ຮອງປະທານຊົນບູລີ ຍ້ອງ ພັດທະນາ ມີສີຕີນດີ ພ້ອມສົ່ງລົງທົດສອບລາຍການຊີງແຊ້ມ U-19
ພາຍຫລັງທີ່ ພັດທະນາ ພົມມະເທບ ນັກເຕະຊາວລາວ ອາຍຸ 18 ປີ ໄດ້ໄປທົດສອບສີຕີນກັບ ຊົນບູລີ ເອັຟຊີ ແລະ ສ້າງຜົນງານໄດ້ຢ່າງໂດດເດັ່ນຕະຫລອດ 1 ອາທິດຜ່ານມາ ກ່ອນຈະໄດ້ຮັບສັນຍາກັບທີມໃນທີ່ສຸດ ໂດຍຮອງປະທານສະໂມສອນຍ້ອງ ພັດທະນາ ວ່າມີສີຕີນດີ ແລະ ອະນາຄົດຍາວໄກກັບທີມ.
ຫລ້າສຸດທ່ານ ອໍລະນົບ ສິງໂຕທອງ ຮອງປະທານສະໂມສອນ ຊົນບູລີ ກ່າວວ່າ: ພັດທະນາ ເປັນນັກເຕະທີ່ມີສີຕີນດີ, ມີຄວາມໄວ ແລະ ຄວາມຄ່ອງຕົວ ເຊິ່ງລາວໄດ້ສະແດງໃຫ້ພວກເຮົາເຫັນຕະຫລອດໄລຍະເວລາ 1 ອາທິດຜ່ານມາ ທີ່ມາຄັດເລືອກກັບທີມ ທີ່ສຳຄັນລາວຍັງອາຍຸນ້ອຍ ແລະ ກ້າວໄປເຖິງການຕິດທີມຊາດຊຸດໃຫຍ່ໄດ້ນຳອີກ.
ຮອງປະທານ ກ່າວວ່າ: ເບື້ອງຕົ້ນພວກເຮົາຈະໃຫ້ໂອກາດລາວລົງແຂ່ງຂັນໃນບານເຕະເຍົາວະຊົນລຸ້ນອາຍຸ 19 ປີ ຊີງແຊ້ມແຫ່ງປະເທດໄທໃນຮອບ 8 ທີມສຸດທ້າຍ ໃນເດືອນມັງກອນນີ້ ທີ່ພວກເຮົາຈັບສະຫລາກມາພົບກັບ ອັສສຳຊັນ ຢູໄນເຕັດ.
