ໂດ້-ເມສຊີ-ເດເຄອາ ! ສື່ດັງຈັດທີມດີເດັ່ນປີ 2017
ສະຕາຣສະປອດ ສື່ກິລາດັງປະກາດທີມດີເດັ່ນໃນລີກເອີຣົບປະຈຳປີ 2017 ຈາກຜົນການໂຫວດຂອງແຟນບານທົ່ວໂລກ ນຳທີມມາໂດຍ ຄຣິສເຕຍໂນ ໂຣນັລໂດ ຊູເປີສະຕາຣ ຣີລ ມາດຣິດ, ລີໂອເນລ ເມສຊີ ກອງໜ້າ ບາເຊໂລນາ ແລະ ດາບິດ ເດ ເຄອາ ຜູ້ຮັກສາປະຕູຂອງ ແມນເຊັສເຕີ ຢູໄນເຕັດ.
ທີມດີເດັ່ນປີ 2017 ຂອງ ສະຕາຣສະປອດ ໃນລະບົບ 4-2-3-1
ຜູ້ຮັກສາປະຕູ: ດາບິດ ເດ ເຄອາ
ຜູ້ຮັກສາປະຕູທີມຊາດສະເປນ ໂຊຟອມໄດ້ຢ່າງຄົງເສັ້ນຄົງວາໃຫ້ກັບ ແມນເຊັສເຕີ ຢູໄນເຕັດ ຈົນຖືກຍົກໃຫ້ເປັນໜຶ່ງໃນຜູ້ຮັກສາດີທີ່ສຸດໃນໂລກໄປແລ້ວ.
ແບັກຂວາ: ເຊຊາຣ ອັຊປິລິກວຍຕ້າ
ກອງຫລັງສະແປນິຊ ເປັນກຳລັງສຳຄັນທີ່ຊ່ວຍໃຫ້ ເຊລຊີ ຄວ້າແຊ້ມ ພຣີເມຍລີກ ໃນລະດູການຜ່ານມາ ແລະ ລະດູການນີ້ຍັງໂຊຟອມໄດ້ຄົງເສັ້ນຄົງວາ ໂດຍສາມາດຫລິ້ນໄດ້ທັງແບັກຂວາ, ແບັກຊ້າຍ ແລະ ເຊັນເຕີໃນລະບົບກອງຫລັງ 3 ຕົວ.
ເຊັນເຕີແບັກ: ເຊຣຄິໂອ ຣາມອສ
ຣາມອສ ໄດ້ຮັບການຍົກຍ້ອງວ່າເປັນປ້ອມປາການຫລັງລະດັບໂລກມາຫລາຍປີແລ້ວ ແລະ ໃນປີນີ້ຍັງສ້າງຜົນງານໄດ້ຕາມມາດຕະຖານ ໂດຍຄວ້າແຊ້ມກັບ ຣີລ ມາດຣິດ ແລະ ທີມຊາດສະເປນ ມາແລ້ວ 21 ລາຍການ.
ເຊັນເຕີແບັກ: ເລໂອນາຣໂດ້ ໂບນຸຊຊີ
ໂບນຸຊຊີ ມີປີທີ່ດີເດັ່ນກັບ ຢູເວນຕຸສ ຫລັງໄດ້ແຊ້ມ ເຊເຣຍ ອາ ແລະ ຜ່ານເຂົ້າເຖິງຮອບຊີງຊະນະເລີດ ຢູຟາ ແຊ້ມປ້ຽນລີກ ກ່ອນຈະຍ້າຍມາຢູ່ກັບ ເອຊີ ມິລານ ໃນລະດູການຜ່ານມາ.
ແບັກຊ້າຍ: ມາຣເຊໂລ
ມາເຊໂລ ເປັນກຳລັງຫລັກຂອງ ຣີລ ມາດຣິດ ມາເປັນເວລາ 10 ປີແລ້ວ ແລະ ຍັງໂຊຟອມໄດ້ດີ ທັງເກມບຸກ ແລະ ຮັບມາຕະຫລອດ.
ກອງກາງ: ເອັນໂກໂລ່ ກ໊ອງເຕ້
ກ໊ອງເຕ້ ເປັນອີກ 1 ກຳລັງສຳຄັນທີ່ຊ່ວຍໃຫ້ ເຊລຊີ ຄວ້າແຊ້ມ ພຣີເມຍລີກ ຫລັງລະດູການກ່ອນໜ້າໄດ້ພາ ເລສເຕີ ຊິຕີ້ ຄວ້າແຊ້ມມາແລ້ວ.
ກອງກາງ: ເຄວິນ ເດິ ບຣອຍ
ຫົວໃຈສຳຄັນໃນແດນກາງຂອງ ແມນເຊັສເຕີ ຊິຕີ້ ໃນຍຸກຂອງ ເປ໊ປ ກວາດິໂອລາ ໂດຍມີທີ່ເດັດທັງການເປີດບານ ແລະ ຍິງປະຕູເອງໄດ້ດີເດັ່ນ.
ປີກຂວາ: ລິໂອເນລ ເມສຊີ
ເມສຊີ ຍັງຍິງປະຕູໄດ້ຢ່າງຕໍ່ເນື່ອງໃຫ້ກັບ ບາເຊໂລນາ ລວມທັງການແຂ່ງຂັນຫລ້າສຸດທີ່ບຸກໄປຖະຫລົ່ມ ຣີລ ມາດຣິດ 3-0 ໃນທ້າຍອາທິດຜ່ານມາ.
ກອງກາງຕົວບຸກ: ເນຍມາ
ເຈົ້າຂອງຄ່າຕົວແພງສຸດໃນໂລກ ບໍ່ໄດ້ມີບັນຫາຫຍັງກັບການຍ້າຍມາຫລິ້ນໃຫ້ ປາຣີສ ແຊງແຊກແມງ ໂດຍໂຊຟອມສຸດຍອດ ທັງໃນລີກ ເອິງ ແລະ ແຊ້ມປ້ຽນ ລີກ.
ປີກຊ້າຍ: ຄຣິສເຕຍໂນ ໂຣນັລໂດ້
ໂຣນັລໂດ້ ຊ່ວຍໃຫ້ ຣີລ ມາດຣິດ ໄດ້ທັງແຊ້ມ ລາລີກາ, ແຊ້ມປ້ຽນລີກ ແລະ ສະໂມສອນໂລກ ກ່ອນຈະໄດ້ ບັນລັງດໍ ມາຄອງອີກສະໄໝ.
ກອງໜ້າ: ແຮຣີ ເຄນ
ເຄນ ຍິງປະຕູໃຫ້ກັບ ສະເປີ ແລະ ທີມຊາດອັງກິດ ເກີນ 50 ລູກແລ້ວໃນປີດຽວ ແລະ ຍັງມີລຸ້ນຈະຄວ້າຕຳແໜ່ງຜູ້ຍິງປະຕູໄດ້ຫລາຍ ໃນພຣີເມຍລີກ ອີກສະໄໝ.
