ທ່ານ ຮຸນເຊນ ປະກາດດຳລົງຕຳແໜ່ງ ນາຍົກກຳປູເຈຍຕໍ່ໄປຢ່າງໜ້ອຍ 10 ປີ
ນາຍົກລັດຖະມົນຕີ ຮຸນເຊນ ຂອງກຳປູເຈຍ ປະກາດໃນວັນທີ 27 ທັນວານີ້ ຈະດຳລົງຕຳແໜ່ງຕໍ່ໄປອີກຢ່າງໜ້ອຍ 10 ປີ ຫລັງຢູ່ໃນຕຳແໜ່ງມາກວ່າ 30 ປີແລ້ວ, ພາຍຫລັງສານດີກາຕັດສິນໃຫ້ຍຸບພັກຝ່າຍຄ້ານຫລັກກ່ອນການເລືອກຕັ້ງທົ່ວໄປໃນປີ 2018.
ສານຕັດສິນໃຫ້ຍຸບພັກກູ້ຊາດກຳປູເຈຍ (CNRP) ໃນເດືອນພະຈິກ ຕາມຄຳຮ້ອງຂໍຂອງລັດຖະບານທ່ານ ຮຸນເຊນ ເຊິ່ງກຸ່ມສິດທິຮຽກວ່າເປັນຈຸດຈົບຂອງປະຊາທິປະໄຕໃນກຳປູເຈຍ. ເຖິງຢ່າງໃດກໍຕາມ, ຈີນ ເຊິ່ງເປັນປະເທດຜູ້ສະໜັບສະໜູນລາຍໃຫຍ່ຂອງກຳປູເຈຍຖະແຫລງສະໜັບສະໜູນຄວາມພະຍາຍາມຂອງລັດຖະບານກຳປູເຈຍທີ່ຈະຮັກສາຄວາມໝັ້ນຄົງຂອງປະເທດ. ນາຍົກລັດຖະມົນຕີ ຮຸນເຊນ ກ່າວປາໄສກັບພະນັກງານໂຮງງານເສື້ອຜ້າຫລາຍພັນຄົນ ນອກນະຄອນຫລວງພະນົມເປັນ ໃນວັນທີ 27 ທັນວານີ້ວ່າ: ທ່ານຈະຍັງຢູ່ໃນຕຳແໜ່ງຕໍ່ໄປອີກສອງສະໄໝ ແລະ ຂໍໃຫ້ຊ່ວຍກັນເລືອກຜູ້ສະໝັກຈາກພັກປະຊາຊົນກຳປູເຈຍ (CPP) ເຊິ່ງເປັນພັກລັດຖະບານໃນການເລືອກຕັ້ງວັນທີ 29 ກໍລະກົດ 2018 ນີ້.
