ບໍລິສັດອາກເດໂກນໍາສະເໜີຫລາຍຜະລິດຕະພັນກໍ່ສ້າງຄຸນນະພາບດີ

 ໃນວັນທີ 8 ເມສານີ້, ບໍລິສັດ ອາກເດໂກ ສໍາຫລວດ-ອອກແບບເຄຫາສະຖານ ຈໍາກັດ, ຊຶ່ງຕັ້ງຢູ່ບ້ານເກົ້າຍອດ, ເມືອງສີສັດຕະນາກ, ນະຄອນຫລວງວຽງຈັນ, ໄດ້ຈັດພິທີນໍາສະເໜີຜະລິດຕະພັນບານປະຕູ-ປ່ອງຢ້ຽມຍີຫໍ້ເຮບຕາ (HEVTA), ຫລັງຄາຍີຫໍ້ອົງດູລິນ (ONDULINE), ອຸປະກອນໄຟຟ້າຍີຫໍ້ເອບີບີ (ABB Limited) ແລະ ລະບົບໄຟຟ້າພະລັງງານແສງອາທິດ SOLAR Energy Systems) ຂຶ້ນທີ່ໂຮງແຮມເມືອງແທງ, ນະຄອນຫລວງວຽງຈັນ, ພາຍຫລັງໄດ້ຮັບລິຂະສິດເປັນຕົວແທນຈໍາໜ່າຍແຕ່ພຽງຜູ້ດຽວໃນລາວ.

ທ່ານ ປຣາຖະໜາ ກາຍະວົງ ອໍານວຍການບໍລິສັດດັ່ງກ່າວ ໃຫ້ຮູ້ວ່າ: ຜະລິດຕະພັນເຫລົ່ານີ້ແມ່ນຜະລິດຢູ່ປະເທດໄທ, ເປັນສີນຄ້າທີ່ມີຄຸນນະພາບດີ ແລະ ມີມາດຕະຖານສາກົນ, ຊຶ່ງຖືກນໍາໃຊ້ເຂົ້າໃນໂຄງການກໍ່ສ້າງຕຶກອາຄານຂະໜາດໃຫຍ່ ແລະ ທັນສະໄໝ ເຊັ່ນ: ສູນການຄ້າ, ອາພາດເມັນ, ຄອນໂດ, ສະໜາມບິນ ແລະ ອື່ນໆ, ໂດຍສະເພາະຜະລິດຕະພັນບານປະຕູ-ປ່ອງຢ້ຽມເຮບຕາ ແລະ ຫລັງຄາອົງດູລີນ ແມ່ນວັດສະດຸກໍ່ສ້າງທີ່ເປັນນະວັດຕະກໍາໃໝ່ ທີ່ມີນໍ້າໜັກເບົາແຕ່ມີຄວາມແຂ່ງແກ່ນທົນທານ ແລະ ໃນປັດຈຸບັນຢູ່ປະເທດເຮົາພວມມີການສ້າງສາພັດທະນາຢ່າງບໍ່ຢຸດຢັ້ງ, ມີຕຶກອາຄານຂະໜາດໃຫຍ່ເກີດຂຶ້ນຢ່າງຫລວງຫລາຍ, ຈຶ່ງໝັ້ນໃຈວ່າຜະລິດຕະພັນດັ່ງກ່າວຈະໄດ້ຮັບຄວາມນິຍົມຈາກສັງຄົມຫລາຍຂຶ້ນ.

ເຂົ້າຮ່ວມພິທີດັ່ງກ່າວມີທ່ານຮອງລັດຖະມົນຕີກະຊວງອຸດສະຫະກໍາ ແລະ ການຄ້າ ບຸນມີ ມະນີວົງ, ພ້ອມດ້ວຍຜູ້ຕ່າງໜ້າຈາກບໍລິສັດ ແລະ ລູກຄ້າເຂົ້າຮ່ວມເປັນຈໍານວນຫລາຍ.