ພະຍາດປາກເປື່ອຍລົງເລັບລະບາດໜັກຢູ່ເມືອງວຽງໄຊມີງົວ-ຄວາຍຕິດເຊື້ອແລ້ວຫລາຍກວ່າ 3.600 ໂຕ
ຕາມການລາຍງານຈາກຫ້ອງການກະສິກຳ ແລະ ປ່າໄມ້ເມືອງວຽງໄຊ ແຂວງຫົວພັນ ໃຫ້ຮູ້ວ່າ: ນັບແຕ່ຕົ້ນເດືອນພະຈິກ 2017 ເປັນຕົ້ນມາ, ຢູ່ເມືອງວຽງໄຊ ແຂວງຫົວພັນ ໄດ້ເກີດການລະບາດຂອງພະຍາດປາກເປື່ອຍລົງເລັບງົວ-ຄວາຍຂຶ້ນຢູ່ 35 ບ້ານຂອງເມືອງວຽງໄຊ ມີງົວ-ຄວາຍຕິດເຊື້ອພະຍາດນີ້ແລ້ວ 3.673 ໂຕ, ໃນນັ້ນສ່ວນໃຫຍ່ແມ່ນງົວ ແລະ ຄວາຍຕາຍແລ້ວ 112 ໂຕ. ສ່ວນຫລາຍແມ່ນສັດເກີດໃໝ່, ມີສຸຂະພາບອ່ອນເພຍ.
ຮອງຫົວໜ້າຫ້ອງການກະສິກຳ-ປ່າໄມ້ເມືອງວຽງໄຊ ຮັບຜິດຊອບວຽກງານລ້ຽງສັດ ແລະ ການປະມົງ ໃຫ້ຮູ້ວ່າ: ພະຍາດປາກເປື່ອຍລົງເລັບງົວ-ຄວາຍໄດ້ເກີດຂຶ້ນກ່ອນໝູ່ຢູ່ກຸ່ມບ້ານສອນເພັດແລ້ວແຜ່ລາມຢ່າງໄວວາທົ່ວເມືອງວຽງໄຊ. ຕໍ່ສະພາບດັ່ງກ່າວ, ເຈົ້າເມືອງວຽງໄຊ ໄດ້ອອກແຈ້ງການດ່ວນເຖິງບັນດາກຸ່ມບ້ານ ແລະ ບ້ານໃນທົ່ວເມືອງຂອງຕົນຫ້າມເຄື່ອນຍ້າຍສັດ, ຂ້າສັດ, ສ່ວນຫ້ອງການກະສິກຳ-ປ່າໄມ້ເມືອງວຽງຊັນ ໄດ້ສົ່ງພະນັກງານວິຊາການກ່ຽວຂ້ອງລົງສົມທົບກັບອຳນາດການປົກຄອງບ້ານ, ສັດຕະວະແພດບ້ານ ໃຫ້ຄຳແນະນຳ ແລະ ສາທິດວິທີການປິ່ນປົວຕົວຈິງດ້ວຍຢາຫລວງ ແລະ ຢາພື້ນເມືອງ.
ວິຊາການຫ້ອງການກະສິກຳ-ປ່າໄມ້ ຜູ້ລົງປະຕິບັດຕົວຈິງຢູ່ກຸ່ມຊຽງລວງ ໃຫ້ຮູ້ວ່າ: ພາຍຫລັງໄດ້ຮັບຄຳສະເໜີຈາກປະຊາຊົນ ທີມງານວິຊາການລ້ຽງສັດ ແລະ ການປະມົງໄດ້ຮີບຮ້ອນລົງແນະນຳເຈົ້າຂອງສັດປິ່ນປົວສັດທີ່ຕິດເຊື້ອພະຍາດໃຫ້ຫາຍຂາດໂດຍໄວ.
ນາຍບ້ານຊຽງລວງ ເວົ້າວ່າ: ພະຍາດປາກເປື່ອຍລົງເລັບງົວ-ຄວາຍເກີດຂຶ້ນຄັ້ງນີ້ເປັນຄັ້ງທີສອງ, ຄັ້ງທຳອິດແມ່ນເກີດຂຶ້ນໃນປີ 2010 ແຕ່ບໍ່ຮ້າຍແຮງເຊິ່ງປີນີ້ແມ່ນຮ້າຍແຮງຫລາຍ ສະເພາະບ້ານຂອງຕົນກໍມີງົວ-ຄວາຍຕິດພະຍາດນີ້ແລ້ວ 100% ໃນນີ້ມີງົວຕາຍ 15 ໂຕ, ຄວາຍ 2 ໂຕ. ຮອດປັດຈຸບັນນີ້ທົ່ວບ້ານສາມາດຄວບຄຸມ ແລະ ປິ່ນປົວດີແລ້ວ 70% ຂອງຈຳນວນສັດຕິດເຊື້ອທັງໝົດ. ຕໍ່ກັບສະພາບດັ່ງກ່າວ ທາງບ້ານໄດ້ຫ້າມບໍ່ໃຫ້ປ່ອຍສັດຊະຊາຍ, ຫ້າມຄ້າຂາຍ ແລະ ຮັບປະທານຊີ້ນສັດຕາຍ, ທຸກຄົນຕ້ອງຕິດຕາມງົວ-ຄວາຍຂອງຕົນວ່າມີອາການແນວໃດ ຖ້າຜິດປົກກະຕິຕ້ອງລາຍງານສັດຕະວະແພດບ້ານ ແລະ ພາກສ່ວນກ່ຽວຂ້ອງດ່ວນ ເພື່ອຮັບປະກັນໃຫ້ການປິ່ນປົວ ເພື່ອປ້ອງກັນບໍ່ໃຫ້ພະຍາດດັ່ງກ່າວຂະຫຍາຍເປັນບໍລິເວນກວ້າງ ແລະ ຮຽກຮ້ອງເອົາໃຈໃສ່ນຳສັດລ້ຽງຂອງຕົນມາສັກຢາປ້ອງກັນພະຍາດໃຫ້ຄົບຕາມຮອບວຽນປີລະ 2 ເທື່ອ ແລະ ເອົາໃຈໃສ່ເບິ່ງແຍງສຸຂະພາບສັດລ້ຽງຂອງຕົນໃຫ້ດີ.
