ລີເວີພູລ ຢືນຢັນປ່ອຍ ຄູຕິນໂຢ ໃຫ້ກັບ ບາເຊໂລນາ 160 ລ້ານເອີໂຣ
ລີເວີພູລ ປະກາດປ່ອຍຕົວ ຟິລິບເປ ຄູຕິນໂຢ ນັກເຕະຄົນສຳຄັນຊາວບຣາຊິນ ໃຫ້ກັບ ບາເຊໂລນາ ເປັນທີ່ຮຽບຮ້ອຍແລ້ວ ຄາດຄ່າຈ້າງຢູ່ທີ່ 160 ລ້ານເອີໂຣ ແບ່ງເປັນ ຄ່າຈ້າງຄົງທີ່ 120 ລ້ານເອີໂຣ ບວກກັບໂບນັສອີກ 40 ລ້ານເອີໂຣ.
ຈາກຂ່າວຫລ້າສຸດ, ລີເວີພູລ ໄດ້ຖະແຫລງການປ່ອຍຕົວ ຄູຕິນໂຢ ໃຫ້ກັບ ບາເຊໂລນາ ທີມໃນລາລີກາ ສະເປນ ຮຽບຮ້ອຍແລ້ວ ໂດຍເຫລືອພຽງການກວດຮ່າງກາຍ ແລະ ຕົກລົງເງື່ອນໄຂສ່ວນຕົວເທົ່ານັ້ນ. ນອກຈາກນີ້ ບາເຊໂລນາ ຍັງປ່ອຍຄລິບວີດີໂອສັ້ນ ເພື່ອຕ້ອນຮັບການມາຮ່ວມທີມຂອງນັກເຕະຄົນດັ່ງກ່າວ.
ກອງກາງອາຍຸ 25 ປີຄົນດັ່ງກ່າວ ລີເວີພູລ ດຶງຕົວຈາກ ອິນເຕີ ມິລານ ໃນລາຄາພຽງ 8,5 ລ້ານປອນ ເຊິ່ງຖ້າລາຄາຊື້-ຂາຍຄັ້ງນີ້ຈົບທີ່ 160 ລ້ານເອີໂຣ ກໍຈະເຮັດໃຫ້ລາວກາຍເປັນນັກເຕະທີ່ຄ່າຕົວແພງທີ່ສຸດອັນດັບ 3 ຂອງໂລກ ຮອງຈາກ ເນມາ 222 ລ້ານເອີໂຣ ແລະ ຄີລີຢັນ ເອັມບັບເປ 180 ລ້ານເອີໂຣ.
