ນັກກິລາ ວູຊູລາວ ສ້າງປະຫວັດສາດ ຫລັງຍາດໄດ້ຫລຽນຄໍາທີ່ ສປ ຈີນ
ສະຫະພັນວູຊູແຫ່ງຊາດລາວ ໄດ້ສົ່ງນັກກິລາຈໍານວນ 3 ຄົນ ເຂົ້າຮ່ວມການແຂ່ງຂັນລະດັບສະໂມສອນສະໝັກຫລິ້ນ ທີ່ແຂວງກວາງຊີ ປະເທດ ສປ ຈີນ ຈັດຂຶ້ນລະຫວ່າງວັນທີ 10-13 ທັນວານີ້ ເຊິ່ງມີບັນດາປະເທດທົ່ວອາຊີເຂົ້າຮ່ວມ. ຜ່ານການແຂ່ງຂັນ ນັກກິລາທີມຊາດລາວສາມາດຍາດໄດ້ 1 ຫລຽນຄໍາ ແລະ 2 ຫລຽນເງິນ ໃນປະເພດການຕໍ່ສູ້ ສ້າງປະຫວັດສາດໃຫ້ກັບຊາດລາວອີກຄັ້ງ.
ທ່ານ ສີທາ ຈູຢາປະເສີດ ເລຂາສະຫະພັນກິລາວູຊູແຫ່ງຊາດລາວ ໃຫ້ສໍາພາດວ່າ: ການແຂ່ງຂັນລະດັບສະໂມສອນສະໜັກຫລິ້ນທີ່ ສປ ຈີນ ຈັດຂຶ້ນຕົ້ນເດືອນທັນວານີ້ ພວກເຮົາໄດ້ສົ່ງນັກກິລາເຂົ້າຮ່ວມທັງໝົດ 3 ຄົນໃນປະເພດຕໍ່ສູ້ ເຊິ່ງການແຂ່ງຂັນໄດ້ດໍາເນີນເປັນເວລາ 3 ວັນ ແລະ ນັກກິລາທີມຊາດລາວເຮົາສາມາດສ້າງຜົນງານດີເດັ່ນພໍສົມຄວນຄື: ທ້າວ ເດດສະດາ ເຂົ້າຮ່ວມຮຸ່ນນໍ້າໜັກ 61 ກິໂລ ສາມາດຍາດໄດ້ຫລຽນຄໍາ, ທ້າວ ໜູຄິດ ແລະ ທ້າວ ຄໍາຫລ້າ ສຸຂະພອນ ເຂົ້າຮ່ວມຮຸ່ນນໍ້າໜັກ 65 ກິໂລ ສາມາດຍາດໄດ້ຫລຽນເງິນທັງສອງຮຸ່ນ. ການແຂ່ງຂັນຄັ້ງນີ້ຖືວ່າເປັນລາຍການສໍາຄັນອັນໜຶ່ງຂອງສະຫະພັນພວກເຮົາ ເພາະໄດ້ເຮັດໃຫ້ນັກກິລາສະແດງຄວາມສາມາດ ພ້ອມທັງເປັນການຝຶກຊ້ອມໄປໃນຕົວ ເພື່ອກຽມຄວາມພ້ອມເຂົ້າຮ່ວມການແຂ່ງຂັນລາຍການຕ່າງໆໃນລະດັບພາກພື້ນ ແລະ ສາກົນ, ເຖິງວ່າການເຂົ້າຮ່ວມແຂ່ງຂັນຄັ້ງນີ້ພວກເຮົາບໍ່ສາມາດເຮັດໄດ້ເຕັມ 100% ຕາມເປົ້າໝາຍທີ່ກໍານົດເອົາໄວ້ ແຕ່ໄດ້ສະແດງໃຫ້ເຫັນວ່ານັກກິລາຂອງພວກເຮົາໄດ້ມີການພັດທະນາຫລາຍພໍສົມຄວນ; ພາຍຫລັງການເຂົ້າຮ່ວມໃນງານມະຫະກໍາຊີເກມທີ່ປະເທດມາເລເຊຍຈັດຂຶ້ນທ້າຍເດືອນສິງຫາຜ່ານມານີ້ ເຊິ່ງນັກກິລາຂອງພວກເຮົາບໍ່ສາມາດຍາດໄດ້ຜົນງານໂດດເດັ່ນກໍຕາມ ແຕ່ຫລັງຈາກສໍາເລັດການແຂ່ງຂັນຊີເກມແລ້ວ ພວກເຮົາໄດ້ສົ່ງນັກກິລາເຂົ້າຝຶກຊ້ອມທີ່ ສປ ຈີນ ເພື່ອພັດທະນາຕົວເອງຕະຫລອດເວລາ ພ້ອມທັງເຂົ້າຮ່ວມການແຂ່ງຂັນລາຍການຕ່າງໆຢູ່ບັນດາແຂວງເມືອງຕ່າງໆທີ່ ສປ ຈີນ ຈັດຂຶ້ນ.
