ອາການໝຸດໝັດທີ່ເກີດຈາກຮ່າງກາຍຂາດນຳ້
ຜົນການສຶກສາໃໝ່ຫລ້າສຸດ ລະບຸວ່າ : ການດື່ມນຳ້ບໍ່ພຽງພໍ ອາດເຮັດໃຫ້ອາລົມໝຸດໝັດໄດ້ງ່າຍກ່ວາປົກກະຕິ ລວມເຖິງມີຜົນຕໍ່ລະບົບປະມວນຜົນໃນສະໝອງ.
ວາລະສານ The Journal of Nutrition ໄດ້ຕີພິມຜົນການສຶກສາຫລ້າສຸດ ເຊິ່ງນັກວິໄຈພົບວ່າ: ອາການຂາດນຳ້ໃນຄົນເປັນປັດ ໄຈຕົ້ນຕໍໃນການເກີດອາການເຈັບຫົວ, ອິດເມື່ອຍອ່ອນເພຍ, ຂາດແຮງຈູງໃຈໃນການເຮັດວຽກໄປ ແລະ ອາລົມໝຸດໝັດງ່າຍ.
ການສຶກສາລະບຸວ່າ : ແມ່ຍິງທີ່ຂາດນຳ້ໜ້ອຍກ່ວາປົກກະຕິພຽງແຕ່ 1% ເທົ່ານັ້ນກໍຈະໄດ້ຮັບຜົນກະທົບ ໄດ້ແກ່ : ອາລົມໝຸດໝັດ ແລະ ເຈັບຫົວ. ນອກຈາກນີ້, ໜັງສືພິມ The Huffington Post ໄດ້ອ້າງອີງເຖິງຜົນການສຶກສາໃນປີ 2009 ໂດຍນັກວິໄຈຈາກ Tufts University ວ່າ : ການຂາດນຳ້ໃນຮ່າງກາຍຈະສາມາດນຳໄປສູ່ອາການອິດເມື່ອຍອ່ອນເພຍ, ສັບສົນ, ອາລົມໝົ່ນໝອງ, ຈິດໃຈບໍ່ດີ ເຊິ່ງການສຶກສານີ້ໄດ້ສຶກສາກັບນັກກິລາເພດຍິງທີ່ຢູ່ໃນໄລຍະເປັນໄວໜຸ່ມ.
ເຖິງວ່າການສຶກສາກ່ຽວກັບອາການຮ່າງກາຍຂາດນຳ້ກັບຜົນກະທົບທາງອາລົມຈະເຮັດຂຶ້ນກັບແມ່ຍິງ, ແຕ່ຜົນການສຶກສາກໍສາມາດນຳມາໃຊ້ກັບຜູ້ຊາຍໄດ້ຄືກັນ ແລະ ວາລະສານ TIME ໄດ້ລະບຸຕື່ມວ່າ : ການຮັກສາໃຫ້ຮ່າງກາຍໄດ້ຮັບນຳ້ພຽງພໍນັ້ນ ເຮັດໄດ້ໂດຍການດື່ມນຳ້ບໍລິສຸດ ແລະ ຫລີກເວັ້ນເຄື່ອງດື່ມທີ່ປະສົມສານກາເຟອີນ ຫລື ອານກໍຮໍ. ສຳລັບປະລິມານນຳ້ທີ່ຄວນດື່ມໃນແຕ່ລະມື້ນັ້ນສາມາດກວດເບິ່ງໄດ້ງ່າຍໆຈາກສີຂອງນຳ້ຍ່ຽວ ເຊິ່ງເມື່ອໃດທີ່ນຳ້ຍ່ຽວເປັນສີເຂັ້ມ ຫລື ເຫລືອງກ່ວາ ປົກກະຕິສະແດງວ່າຮ່າງກາຍກຳລັງຕ້ອງການນຳ້ຫລາຍຂຶ້ນ.
