ອິນໂດເນເຊຍເປີດແລ່ນລົດໄຟ ເຊື່ອມສະໜາມບິນກັບເມືອງຫລວງ
ອິນໂດເນເຊຍເປີດແລ່ນລົດໄຟເຊື່ອມສະໜາມບິນສາກົນຊູກາຣໂນ-ຮັດຕາກັບນະຄອນຫລວງຈາກາຕາເສັ້ນທຳອິດແລ້ວ ໃນວັນທີ 2 ມັງກອນນີ້ ຊ່ວຍໃຫ້ເດີນທາງຈາກສະໜາມບິນເຂົ້າມາໃຈກາງເມືອງໄວກວ່າເກົ່າຢ່າງໜ້ອຍ 30 ນາທີ.
ປະທານາທິບໍດີ ໂຈໂກ ວິໂດໂດ ກ່າວເປີດພິທີວ່າ: ລົດໄຟເຊື່ອມສະໜາມບິນສາກົນຊູກາຣໂນ-ຮັດຕາກັບໃຈກາງເມືອງຫລວງສຳເລັດແລ້ວ ພາຍຫລັງໃຊ້ເວລາກໍ່ສ້າງ 3 ປີ ເປັນວິທີເດີນທາງເຂົ້ານະຄອນຫລວງຈາກາຕາດ້ວຍລົດສາທາລະນະເພື່ອບັນເທົາບັນຫາຈະລາຈອນແອອັດ ໄລຍະທາງ 38 ກິໂລແມັດ ໃຊ້ເວລາເດີນທາງ 55 ນາທີ ໄວກວ່າການຂັບລົດຢ່າງໜ້ອຍ 30 ນາທີ.
ທາງການອິນໂດເນເຊຍຫວັງວ່າ: ຈະຈູງໃຈໃຫ້ຄົນເດີນທາງໄປ ຫລື ກັບສະໜາມບິນດ້ວຍລົດໄຟນີ້ແທນການໃຊ້ລົດສ່ວນຕົວ, ໃຊ້ງົບປະມານການກໍ່ສ້າງທັງໝົດ 3,6 ຕື້ຣູເປຍ ໃຫ້ບໍລິການວັນລະ 42 ຖ້ຽວ, ມີລົດໄຟທັງໝົດ 3 ຂະບວນ ຄາດວ່າຈະມີຜູ້ໃຊ້ບໍລິການວັນລະ 11.000 ຄົນ, ຄ່າໂດຍສານໄລຍະ 2 ເດືອນທຳອິດຖ້ຽວລະ 70.000 ຣູເປຍ ຈາກນັ້ນຈະປັບຂຶ້ນເປັນ 100.000 ຣູເປຍ.
ການເປີດລົດໄຟເສັ້ນນີ້ມີຂຶ້ນກ່ອນນະຄອນຫລວງຈາກາຕາຈະເປັນເຈົ້າພາບອາຊຽນເກມ 2018 ໃນເດືອນສິງຫາ, ຄາດວ່າຈະມີນັກກິລາມາຮ່ວມແຂ່ງຂັນສູງເຖິງ 9.500 ຄົນ. ນອກຈາກນີ້ ນະຄອນຫລວງຈາກາຕາຍັງຢູ່ລະຫວ່າງກໍ່ສ້າງລົດໄຟໃຕ້ດິນເສັ້ນທຳອິດ ແລະ ລົດລາງເບົາ, ຕັ້ງເປົ້າໃຫ້ບໍລິການໄດ້ໃນປີ 2019.
