ອາທິດຜ່ານມາລາວສົ່ງອອກຜະລິດຕະພັນພືດຫຼາຍກວ່າ 140 ໂຕນ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນອາທິດຜ່ານມານີ້, ລາວ ສາມາດສົ່ງອອກສິນຄ້າພືດ ແລະ ຜະລິດຕະພັນພືດໄດ້ທັງໝົດຫລາຍກວ່າ 140 ໂຕນ, ລວມມີມູນຄ່າຫລາຍກວ່າ 48 ລ້ານໂດລາສະຫະລັດ, ໃນນັ້ນຫລາຍກວ່າໝູ່ແມ່ນກາເຟ, ກ້ວຍ, ຢາສູບ, ມັນຕົ້ນ ແລະ ສັດອອກຈໍາໜ່າຍ 10.113 ກວ່າໂຕ, ໃນນັ້ນມີຄວາຍ, ງົວ, ໝູ, ແບ້ ແລະ ສັດປີກອີກຫລາຍກວ່າ 92 ພັນໂຕ. ແຕ່ຕົ້ນປີ 2017 ມາຮອດປັດຈຸບັນລາວສາມາດສົ່ງສັດໃຫຍ່ອອກຈໍາໜ່າຍທັງໝົດ 595.176 ໂຕ ແລະ ສັດປີກຫລາຍກວ່າ 6 ລ້ານໂຕ.

ກະຊວງກະສິກໍາ ແລະ ປ່າໄມ້ ໃຫ້ຮູ້ຕື່ມວ່າ: ໃນອາທິດຜ່ານມານີ້, ເຈົ້າໜ້າທີ່ກວດກາປ່າໄມ້ສາມາດກວດ ແລະ ຢຶດໄມ້ຂອງຜູ້ກະທໍາຜິດໄດ້ 520 ໂຕ, ລວມມີບໍລິມາດຫລາຍກວ່າ 17 ແມັດກ້ອນ, ພ້ອມນັ້ນກໍໄດ້ກວດກາ ແລະ ຢຶດສັດນໍ້າ-ສັດປ່າປະເພດຫວງຫ້າມຈາກຜູ້ກະທໍາຜິດໄດ້ 15 ໂຕຢູ່ແຂວງຕ່າງໆ, ພ້ອມໄດ້ສຶກສາອົບຮົມຜູ້ກະທໍາຜິດ ແລະ ປັບໃໝຕາມລະບຽບກົດໝາຍ.