ເດືອນທັນວານີ້ມີຫລາຍບັນຫາລັດຖະບານໄດ້ແກ້ໄຂ

ໃນກອງປະຊຸມລັດຖະບານປະຈໍາເດືອນທັນວາທີ່ຈັດຂຶ້ນເມື່ອບໍ່ດົນມານີ້, ໂດຍພາຍໃຕ້ການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຍົກໃຫ້ເຫັນວ່າ: ໃນເດືອນທັນວານີ້, ລັດຖະບານໄດ້ເອົາໃຈໃສ່ສືບຕໍ່ແກ້ໄຂບັນຫາສໍາຄັນຕ່າງໆໃນດ້ານເສດຖະກິດຂອງຊາດ, ໄປຄຽງຄູ່ກັບການແກ້ໄຂສະພາບຫຍໍ້ທໍ້ຂອງສັງຄົມຕ່າງໆຜ່ອນຜັນລົງ, ແນໃສ່ສ້າງເງື່ອນໄຂອໍານວຍໃຫ້ແກ່ການພັດທະນາປະເທດຊາດເຂັ້ມແຂງ ແລະ ຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ອັນສໍາຄັນໄດ້ດໍາເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອພິຈາລະນາການແກ້ໄຂບັນຫາສະພາບລັກລອບຄ້າໄມ້ ແລະ ຂຸດຄົ້ນແຮ່ຄໍາທີ່ເກີດຂຶ້ນຢູ່ບາງທ້ອງຖິ່ນ, ການປະຕິບັດໂຄງການກໍ່ສ້າງທາງປຸຢາງສອງຊັ້ນ 3 ເສັ້ນຢູ່ແຂວງໄຊສົມບູນ, ການແຕ່ງຕັ້ງຄະນະຊີ້ນໍາລະດັບຊາດເພື່ອໄກ່ເກຍ ແລະ ຄ່າຊົດເຊີຍໂຄງການລົງທຶນຂະໜາດໃຫຍ່ຂອງລັດ ແລະ ເອກະຊົນ, ການອະນຸຍາດເປີດນໍາໃຊ້ທ່າເຮືອຢູ່ເຂດສາມຫລ່ຽມຄໍາເປັນທ່າເຮືອສາກົນເມືອງຕົ້ນເຜິ້ງແຂວງບໍ່ແກ້ວ, ແຜນຈັດຊື້ລົດປະຈໍາຕໍາແໜ່ງການນໍາຂັ້ນສູງ, ແກ້ໄຂສະພາບການນໍາເຂົ້າລົດບໍ່ຖືກຕ້ອງ, ແກ້ໄຂບັນຫາການລົງທຶນພັດທະນາໂຮງງານຊີມັງຢູ່ແຂວງຫລວງພະບາງ ແລະ ອື່ນໆ.

ກອງປະຊຸມຄັ້ງນີ້, ຍັງໄດ້ພິຈາລະນາຮ່າງກົດໝາຍວ່າດ້ວຍທະບຽນຄອບຄົວສະບັບປັບປຸງ, ຮ່າງກົດໝາຍວ່າດ້ວຍການປ່ຽນແປງຂອງສະພາບດິນຟ້າອາກາດ, ຮ່າງກົດໝາຍວ່າດ້ວຍການຈັດສັນພູມລໍາເນົາ ແລະ ຮ່າງກົດໝາຍວ່າດ້ວຍວັກແຊງ, ດໍາລັດວ່າດ້ວຍພະນັກງານລັດວິສາຫະກິດ ແລະ ດໍາລັດວ່າດ້ວຍເຂດເສດຖະກິດພິເສດສະບັບປັບປຸງ ເພື່ອໃຫ້ພາກສ່ວນກ່ຽວຂ້ອງນໍາໄປປັບປຸງຕາມການປະກອບຄໍາເຫັນຂອງສະມາຊິກລັດຖະບານໃຫ້ມີເນື້ອໃນຮັດກຸມສົມບູນຂຶ້ນຕື່ມ.