ພອນສຸກສິນ ກຳມະການລາວ ຄວ້າລາງວັນກຳມະການຕັດສິນດີເດັ່ນທີ່ຫວຽດນາມ
ທ່ານ ພອນສຸກສິນ ເຕໂຊ ກຳມະການຕັດສິນລະດັບ FIFA ຈາກລາວ ຄວ້າລາງວັນກຳມະການດີເດັ່ນໃນການເຮັດໜ້າທີ່ຕັດສິນລາຍການແຂ່ງຂັນ International Newspaper cup u 21 tournament 2017 ທີ່ປະເທດຫວຽດນາມ ໃນລະຫວ່າງວັນທີ 10-22 ທັນວາ 2017.
ໂດຍເພຈ໌ສະຫະພັນບານເຕະແຫ່ງຊາດລາວ ເປີດເຜີຍວ່າ: ທ່ານ ພອນສຸກສິນ ເຕໂຊ ກຳມະການຕັດສິນລະດັບ FIFA ຈາກລາວ ສຳເລັດການຕັດສິນໃນລາຍການແຂ່ງຂັນ International Newspaper cup u 21 tournament 2017 ທີ່ປະເທດຫວຽດນາມ ໃນລະຫວ່າງວັນທີ 10-22 ທັນວາ 2017 ໂດຍລາວລົງຕັດສິນທັງໝົດ 7 ນັດ ພ້ອມທັງຄວ້າລາງວັນກຳມະການຕັດສິນດີເດັ່ນເປັນປີທີ 4 ຕິດຕໍ່ກັນ.
ຖືວ່າເປັນການປັບປຸງຕົວເອງ ແລະ ພັດທະນາຂຶ້ນໄປອີກຂັ້ນສຳລັບທ່ານ ພອນສຸກສິນ ກຳມະການລາວ ເພາະໃນປີ 2016 ມີຫາງສຽງຂອງຫລາຍຄົນທັງນັກເຕະ ແລະ ກອງເຊຍວ່າ: ລາວຕັດສິນບໍ່ຊັດເຈນໃນຫລາຍນັດໃນການແຂ່ງຂັນບານເຕະ ລາວພຣີເມຍລີກ ພ້ອມທັງຖືກ ສຕລ ສັ່ງຫ້າມລົງຕັດສິນໃນ ລາວພຣີເມຍລີກ 2016.
ເຖິງຢ່າງໃດກໍຕາມ, ພອນສຸກສິນ ໄດ້ເກັບເອົາຂໍ້ຜິດພາດດັ່ງກ່າວມາເປັນບົດຮຽນ ແລະ ປັບປຸງຈົນພິສູດໃຫ້ເຫັນແລ້ວວ່າພັດທະນາຂຶ້ນໄປອີກຂັ້ນ ຈາກການລົງຕັດສິນໃນ ລາວພຣີເມຍລີກ 2017, ໃນລີກທີ່ ມານດິນ ແລະ ລາຍການທີ່ຫວຽດນາມ ຈົນເປັນທີ່ຍອມຮັບຂອງນັກເຕະ ແລະ ແຟນບານ.
