ການແຂ່ງຂັນກ໊ອຟ ແດນສະຫວັນ ອາເມເຈີ ໂອເພັນ 2018 ຈະມີຂຶ້ນໃນວັນທີ 13-14 ມັງກອນ
ວັນທີ 28 ທັນວານີ້, ກະຊວງສຶກສາທິການ ແລະ ກິລາ ຮ່ວມກັບ ສະຫະພັນ ກິລາກ໊ອຟແຫ່ງຊາດລາວ, ສະໜາມກ໊ອຟແດນສະຫວັນ ແລະ ພາກສ່ວນກ່ຽວຂ້ອງ ໄດ້ຮ່ວມກັນຖະແຫລງຂ່າວຕໍ່ສື່ມວນຊົນວ່າ: ວັນທີ 13-14 ມັງກອນນີ້, ຈະຈັດໃຫ້ມີການແຂ່ງຂັນກ໊ອຟ ແດນ ສະຫວັນ ອາເມເຈີ້ ໂອເພັ້ນ 2018 (Dansavanh Amateur Open 2018), ຂຶ້ນທີ່ສະໜາມກ໊ອຟແດນ ສະຫວັນ, ພູເຂົາຄວາຍ, ແຂວງວຽງຈັນ, ເພື່ອຊີງຂັນກຽດຕິຍົດຂອງທ່ານລັດ ຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍຂອງລາງວັນອື່ນໆຢ່າງຫລວງ ຫລາຍ.
ທ່ານປະທານຈັດການແຂ່ງຂັນ ໃຫ້ຮູ້ວ່າ: ການແຂ່ງຂັນດັ່ງກ່າວ ຈຸດປະສົງຫລັກ ກໍເພື່ອແນໃສ່ສົ່ງເສີມການທ່ອງທ່ຽວລາວໃຫ້ມີຂະບວນຟົດຟື້ນ ແລະ ກວ້າງຂວາງ, ພ້ອມເປັນການພັດທະນາວົງການກິລາກ໊ອຟສະໝັກຫລີ້ນຂອງລາວ ສາມາດເຊື່ອມໂຍງເຂົ້າກັບຂົງເຂດ ແລະ ສາກົນເທື່ອລະກ້າວ ແລະ ຍັງເປັນການຝຶກຊ້ອມໃຫ້ນັກກິລາກ໊ອຟລາວ ທີ່ຈະເຂົ້າ ຮ່ວມໃນງານມະຫາກຳກິລາແຫ່ງຊາດຄັ້ງທີ XI ທີ່ແຂວງຊຽງຂວາງເປັນເຈົ້າພາບໃນ ເດືອນພະຈິກ 2018 ນີ້ອີກດ້ວຍ.
ສຳລັບຜູ້ເຂົ້າຮ່ວມການແຂ່ງຂັນຄັ້ງນີ້ ຈະຕ້ອງເປັນນັກກິລາສະໝັກຫລີ້ນເທົ່ານັ້ນ, ໂດຍບໍ່ຈຳກັດເພດ, ໄວ ແລະ ອື່ນໆ, ຊຶ່ງການແຂ່ງຂັນໄດ້ແບ່ງອອກເປັນ 2 ຮອບຄື: ຮອບ ທີ 1 ໃນວັນທີ 13 ມັງກອນ 2018 ແລະ ຮອບທີ 2 ໃນວັນທີ 14 ມັງກອນ 2018, ຜູ້ທີ່ຊະນະເລີດ ຈະໄດ້ຮັບຂັນກຽດຕິຍົດ ຂອງທ່ານລັດຖະມົນຕີກະຊວງສຶກສາທິການ ແລະ ກິລາ, ພ້ອມທັງຂອງສົມມະນາຄຸນຈາກແດນສະຫວັນ ແລະ ຜູ້ໃຫ້ການສະໜັບສະໜູນອື່ນໆຢ່າງຫລວງຫລາຍ. ນອກນີ້ ຍັງມີລາງວັນຮອງຊະນະເລີດ, ລາງວັນຊົມເຊີຍ ແລະ ອື່ນໆ ອີກດ້ວຍ.
