IS ອ້າງເປັນຜູ້ກໍ່ເຫດລະເບີດໂບດຄຣິສ 2 ແຫ່ງຢູ່ເອຢິບ ຂະນະທີ່ເລຂາ ສປຊ ອອກມາປະນາມຮຸນແຮງ
ກຸ່ມລັດອິສລາມ (IS) ໄດ້ອອກມາອ້າງວ່າເປັນຜູ້ລົງມືກໍ່ເຫດລະເບີດໂບດຄຣິສນິກາຍຄອບຕິກ 2 ແຫ່ງຢູ່ເມືອງຕັນຕະ ແລະ ເມືອງອາເລັກຊານເດຍ ເຊິ່ງສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 45 ຄົນ ແລະ ບາດເຈັບຫລາຍກວ່າ 100 ຄົນ ໃນວັນທີ 9 ເມສານີ້.
ທັງນີ້ ເຫດລະເບີດເທື່ອທຳອິດເກີດຂຶ້ນຢູ່ໂບດ ເຊິ່ງຕັ້ງຢູ່ບໍລິເວນສາມຫລ່ຽມປາກແມ່ນ້ຳນາຍ ເມືອງຕັນຕະ ຫ່າງຈາກທາງຕອນເໜືອຂອງນະຄອນຫລວງໄຄໂຣປະມານ 80 ກິໂລແມັດ ໂດຍເຫດການດັ່ງກ່າວເກີດຂຶ້ນໃນຕອນທ່ຽງ ໃນລະຫວ່າງທີ່ມີການສະເຫລີມສະຫລອງເທດສະການປາມຊັນເດ ແລະ ຈາກນັ້ນກໍໄດ້ເກີດເຫດລະເບີດຂ້າຕົວຕາຍຢູ່ໂບດນິກາຍຄອບຕິກອີກແຫ່ງໜຶ່ງ ໃນເມືອງອາເລັກຊານເດຍ.
ປະທານາທິບໍດີ ອັບເດວ ຟັດຕາ ອານ ຊິຊີ ຂອງເອຢິບ ໄດ້ປະກາດສະຖານະການສຸກເສີນພາຍໃນປະເທດເປັນເວລາ 3 ເດືອນ ໂດຍກ່າວວ່າ: ທາງລັດຖະບານກຽມໃຊ້ມາດຕະການຫລາຍດ້ານ ເຊິ່ງມາດຕະການສຳຄັນທີ່ສຸດຄືການປະກາດສະຖານະການສຸກເສີນເປັນເວລາ 3 ເດືອນ. ນອກຈາກນີ້ ລັດຖະບານໄດ້ມີການຈັດຕັ້ງສະພາສູງສຸດ ເພື່ອຕໍ່ສູ້ກັບກຸ່ມກໍ່ການຮ້າຍ ແລະ ກຸ່ມຫົວຮຸນແຮງຢູ່ເອຢິບ.
ສ່ວນທາງ ອັນໂຕນິໂອ ກູເຕີເຣສ ເລຂາທິການອົງການສະຫະປະຊາຊາດ (ສປຊ) ໄດ້ອອກມາປະນາມການກະທຳດັ່ງກ່າວຢ່າງຮຸນແຮງ, ພ້ອມສະແດງຄວາມເສຍໃຈຕໍ່ລັດຖະບານເອຢິບ ແລະ ຄອບຄົວຜູ້ເສຍຊີວິດ.
