ປີຜ່ານມາລາວສາມາດຄວບຄຸມລາຄາສີນຄ້າໄດ້ດີສົມຄວນ
ຮອງຫົວໜ້າກົມການຄ້າພາຍໃນກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ປີຜ່ານມາ, ຂະແໜງການກ່ຽວຂ້ອງນັບທັງສູນກາງ ແລະ ທ້ອງຖິ່ນໄດ້ເອົາໃຈໃສ່ຄຸ້ມຄອງ ແລະ ຕິດຕາມກວດກາລາຄາສີນຄ້າປະເພດເຄື່ອງອຸປະໂພກ-ບໍລິໂພກຢູ່ໃນທ້ອງຕະຫລາດຢ່າງເປັນປົກກະຕິ ເພື່ອບໍ່ໃຫ້ລາຄາສີນຄ້າໃນໝວດຈໍາເປັນຈໍານວນໜຶ່ງເໜັງຕິງຂຶ້ນແຮງ, ໂດຍສະເພາະໝວດສະບຽງອາຫານເຊັ່ນ: ເຂົ້າ, ຊີ້ນ, ປາ, ນໍ້າມັນ, ພືດຜັກ ແລະ ອື່ນໆ. ແຕ່ກໍຍອມຮັບວ່າຍັງມີສີນຄ້າບາງໝວດ, ບາງປະເພດ ໄດ້ມີການເໜັງຕິງຂຶ້ນລົງເລັກໜ້ອຍ, ຍ້ອນປັດໃຈການຜະລິດ, ການສະໜອງບໍ່ພຽງພໍກັບຄວາມຕ້ອງການຂອງຕະຫລາດໃນໄລຍະໃດໜຶ່ງ ໂດຍສະເພາະໃນຊ່ວງເທດສະການ ແລະ ລະດູການຜະລິດ ແລະ ອີກປັດໃຈໜຶ່ງກໍຍ້ອນພວກເຮົາຍັງມີການນໍາເຂົ້າສີນຄ້າຈາກຕ່າງປະເທດເປັນຈໍານວນຫລາຍ ເປັນຕົ້ນ: ນໍ້າມັນເຊື້ອໄຟ, ວັດສະດຸກໍ່ສ້າງ, ຫົວອາຫານສັດ, ແນວພັນພືດ-ສັດ, ວັກແຊງ ແລະ ສີນຄ້າອື່ນໆ ຈຶ່ງເຮັດໃຫ້ລາຄາສີນຄ້າມີການເໜັງຕິງ, ແຕ່ກໍເຫັນວ່າຢູ່ໃນລະດັບທີ່ສາມາດຄວບຄຸມໄດ້ ແລະ ພິເສດເມື່ອປີຜ່ານມານີ້, ກະຊວງອຸດສະຫະກໍາ ແລະ ການຄ້າ ກໍໄດ້ເປີດໂທລະສັບສາຍດ່ວນໝາຍເລກ 1510 ເພື່ອໃຫ້ສັງຄົມ ກໍຄືຜູ້ບໍລິໂພກສາມາດແຈ້ງຕໍ່ຂະແໜງການກ່ຽວຂ້ອງເມື່ອພົບເຫັນການສວຍໂອກາດຂຶ້ນລາຄາໂດຍລໍາພັງໃຈ, ໂລບຕາຊິງ ຫລື ຖືກເອົາປຽບໃນດ້ານການຄ້າ ແລະ ການບໍລິການອື່ນໆ, ຊຶ່ງເຫັນວ່າມີປະຊາຊົນສະເໜີບັນຫາຕ່າງໆມາຫາຫລາຍສົມຄວນ.
ທ່ານຮອງຫົວໜ້າກົມດັ່ງກ່າວ ໃຫ້ຮູ້ວ່າ: ການຄຸ້ມຄອງລາຄາສິນຄ້າ ແລະ ຄ່າບໍລິການຢູ່ປະເທດເຮົາໃນໄລຍະຜ່ານມາ, ແມ່ນມີຫລາຍນິຕິກໍາເປັນບ່ອນອິງ, ໂດຍສະເພາະດຳລັດຂອງນາຍົກລັດຖະມົນຕີສະບັບເລກທີ 474/ນຍ, ລົງວັນທີ 18 ພະຈິກ 2010 ວ່າດ້ວຍການຄຸ້ມຄອງລາຄາສີນຄ້າ, ບົດແນະນຳການຈັດຕັ້ງປະຕິບັດດຳລັດ 474/ນຍ, ຂໍ້ຕົກລົງວ່າດ້ວຍລາຄາສິນຄ້າ ແລະ ຄ່າບໍລິການຂອງຂະແໜງອຸດສະຫະກໍາ ແລະ ການຄ້າ, ຂໍ້ກຳນົດວ່າດ້ວຍການກຳນົດລາຍການສິນຄ້າ, ຂໍ້ຕົກລົງວ່າດ້ວຍການຄຸ້ມຄອງລາຄາສິນຄ້າໃນທ້ອງຕະຫລາດ, ແຈ້ງການກ່ຽວກັບການກຳນົດລາຄາຊີ້ນໝູ ແລະ ນິຕິກໍາອື່ນໆຈຳນວນໜຶ່ງ ແລະ ໃນປີ 2017 ໄດ້ມີການປັບລາຄານໍ້າມັນເຊື້ອໄຟທັງໝົດ 14 ຄັ້ງ, ໃນນັ້ນປັບຂຶ້ນ 10 ຄັ້ງ, ປັບລົງ 4 ຄັ້ງ ແລະ ສະເລ່ຍການປັບລາຄາຂຶ້ນລົງຢູ່ລະຫວ່າງ 8-15% ເມື່ອທຽບໃສ່ປີ 2016. ເພື່ອແນໃສ່ຮັກສາສະຖຽນລະພາບທາງດ້ານລາຄາ, ທັງເປັນການປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ດຳເນີນທຸລະກິດ, ຜູ້ຊົມໃຊ້ ແລະ ຜົນປະໂຫຍດຂອງລັດ.
