ເຈົ້າໜ້າທີ່ ປກສ ແຂວງຫລວງນໍ້າທາທໍາລາຍສວນຝິ່ນມີເນື້ອທີ່ 1,5 ເຮັກຕາ
ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງຫລວງນໍ້າທາ, ໄດ້ນໍາກໍາລັງລົງທໍາລາຍສວນຝິ່ນຂອງປະຊາຊົນທີ່ລັກລອບປູກຕາມຮ່ອມພູສອງຈຸດໃນເຂດເມືອງລອງແຂວງດັ່ງກ່າວລວມມີເນື້ອທີ່ 1,5 ເຮັກຕາທີ່ພວມອອກດອດ ແລະ ສ່ວນໜຶ່ງແມ່ນສາມາດກີດຢາງໄດ້ແລ້ວ, ໂດຍເຈົ້າໜ້າທີ່ຈະເລັ່ງສືບສວນ-ສອບສວນຫາຜູ້ລັກລອບປູກຝິ່ນດັ່ງກ່າວມາດໍາເນີນຄະດີຕາມລະບຽບກົດໝາຍໂດຍໄວ.
ເຈົ້າໜ້າທີ່ ໃຫ້ຮູ້ວ່າ: ຜ່ານມາ, ພັກ-ລັດຖະບານ ໄດ້ຖືສຳຄັນວຽກງານຄວບຄຸມ, ສະກັດກັ້ນການປູກຝິ່ນ ແລະ ພືດເສບຕິດຊະນິດຕ່າງໆ, ໂດຍສະເພາະມອບໃຫ້ເຈົ້າໜ້າທີ່ທ້ອງຖິ່ນ ກໍຄືອຳນາດການປົກຄອງທຸກຂັ້ນເອົາໃຈໃສ່ຕິດຕາມກວດກາສະພາບດັ່ງກ່າວໃນເຂດຂອງຕົນຢ່າງເຂັ້ມງວດ, ໄປຄຽງຄູ່ກັບການປຸກລະດົມຊຸກຍູ້ສົ່ງເສີມໃຫ້ປະຊາຊົນຢຸດຕິການປູກຝິ່ນຢ່າງສິ້ນເຊິງ ແລະ ຫັນມາປູກຝັງ-ລ້ຽງສັດຜະລິດເປັນສິນຄ້າສ້າງລາຍຮັບໃຫ້ຄອບຄົວດີຂຶ້ນເທື່ອກ້າວໆ. ແຕ່ກໍເຫັນວ່າຍັງມີປະຊາຊົນຢູ່ເຂດພູດອຍຫ່າງໄກສອກຫລີກຈຳນວນໜຶ່ງລັກລອບປູກຝິ່ນໂດຍບໍ່ຢ້ານກົວຕໍ່ລະບຽບກົດໝາຍບ້ານເມືອງ, ເຊິ່ງເຈົ້າໜ້າທີ່ຈະໄດ້ເຂັ້ມງວດຕໍ່ການປາບປາມຜູ້ກະທໍາຜິດດັ່ງກ່າວໃຫ້ມີຄວາມເຂັດຫລາບ.
