທື່ອ ແຕ່ເທົ່າທີ່ເຫັນກໍໄດ້ຮູ້ແລ້ວວ່າ Vivo ກໍາລັງຈະອອກໂທລະສັບມືຖືໜ້າຈໍ OLED ແບບ Full View Display ທີ່ມີລະບົບການສະແກນລາຍນິ້ວມືຜ່ານໜ້າຈໍ ພາຍໃນປີນີ້ ແລະ ເຊື່ອວ່າ ໂທລະສັບອີກຫຼາຍໆຍີ່ຫໍ້ໃນປີ 2018 ນີ້ ກໍຈະມາກັບເຕັກໂນໂລຊີນີ້ເຊັ່ນກັນ.
