ນະຄອນຫລວງເລັ່ງຊອກບໍລິສັດມາລົງທຶນສ້າງທາງດ່ວນບຶງທາດຫລວງ-ດົງໝາກຄາຍ

ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ, ພວມເລັ່ງຊອກຫາບໍລິສັດທັງພາຍໃນ ແລະ ຕ່າງປະເທດທີ່ມີຄວາມພ້ອມທາງດ້ານການເງິນເພື່ອມາລົງທຶນກໍ່ສ້າງເສັ້ນທາງດ່ວນຄູ່ຂະໜານຖະໜົນໄກສອນພົມວິຫານໄລຍະທີ I ແຕ່ເຂດເສດຖະກິດສະເພາະບຶງທາດຫລວງຫາບ້ານດົງໝາກຄາຍນະຄອນຫລວງວຽງຈັນ.

ພະແນກໂຍທານະຄອນຫລວງ ໃຫ້ຮູ້ວ່າ: ເສັ້ນທາງດັ່ງກ່າວໃນໄລຍະທີ 1 ມີຄວາມຍາວປະມານ 15 ກິໂລແມັດ, ກວ້າງ 54 ແມັດ, ມີຊ່ອງຈະລາຈອນ ແລະ ມີລະບົບໄຟເຍືອງທາງຄົບຊຸດ, ຕາມມາດຕະຖານທາງດ່ວນປະເພດ 1 ທີ່ສາມາດເຊື່ອມຕໍ່ກັບເສັ້ນທາງຂອງບັນດາປະເທດໃກ້ຄຽງ ແລະ ມາຮອດປັດຈຸບັນ, ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນໄດ້ອອກແຈ້ງການເຊື້ອເຊີນບໍລິສັດຕ່າງໆທັງພາຍໃນ ແລະ ຕ່າງປະເທດທີ່ມີຄວາມພ້ອມດ້ານຖານະການເງິນມາປະມູນເພື່ອລົງທຶນໃນຮູບແບບ BOT (ກໍ່ສ້າງ ແລະ ເກັບເງິນດ້ວຍຕົນເອງ), ຊຶ່ງລວມທັງການຈ່າຍຄ່າຊົດເຊີຍຕ່າງໆໃຫ້ປະຊາຊົນທີ່ໄດ້ຮັບຜົນກະທົບເປັນຕົ້ນ: ທີ່ດິນ, ສິ່ງປຸກສ້າງ, ຜົນລະປູກ ແລະ ອື່ນໆ, ມີໄລຍະສໍາປະທານ 50 ປີ, ຊຶ່ງການກໍ່ສ້າງແມ່ນຕ້ອງໃຫ້ສໍາເລັດກ່ອນກອງປະຊຸມໃຫຍ່ຄັ້ງທີ 11 ຂອງພັກໃນຕົ້ນປີ 2021, ທັງເປັນການຍົກລະດັບພື້ນຖານໂຄງລາງຄົມມະນາຄົມໃຫ້ມີມາດຕະຖານດີຂຶ້ນ ແລະ ຊ່ວຍຫລຸດຜ່ອນສະພາບການສັນຈອນແອອັດໃນຕົວເມືອງ ແລະ ບັນຫາອຸປະຕິເຫດໃຫ້ຫລຸດລົງ.