ການເງິນນະຄອນຫລວງຊີ້ແຈງລາຍຮັບຕົກຍ້ອນຜູ້ປະກອບການເຊື່ອງອຳລາຍໄດ້
ໃນວັນທີ 10 ມັງກອນນີ້, ທ່ານ ຄຳພັນ ມາລາບັນດິດ ຫົວໜ້າພະແນກການເງີນນະຄອນຫລວງວຽງຈັນ, ໄດ້ລາຍງານຕໍ່ກອງປະຊຸມສະໄຫມສາມັນເທື່ອທີ 4 ຂອງສະພາປະຊາຊົນນະຄອນຫລວງວຽງຈັນຊຸດທີ I ກ່ຽວກັບການເກັບລາຍຮັບ ຢູ່ນະຄອນຫລວງໃນໄລຍະຜ່ານມາວ່າ: ສາເຫດການເກັບລາຍຮັບຢູ່ນະຄອນ ຫລວງວຽງຈັນໃນປີ 2017 ຜ່ານມາບໍ່ບັນລຸຕາມແຜນການທີ່ວາງໄວ້ຍ້ອນລາຍຮັບສ່ວຍສາອາກອນຂອງຫົວໜ່ວຍທຸລະກິດຂະຫນາດໃຫຍ່ ແລະ ກາງ ທີ່ມີລາຍຮັບເກີນ 400 ລ້ານຂຶ້ນໄປຍັງບໍ່ໄດ້ຕາມຄາດໝາຍ, ຍັງມີຫລາຍຫົວໜ່ວຍບໍລິສັດຫລົບຫລີກການເສຍອາກອນຄື: ປັດຈຸບັນຫົວໜ່ວຍທີ່ຢູ່ໃນລະບົບອາກອນມູນຄ່າເພີ່ມມີທັງໝົດ 6.386 ຫົວໜ່ວຍ, ແຈ້ງມີລາຍຮັບພຽງ 1.447 ຫົວໜ່ວຍ, ແຈ້ງ 0 ຫລື ແຈ້ງບໍ່ມີລາຍຮັບ 1.517 ຫົວໜ່ວຍ ແລະ ບໍ່ມາແຈ້ງ 3.422 ຫົວໜ່ວຍ, ເຊິ່ງເຮັດໃຫ້ການເກັບລາຍຮັບຕາມແຜນງົບປະມານບໍ່ບັນລຸຕາມແຜນວາງໄວ້, ຊຶ່ງເກັບໄດ້ພຽງ 93,47%, ຂະນະທີ່ຍັງມີບາງບໍລິສັດບໍ່ສາມາດຈ່າຍຄ່າເຊົ່າ ແລະ ສຳປະທານຕາມສັນຍາ ແລະ ໜີ້ຄ່າເຊົ່າຫ້ອງຕະຫລາດເຊົ້າ ກໍບໍ່ສາມາດປະຕິບັດໄດ້, ເຊິ່ງຍັງມີໜີ້ຫລາຍເຖິງ 6,23 ຕື້ກີບ ແລະ ການເກັບລາຍຮັບພາສີຈາກເຄື່ອງຍ່ອຍທົ່ວໄປກໍເຫັນວ່າມີທ່າອ່ຽງຫລຸດລົງປະມານ 67%.
ທ່ານຫົວໜ້າພະແນກການເງິນນະຄອນຫລວງ ໃຫ້ຮູ້ວ່າ: ຜ່ານການຈັດຕັ້ງປະຕິບັດແຜນງົບປະມານແຫ່ງລັດປີຜ່ານມາ, ເຫັນວ່າມີຫລາຍດ້ານຍັງຫຍຸ້ງຍາກ, ເຖິງວ່ານະຄອນຫລວງເປັນທ້ອງຖິ່ນທີ່ມີຖານເສດຖະກິດຂະຫາຍຕົວສູງ, ມີບັນດາຫົວໜ່ວຍທຸລະກິດຂະໜາດໃຫຍ່, ຂະໜາດກາງ ແລະ ນ້ອຍ ຕັ້ງຢູ່ເປັນຈຳນວນຫລາຍ, ແຕ່ການແບ່ງຂັ້ນຄຸ້ມຄອງເກັບລາຍຮັບຕົວຈິງປະມານ 90% ແມ່ນຂັ້ນສູນກາງຈັດເກັບ, ນະຄອນຫລວງຄຸ້ມຄອງເກັບປະມານ 10% ແລະ ບັນດາຫົວໜ່ວຍທຸລະກິດຂະໜາດໃຫຍ່ ແລະ ຂະໜາດກາງຈຳນວນໜຶ່ງແມ່ນບໍ່ມີການເຄື່ອນໄຫວຍ້ອນຫລາຍສາເຫດ, ສຳຄັນໜຶ່ງແມ່ນສະພາບແກ້ໄຂໃຫ້ໂຄງການລົງທຶນຈຳນວນໜຶ່ງແມ່ນບໍ່ສາມາດປະຕິບັດໄດ້, ເຮັດໃຫ້ທຸລະກິດຈຳນວນໜຶ່ງບໍ່ສາມາດຊຳລະໜີ້ສິນກູ້ຢືມ ແລະ ໜີ້ສິນພັນທະຕໍ່ງົບປະມານ, ການປະຕິບັດໜ້າທີ່ວຽກງານຂອງພະນັກງານຈຳນວນໜຶ່ງຍັງບໍ່ທັນມີຄວາມຮັບຜິດຊອບສູງ ເທົ່າທີ່ຄວນ. ເຮັດໃຫ້ລາຍຮັບຈຳນວນໜຶ່ງຮົ່ວໄຫລ.
ກະຊວງການເງິນ ໃຫ້ຮູ້ວ່າ: ການເກັບລາຍຮັບເຂົ້າງົບປະມານໃນປີຜ່ານມາ ຫລາຍແຂວງຍັງບໍ່ບັນລຸຕາມຄາດໝາຍສູ້ຊົນ, ຊຶ່ງເກັບໄດ້ພຽງ 26 ພັນກວ່າຕື້ກີບ, ຂະນະດຽວກັນການຄຸ້ມຄອງລາຍຈ່າຍແມ່ນສູງເຖິງ 36 ພັນຕື້ກີບ. ແນວໃດກໍດີ, ການເກັບລາຍຮັບທີ່ບໍ່ບັນລຸແຜນການບໍ່ສະເພາະແຕ່ນະຄອນຫລວງວຽງຈັນເທົ່ານັ້ນ, ຍັງມີຫລາຍແຂວງ ເປັນຕົ້ນ: ແຂວງສະຫວັນນະເຂດ, ຊຶ່ງໃນປີຜ່ານມາແຂວງສາມາດເກັບລາຍຮັບໄດ້ທັງໝົດ 1.212,8 ຕື້ກີບເທົ່າກັບ 96,98% ແລະ ເມື່ອທຽບໃສ່ປີຜ່ານມາຫລຸດລົງ 10,5%, ເນື່ອງມາຈາກຫລາຍສາເຫດ, ແຕ່ອັນສຳຄັນແມ່ນລາຍຮັບຈາກຫົວໜ່ວຍທຸລະກິດການຜະລິດໂດຍສະເພາະແມ່ນບໍລິສັດລ້ານຊ້າງມິເນໂຣນມີແຕ່ຜະລິດທອງ ແລະ ການຜະລິດຄຳແມ່ນໄດ້ຢຸດຕິໄປຫລາຍປີແລ້ວ, ສ່ວນການຂຸດຄົ້ນແຮ່ທາດອື່ນໆກໍຫລຸດລົງຕາມໆກັນ.
