ກະຊວງການເງິນ ແລະ ສູນສະຖິຕິແຫ່ງຊາດກຽມເດີນສຳຫລວດຫົວໜ່ວຍທຸລະກິດ 4 ເມືອງໃນນະຄອນຫລວງ
ກະຊວງການເງິນໄດ້ຮ່ວມກັບສູນສະຖິຕິແຫ່ງຊາດ, ກຽມເດີນສຳຫລວດບັນດາຫົວໜ່ວຍທຸລະກິດຢູ່ 4 ເມືອງໃນນະຄອນຫລວງວຽງຈັນຄືນໃໝ່ ໃນກາງເດືອນມັງກອນຫາທ້າຍເດືອນກຸມພາປີ 2018 ແລະ ໃນວັນທີ 8 ມັງກອນນີ້ ທີ່ກະຊວງການເງິນ ຈິ່ງໄດ້ຈັດກອງປະຊຸມຊີ້ນຳການເດີນສຳຫລວດຫົວໜ່ວຍທຸລະກິດດັ່ງກ່າວ ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີຫົວໜ້າສູນສະຖິຕິແຫ່ງຊາດ, ຮອງລັດຖະມົນຕີກະຊວງການເງິນ, ຮອງເຈົ້າຄອງນະຄອນຫລວງ, ຫົວໜ້າກົມ, ຫົວໜ້າພະແນກການເງິນນະຄອນຫຼວງ, ເຈົ້າເມືອງ, ຮອງເຈົ້າ ເມືອງຕ່າງໆເຂົ້າຮ່ວມນຳດ້ວຍ.
ທ່ານຮອງນາຍົກລັດຖະມົນຕີ ກ່າວວ່າ: ໂຄງການເດີນສໍາຫລວດຫົວໜ່ວຍທຸລະກິດຢູ່ 4 ເມືອງໃນນະຄອນຫລວງວຽງຈັນຄື: ເມືອງຈັນທະບູລີ, ສີສັດຕະນາກ, ສີໂຄດຕະບອງ ແລະ ເມືອງໄຊເສດຖາ ແມ່ນໂຄງການສໍາຫລວດເກັບກຳຂໍ້ມູນທີ່ສໍາຄັນ ແລະ ຖືເປັນໂຄງການໂຕແບບຂອງລັດຖະບານໃນການເພີ່ມຄວາມໂປ່ງໃສ ແລະ ອັດການຮົ່ວໄຫລຂອງລາຍຮັບ, ຫັນເອົາລະບົບຂໍ້ມູນຖານລາຍຮັບເຂົ້າສູ່ການຄຸ້ມຄອງດ້ວຍເຄື່ອງມືທັນສະໄໝ ສາມາດເຊື່ອມໂຍງກັນໄດ້ໃນຂອບເຂດທົ່ວປະເທດ ແລະ ຫັນເອົາການຊຳລະພັນທະພາສີ-ອາກອນ ແລະ ຄ່າທຳນຽມຕ່າງໆຜ່ານລະບົບທະນາຄານ.
ທ່ານ ຮອງນາຍົກລັດຖະມົນຕີ ເນັ້ນວ່າ: ການສຳຫລວດເກັບກຳຫົວໜ່ວຍທຸລະກິດຕົວຈິງໃຫ້ຄົບຖ້ວນ ແລະ ຖືກຕ້ອງສອດຄ່ອງກັບຄວາມເປັນຈິງໃນເງື່ອນໄຂການຂະຫຍາຍຕົວຂອງເສດຖະກິດໃນປັດຈຸບັນ, ເປັນການເກັບກຳຖານຂໍ້ມູນເພື່ອສືບຕໍ່ພັດທະນາລະບົບການຊຳລະພັນທະອາກອນ ແລະ ຄ່າທຳນຽມຕ່າງໆ ຜ່ານລະບົບທະ ນາຄານໃຫ້ສົມບູນໃນອານາຄົດ ແລະ ທັງເປັນການສືບຕໍ່ຈັດຕັ້ງຜັນຂະຫຍາຍຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 40/ນຍ, ລົງວັນທີ 29 ກັນຍາ 2016 ກ່ຽວກັບການລົງເກັບກຳ ແລະ ສຳຫລວດຖານລາຍຮັບງົບປະມານຄືນໃໝ່ໃນຂອບເຂດທົ່ວປະເທດໃຫ້ສໍາເລັດຜົນ.
ສຳລັບການເດີນສຳຫລວດຕົວຈິງ ຄາດວ່າຈະໄດ້ເລີ່ມຈັດຕັ້ງປະຕິບັດໃນກາງເດືອນມັງກອນ (ວັນທີ 15 ມັງ ກອນ) ຫາທ້າຍເດືອນກຸມພາປີ 2018 ໂດຍຈະມີຄະນະຮັບຜິດຊອບເດີນສຳຫລວດທີ່ມາຈາກພາກສ່ວນຕ່າງໆທີ່ກ່ຽວ ຂ້ອງ. ດັ່ງນັ້ນ, ຈຶ່ງຮຽກຮ້ອງມາບັນດາທ່ານພ້ອມຈິດພ້ອມໃຈກັນຈັດຕັ້ງປະຕິບັດການເດີນສຳຫລວດໃນຄັ້ງນີ້ໃຫ້ປະ ສົບຜົນສຳເລັດຢ່າງມີປະສິດທິພາບ ແລະ ມີປະສິດທິຜົນສູງ, ຮຽກຮ້ອງມາຍັງໃຫ້ອຳນາດການປົກຄອງຂອງນະຄອນ ຫລວງວຽງຈັນກໍ່ຄື 4 ເມືອງໃນຈົ່ງໃຫ້ການຮ່ວມມືຊຸກຢູ່ຊ່ວຍເຫລືອດ້ວຍການແຈ້ງໃຫ້ບັນດາບ້ານ ແລະ ຜູ້ປະກອບການ, ຫົວໜ່ວຍທຸລະກິດຮັບຮູ້ ແລະ ໃຫ້ຄວາມຮ່ວມມືໃນການເດີນສຳຫລວດຄັ້ງນີ້ຢ່າງເຂັ້ມງວດ.
