ນັບຖອຍຫລັງປີນີ້ຢູ່ນະຄອນຫລວງວຽງຈັນບໍ່ມີຜູ້ເສຍຊີວິດຈາກອຸປະຕິເຫດ
ເຈົ້າໜ້າທີ່ຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ໃນມື້ສົ່ງທ້າຍປີເກົ່າ 2017 ແລະ ຕ້ອນຮັບປີໃໝ່ 2018 ຢູ່ນະຄອນຫລວງວຽງຈັນມີອຸປະຕິເຫດເກີດຂຶ້ນ 12 ກໍລະນີ, ບໍ່ມີຜູ້ເສຍຊີວິດ, ທຽບໃສ່ໃນປີຜ່ານມາເຫັນວ່າ: ຈຳນວນອຸປະຕິເຫດແມ່ນຫລຸດລົງ, ເນື່ອງຈາກເຈົ້າໜ້າທີ່ໄດ້ເອົາໃຈໃສ່ໃນການກວດກາຍວດຍານພາຫະນະ ແລະ ກວດທາດເຫລົ້າເຮັດໃຫ້ນັກຂັບຂີ່ມີສະຕິໃນການປະຕິບັດລະບຽບຈະລາຈອນດີຂຶ້ນ.
ຫົວໜ້າພະແນກຈະລາຈອນນະຄອນຫລວງ ໃຫ້ຮູ້ວ່າ: ໃນໄລຍະສົ່ງທ້າຍປີເກົ່າ ແລະ ຕ້ອນຮັບປີໃໝ່ 2018, ເຈົ້າໜ້າທີໄດ້ເພີ່ມມາດຕະການເຂັ້ມງວດກວດກາທາດເຫລົ້າ, ຈັບຄວາມໄວ ແລະ ກວດກາຜູ້ຂັບຂີ່ຕາມທ້ອງຖະໜົນກວ່າ 12 ຈຸດ, ໂດຍຈະເລີ່ມລົງມືປະຕິບັດນັບແຕ່ວັນທີ 25 ທັນວາຫາ 1 ມັງກອນ 2018. ແຕ່ເຖິງປານນັ້ນກໍຍັງມີອຸປະຕິເຫດເກີດຂຶ້ນ 38 ກໍລະນີສົ່ງຜົນໃຫ້ມີຜູ້ເສຍຊີວິດ 5 ຄົນ, ສະພາບອຸປະຕິເຫດຢູ່ນະຄອນຫລວງວຽງຈັນຍັງມີຕົວເລກສູງກວ່າບັນດາແຂວງອື່ນໆໃນທົ່ວປະເທດຄື: ໃນປີຜ່ານມາ, ຢູ່ນະຄອນຫລວງວຽງຈັນ ມີອຸປະຕິເຫດເກີດຂຶ້ນກວ່າ 1.500 ກໍລະນີ, ມີຄົນເສຍຊີວິດ 251 ຄົນ, ໂດຍສາເຫດສ່ວນໃຫຍ່ແມ່ນມາຈາກຜູ້ຂັບຂີ່ດື່ມສິ່ງມືນເມົາ, ບໍ່ເຄົາລົບລະບຽບຈະລາຈອນ.
