ສະໂມສອນ ສະໝຸດປຣາການ ເອັຟຊີ ເຊັນສັນຍາ ທົດນິລາດ ລຸຍການແຂ່ງຂັນໄທລີກ
ໃນວັນທີ 1 ມັງກອນ 2018 ເວັບໄຊທາງການຂອງສະໂມສອນ ສະໝຸດປຣາການ ເອັຟຊີ (SAMUTPRAKAN FC) ທີມຮອງແຊ້ມຈາກໄທລີກ 4 ໃນປີຜ່ານມາ ໄດ້ເຊັນສັນຍາກັບທ້າວ ທົດນິລາດ ສີບຸນເຮືອງ (ເຊົ໋າລິນ) ອາຍຸ 27 ປີ ເຊິ່ງຫລິ້ນໃນຕຳແໜ່ງກອງຫລັງ ຫົວໜ້າທີມຊາດລາວຊຸດໃຫຍ່ ເຂົ້າຮ່ວມທີມພ້ອມເຂົ້າແຂ່ງຂັນໄທລີກ 4 ໃນປີ 2018.
ທ້າວ ທົດນິລາດ ສີບຸນເຮືອງ ເກີດໃນວັນທີ 5 ພະຈິກ 1990 ທີ່ບ້ານສີເມືອງ ເມືອງສີສັດຕະນາກ ນະຄອນຫລວງວຽງຈັນ, ເຄີຍຫລິ້ນໃຫ້ສະໂມສອນ ນະຄອນຫລວງ ເອັຟຊີ, ສະໂມສອນ ຮ່ວາງແອ໋ງ ອັດຕະປື ເອັຟຊີ, ສະໂມສອນ ໄຟຟ້າລາວ ເອັຟຊີ ແລະ ໃນປີຜ່ານມາຫລິ້ນໃຫ້ກັບສະໂມສອນ ນະຄອນຫລວງ ຢູໄນເຕັດ ແລະ ສະໂມສອນ ທິບສະຫວັນ ເອັຟຊິ, ສ່ວນຜົນງານລະດັບທີມຊາດ ເປັນກຳລັງຫລັກໃຫ້ທີມຊາດລາວຊຸດປັດຈຸບັນ ເຊິ່ງໄດ້ຮັບໜ້າທີ່ເປັນຫົວໜ້າທີມຊາດລາວໃນລາຍການ CTFA INTERNATIONAL TOURNAMENT 2017 ທີ່ໄຕ້ຫວັນຜ່ານມາ.
ທ້າວ ທົດນິລາດ ເປັນນັກເຕະຄົນລາວຄົນທຳອິດທີ່ໄດ້ລົງຫລິ້ນໃຫ້ກັບສະໂມສອນ ສະໝຸດປຣາການ ເອັຟຊີ ແລະ ເປັນຄົນທີ 11 ທີ່ຫລິ້ນໃນລີກອາຊີບທີ່ປະເທດໄທ ເຊິ່ງມີນັກເຕະລາວທີ່ເຄີຍຫລິ້ນໃນລີກອາຊີບກ່ອນໜ້ານັ້ນປະກອບມີ ລຳເນົາ ສິງໂຕ, ກັນລະຍາ ສີສົມຫວັງ, ຄຳແພງ ໄຊຍະວຸດ, ສຸກອາພອນ ວົງຈຽງຄຳ, ເກດສະດາ ສຸກສະຫວັນ, ແລມໂບ້ ໄຊຊະນະ, ໂສພາ ໄຊຊະນະ, ມະໂນລົມ ພົມສຸວັນ, ທານິນ ພັນທະວົງ ແລະ ພັດທະນາ ພົມມະເທບ.
ມາຮອດປັດຈຸບັນ ໃນປີ 2018 ມີນັກເຕະລາວ ທີ່ໄດ້ເຊັນສັນຍາເປັນທາງການຮ່ວມສະໂມສອນ ຈາກໄທ ປະກອບມີ ພັດທະນາ ພົມມະເທບ ສະໂມສອນ ຊົນບູຣີ ເອຟຊີ ແລະ ທົດນິລາດ ສີບຸນເຮືອງ ສະໂມສອນ ສະໝຸດປຣາການ ເອັຟຊີ.
