ຮາມັດເຕືອນປາແລັສຕິນຢ່າຮັບຂໍ້ສະເໜີ ອາເມລິກາເລື່ອງເຢລູຊາເລມ
ຜູ້ນຳກຸ່ມຮາມັດເຕືອນລັດຖະບານປາແລັສຕິນຢ່າຍອມຮັບຄວາມຄິດຂອງອາເມລິກາ ເຊິ່ງສະເໜີເຢລູຊາເລມໃຫ້ຕັ້ງເປັນເມືອງຫລວງແທນພື້ນທີ່ເບື້ອງຕາເວັນອອກ.
https://twitter.com/megan_otoole/status/945918084849782785
ສຳນັກຂ່າວຕ່າງປະເທດລາຍງານຈາກເມືອງກາຊາ ເຂດກາຊາ ໃນວັນທີ 27 ທັນວາວ່າ: ທ່ານ ອິສມາອິລ ຮານິເຍາະ ຜູ້ນຳກຸ່ມຮາມັດ ຖະແຫລງໃນວັນທີ 26 ທັນວາວ່າ: ນະໂຍບາຍເລື່ອງນະຄອນຫລວງເຢລູຊາເລມທີ່ລັດຖະບານວໍຊິງຕັນຊຸດປັດຈຸບັນຂອງປະທານາທິບໍດີ ໂດນັນ ທຣຳ ປະກາດໃນວັນທີ 6 ທັນວາ ຄືຄວາມພະຍາຍາມຂອງອາເມລິກາໃນການເຮັດໃຫ້ປາແລັສຕິນຕ້ອງສິ້ນຊາດ ພາຍໃຕ້ຂໍ້ຕົກລົງທີ່ອ້າງວ່າເປັນ “ຂໍ້ຕົກລົງແຫ່ງສະຕະວັດ”.
ທັງນີ້, ທ່ານ ຮານິເຍາະ ອ້າງການໄດ້ຮັບ “ຂໍ້ມູນທີ່ມີນ້ຳໜັກຈາກແຫລ່ງຂ່າວທີ່ເຊື່ອຖືໄດ້” ວ່າ: ລັດຖະບານວໍຊິງຕັນກຳລັງວິ້ງເຕັ້ນຢ່າງໜັກ ໃນການເຈລະຈາກັບປະທານາທິບໍດີ ມາມຸດ ອັບບັດ ກ່ຽວກັບສະຖານະຂອງນະຄອນຫລວງເຢລູຊາເລມ ໂດຍອາເມລິກາສະເໜີຍົກເຂດອາບູ ດິສ ເຊິ່ງຕັ້ງຢູ່ນອກນະຄອນຫລວງເຢລູຊາເລມ ເພື່ອໃຫ້ຊາວປາແລັສຕິນສາມາດເຂົ້າສູ່ສາສະນະສະຖານ “ໄດ້ຢ່າງເສລີ”. ນອກຈາກນີ້ ທ່ານ ຮານິເຍາະ ອ້າງວ່າອາເມລິກາຍັງມີແຜນແບ່ງເຂດເວສແບງອອກເປັນ 3 ສ່ວນ ແລະ ພະຍາຍາມສະແຫວງຫາໂອກາດເຂົ້າມາປົກຄອງເຂດກາຊາ ດ້ວຍການຈັດຕັ້ງກຸ່ມການເມືອງຄູ່ແຂ່ງຂຶ້ນມາ ແຕ່ບໍ່ໄດ້ລົງເລິກໃນລາຍລະອຽດ.
